ချောက်မှာ စစ်ကောင်စီသတင်းပေးဆိုသူ ပစ်သတ်ခံရ

မကွေးတိုင်း၊ ချောက်မြို့နယ်၊ ဆားလယ်ကျွန်းကျေးရွာက စစ်ကောင်စီသတင်းပေးဆိုသူကို ဇန်နဝါရီ ၁၁ ရက် ညနေ ၄ နာရီ ၁၅ မိနစ်က သေနတ်နဲ့ပစ်ခတ်ရာ သေဆုံးခဲ့တယ်လို့ Chauk Revolution Force - CRF ဆီက သိရပါတယ်။

အသက် ၄၂ နှစ်အရွယ် ထွန်းနိုင် ဆိုသူကို ဆားလယ်ကျွန်းရွာထိပ်မှာ ထွန်စက်နဲ့ မြေကွက်ကိုချဲ့နေချိန် Chauk Revolution Force - CRF နဲ့ Kyaukpadaung special defense Force တပ်ဖွဲ့ဝင်တွေက ပစ်ခတ်ခဲ့တာလို့ ဆိုပါတယ်။ 

“သူ ဝိုင်း(မြေ)တိုးချဲ့လုပ်နေတဲ့အချိန် ပစ်ခတ်ရှင်းလင်းခဲ့တာ၊ လမ်းမှာပါ။ သူ ရွာထိပ်မှာ ထွန်စက်နဲ့ ဝိုင်းတိုးချဲ့လုပ်နေတာ၊ သူပိုင်နေရာလည်း မဟုတ်ဘူး။ သေနတ်နဲ့ ၅ ချက်ပစ်ခတ်ရှင်းလင်းခဲ့တာ၊ ခေါင်းကိုပဲပစ်ခဲ့တာ။” လို့ Chauk Revolution Force - CRF တာဝန်ခံ ကျောင်းသားက ပြောပါတယ်။

ကိုထွန်းနိုင်ဟာ ပျူစောထီးတွေနဲ့ပူးပေါင်းတဲ့အပြင် သူ့ရဲ့သတင်းပေးတိုင်ကြားမှုတွေကြောင့် ဆားလယ်ကျွန်းရွာမှာနေတဲ့ တော်လှန်ရေးတပ်ဖွဲ့ထောက်ပံ့သူတွေနဲ့ နိုင်ငံရေးတက်ကြွလှုပ်ရှားသူတွေလည်း ဖမ်းဆီးခံရတာတွေရှိတယ်လို့ ဆိုပါတယ်။ 

“သူသတင်းပေးလုပ်တာ လွန်ခဲ့တဲ့ ၅ လလောက်ကပါ။ သူက မိသားစုတစုကို ဒုက္ခပေးထားတာ။ ပျူစောထီးတွေနဲ့ သူပေါင်းပြီးတော့ လမ်းမှာဂိတ်တွေချပြီး စစ်ဆေးပြီးတော့ ငွေညှစ်တာတွေ လုပ်တယ်။” လို့ တာဝန်ခံကျောင်းသားက ပြောပါတယ်။ 

ပစ်ခတ်ပြီးနောက် နာရီဝက်အကြာမှာ ရွာထဲကဒေသခံတချို့က အလောင်းကို ကနဦးလာကောက်သွားကြပြီး ၁ နာရီခွဲလောက်အကြာမှာတော့ စစ်ကောင်စီတပ်ဖွဲ့ဝင်တွေလိုက်ပါလာတဲ့ ကား ၅ စီးနဲ့ အလောင်းကို ချောက်မြို့ဆီသယ်သွားတယ်လို့ သိရကြောင်း သူက ဆက်ပြောပါတယ်။ 

ပြီးခဲ့တဲ့ ဇန်နဝါရီ ၄ ရက်ကလည်း ချောက်မြို့နယ်၊ ကြည့်မြင်ကျေးရွာအနီးမှာ စစ်ကောင်စီရဲ့ထောက်ပို့ကား ၃ စီးကို Chauk Revolution Force - CRF က မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃ ဦးသေဆုံးပြီး ၄ ဦးဒဏ်ရာရခဲ့တယ်လို့ သိရပါတယ်။ 

စာတည်း - လင်း 

#မြေလတ်အသံ

#မကွေး #ချောက် #ဆားလယ်ကျွန်းရွာ #စစ်တပ်သတင်းပေး #အသတ်ခံရ