စစ်ကောင်စီဂိတ် မြေပြင်နဲ့ဝေဟင်ပေါင်းတိုက်ခံရလို့ ၁၁ ဦးသေဆုံးဟုဆို (ရုပ်/သံ)

"မြေပြင်ဝေဟင်တိုက်တော့ သူတို့စီးတဲ့ကားတွေအပေါ် ဒရုန်းဗုံးတွေကျလို့ ကားမီးလောင်တာတွေရှိခဲ့တယ်။ မြေပြင်ကနေဆို အာပီဂျီ၊ ၄၀ မမတွေနဲ့ တော်တော်လေးဖိအားပေးတိုက်ခိုက်နိုင်ခဲ့တယ်။ စခန်းသိမ်းဖို့ကျတော့ တောင်သာမြို့နဲ့ မီတာ ၈၀၀ လောက်ပဲကွာတော့ စစ်ကူတွေ ချက်ချင်းရောက်လာလို့ မသိမ်းနိုင်ခဲ့ဘူး" လို့ ပြောပါတယ်။

ဝေဟင်​မြေပြင်တိုက်ခိုက်ခံရလို့ မကျီးရိုးဂိတ်က စစ်ကောင်စီတပ်ဖွဲ့ဝင် ၆ ဦးနေရာမှာသေဆုံးပြီး ဒဏ်ရာရသူတွေကို ဆေးရုံပို့ချိန် နောက်ထပ် ၅ ဦး သေဆုံးသွားတယ်လို့ ဆိုပါတယ်။

စစ်ကောင်စီစစ်ဆေးရေးဂိတ် တိုက်ခိုက်ခံရပြီးချိန်မှာ စစ်ကူရောက်လာတဲ့ အဖွဲ့တွေက လမ်းသွားလမ်းလာတွေကို စစ်ဆေးပြီးနောက် အမျိုးသား ၄ ဦးကို ဖမ်းဆီးသွားတယ်လို့ သိရပါတယ်။

အဲဒီတိုက်ခိုက်မှုကိုတော့ Myingyan District Drone strike အဖွဲ့၊ မြင်းခြံခရိုင် တပ်ရင်း ၁၊ ၃၊ ၄ တို့က ပူးပေါင်းတိုက်ခိုက်ခဲ့တာပါ။

မတ်လ ၂၄ ရက်နေ့ညနေ ၃ နာရီခွဲခန့်မှာ တောင်သာမြို့ဝင် တောင်သာမြောက်ရဲစခန်းအနီးရှိ အင်အား ၇၀ ခန့်ရှိတဲ့ စစ်ဆေးရေးဂိတ်ကို ဒရုန်းနဲ့ဗုံး ၁ လုံးချတိုက်ခိုက်ခဲ့ရာ စစ်ကောင်စီတပ်သား ၃ ဦး ထိခိုက်ခဲ့သေးတယ်လို့ သိရပါတယ်။

တည်းဖြတ် - ငြိမ်းဇော်
#မြေလတ်အသံ