စစ်တပ်ကပစ်တဲ့ ၁၂၀ မမ ကျည်ထိလို့ ပြည်သူ ၂ ဦးဒဏ်ရာရပြီး နေအိမ် ၂ လုံးပျက်စီး

ပဲခူးတိုင်း၊ ရေတာရှည်မြို့နယ်၊ ရှမ်းစုကျေးရွာမှာ စစ်ကောင်စီတပ်ကပစ်တဲ့ လက်နက်ကြီးကျည် ထိမှန်ပြီး ဒေသခံ ၂ ဦးဒဏ်ရာရကာ နေအိမ် ၂ လုံးလည်း ပျက်စီးသွားတယ်လို့ ဒေသခံတွေဆီက သိရပါတယ်။

ဇန်နဝါရီလ ၂၁ ရက် ည ၁၀ နာရီလောက်ကနေ ည ၁၁ နာရီအထိ ရေတာရှည်အခြေစိုက် ၆၀၄ ဒုံးတပ်က ၁၂၀ မမ လက်နက်ကြီး ၈ လုံးပစ်ခတ်ရာ ၃ လုံးဟာ ရှမ်းစုကျေးရွာထဲကို ကျရောက် ပေါက်ကွဲခဲ့ပါတယ်။

"အဲ့ညက တိုက်ပွဲမရှိဘဲ စကစဘက်က လက်နက်ကြီးနဲ့ရွာတွေဘက် လိုက်ပစ်ရာကနေ ရွာထဲကျတာ။ အဲ့အချိန် လူတွေကအိပ်နေကြတာလေ။ လက်နက်ကြီးကျလို့ ထပြေးကြရသေးတယ်"လို့ ဒေသခံတဥှီးက ပြောပါတယ်။

စစ်ကောင်စီပစ်တဲ့လက်နက်ကြီးထိလို့ ဦးမောင်ချို အသက် ၅၀ နှစ်ခန့်မှာ ဘယ်ဘက်ခြေထောက်ဖြတ်ရပြီး မောင်မျိုးမင်းဦး ၃၀ နှစ်မှာတော့ ခြေသလုံးနဲ့ပေါင်မှာ အစမှန်ဒဏ်ရာတွေရသွားတယ်လို့ ဆိုပါတယ်။

ဒါ့အပြင် နေအိမ် ၂ လုံးလည်း ထိခိုက်ပျက်စီးသွားသလို ဆိုင်ကယ် ၂ စီးလည်း ကျည်စမှန် ပျက်စီးမှုအချို့ရှိခဲ့တယ်လို့ သိရပါတယ်။

ပြီးခဲ့တဲ့ ဒီဇင်ဘာလ ၂ ရက်က ရေတာရှည်မြို့နယ်၊ သစ်ချဆိပ်ကျေးရွာမှာ စစ်ကောင်စီတပ်တွေပစ်တဲ့ လက်နက်ကြီးထိလို့ အသက် ၄၀ နှစ်အရွယ် အမျိုးသား ၁ ဦး ဒဏ်ရာရရှိခဲ့ပါသေးတယ်။ 

စာတည်း - လင်း 

#မြေလတ်အသံ

#ပဲခူး #ရေတာရှည် #စစ်ကောင်စီ #လက်နက်ကြီးထိ #ဒဏ်ရာရ #ထိခိုက် #သေဆုံး #သတင်း #မြေလတ်သတင်း