ကျောက်ရစ်ရွာက စစ်အုပ်စု လက်နက်ကြီးနဲ့ ပစ်ခံရလို့ ၂ ဦးသေ ၅ ဦးဒဏ်ရာရ

စစ်ကိုင်းတိုင်း၊ မြောင်မြို့နယ်၊ ကျောက်ရစ်ရွာမှာ တပ်စွဲနေတဲ့ စစ်သားတွေကို လက်နက်ကြီးနဲ့ ပစ်ခတ်ခဲ့တာကြောင့် စစ်သား ၂ ဦးသေပြီး ၅ဦး ထိခိုက်ဒဏ်ရာရခဲ့တယ်လို့ Myanmar's Royal Dragon Army-MRDA အဖွဲ့ဆီက သိရပါတယ်။

ဇူလိုင် ၃၀ ရက် ညနေ ၅ နာရီခွဲကနေ ၆ နာရီခွဲအထိ ၁ နာရီကြာ ကာကွယ်ရေးအဖွဲ့တွေဘက်က လက်နက်ကြီးအပါအဝင် စက်ကလေးတွေနဲ့ ပစ်ခတ်တိုက်ခိုက်ခဲ့တာလို့ ဆိုပါတယ်။

"စစ်ကောင်စီအထိုင်ချထားတဲ့ ကျောက်ရစ်စခန်းကို ဝိုင်းတိုက်တာ။ ကျနော်တို့ဘက်က RPG 79 Pading စက်ကလေးတွေနဲ့ စစ်ကောင်စီတပ်သားတွေ ထမင်းစားသောက်နေတဲ့နေရာကို ထုတာ။ စစ်** ၂ ကောင်သေပြီးတော့ ၅ ဦးဒဏ်ရာရတယ်ဆိုတာ ပြည်သူတွေက ပြန်ပြောလို့ သိရပါတယ်။" လို့ Myanmar's Royal Dragon Army-MRDA ပြန်ကြားရေးတာဝန်ခံ ကိုနွေဦးဇော်က ပြောပါတယ်။

အဲ့ဒီ စစ်အုပ်စုဟာ အင်းတကော် ၇၀၁ တပ်က စစ်သားတွေလို့ သိရပြီး အင်အား ၁၀၀ ဝန်းကျင်နဲ့ လက်ရှိအချိန်ထိ ကျောက်ရစ်ရွာမှာ ဆက်လက်အထိုင်ချနေကာ အနီးဝန်းကျင်က ရွာတွေကို လက်နက်ကြီးတွေနဲ့ ရမ်းသမ်းပစ်ခတ်တာတွေ လုပ်နေတယ်လို့ သိရပါတယ်။

ဒီပစ်ခတ်တိုက်ခိုက်မှုကို Myanmar's Royal Dragon Army-MRDA၊ မြင်းခြံခရိုင် တပ်ရင်း ၁၊ မြင်းခြံခရိုင် တပ်ရင်း ၃၊ စစ်ကိုင်းခရိုင်တပ်ရင်း ၄၊ ကျေးရွာတပ်ပေါင်းစု(မြောင်)တို့က ပူးပေါင်းတိုက်ခိုက်ခဲ့ကြတာလည်း ဖြစ်ပါတယ်။ 

တည်းဖြတ် - ငြိမ်းဇော်

#မြေလတ်အသံ

#သတင်း #ရုပ်သံ #မြိုင် #ကျောက်ရစ်ရွာ #စစ်အုပ်စုအထိုင်ချ #တိုက်ခိုက်ခံရ #စစ်ကောင်စီ #PDF