စစ်ဆေးရေးဂိတ်က ရဲတွေ ပစ်ခတ်ခံရလို့ ၂ ဦးသေဆုံးပြီး ၃ ဦးဒဏ်ရာရ

စစ်ကိုင်းတိုင်း၊ မုံရွာမြို့၊ စီးပွားရေးတက္ကသိုလ်အနီး၊ ဇလုပ်အဝိုင်းပတ် စစ်ဆေးရေးဂိတ်က အင်အား ၁၅ ဦးဝန်းကျင်ရှိ ရဲတွေကို ပစ်ခတ်တိုက်ခိုက်ခဲ့ရာ ရဲ ၂ ဦးသေဆုံးပြီး ၃ ဦး ထိခိုက်ဒဏ်ရာရရှိတယ်လို့ မုံရွာခရိုင်တပ်ရင်း အမှတ် (၂၇) Black Dragon Force အဖွဲ့ဆီက သိရပါတယ်။

လမ်းသွားလမ်းလာ ပြည်သူတွေကို စစ်ဆေးရေးလုပ်နေတဲ့ ဇလုပ်အဝိုင်းပတ်က စစ်ဆေးရေးဂိတ်ကို ဇူလိုင် ၃၁ ရက် နေ့လယ် ၂ နာရီဝန်းကျင်မှာ ပစ်ခတ်ခဲ့တယ်လို့ ဆိုပါတယ်။ 

"မုံရွာမြို့ စီးပွားရေးတက္ကသိုလ်အနီးမှာရှိတဲ့ ဇလုပ်အဝိုင်းပတ်က စစ်ဆေးရေးဂိတ်ကို သွားပစ်တာ၊ ပစ်ခတ်အချိန်က မိနစ်အနည်းငယ်ပဲကြာတယ်၊ အကြာကြီးမပစ်ခဲ့ဘူး၊ အဓိကတော့ စစ်ဆေးနေတဲ့ကောင်တွေပဲ ပစ်ပြီးတော့ ကျနော်တို့အထိ အခိုက်မရှိပြန်ဆုတ်ခဲ့တာ၊ မျက်မြင်တွေပြောပြလို့ သိရတာက ရဲ ၂ ဦးသေပြီး ၃ ဦးထိခိုက်ဒဏ်ရာရတယ်" လို့ မုံရွာခရိုင်တပ်ရင်း အမှတ် (၂၇) Black Dragon Force တပ်ရင်းမှူး ဗိုလ်စိုးကြီးက ပြောပါတယ်။

အဲ့ဒီစစ်ဆေးရေးဂိတ်က ရဲတွေဟာ မုံရွာမြို့ပေါ်ရဲစခန်းတွေမှာ တာဝန်ထမ်းဆောင်နေကြတဲ့ ရဲတွေဖြစ်တယ်လို့ သိရပါတယ်။

တည်းဖြတ် - ငြိမ်းဇော်

#မြေလတ်အသံ

#မုံရွာ # စစ်ဆေးရေးဂိတ် #ပစ်ခတ်ခံရ #ရဲ #PDF