ဆင်ဖြူကျွန်းမှာ တိုက်ပွဲဖြစ်ပြီး စက်သုံးဆီဆိုင်ကိုဗုံးသီးကျလို့ မီးလောင် ■ စစ်တပ်က အင်အားရာချီဖြည့်တင်းပြီး လက်နက်ကြီးတွေနဲ့ အဆက်မပြတ်ပစ်နေ

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့မှာ ကာကွယ်ရေးအဖွဲ့တွေနဲ့ စစ်ကောင်စီတပ်တွေအကြား တိုက်ပွဲဖြစ်ပွားနေပြီး လက်နက်ကြီးဗုံးသီးကျလို့ စက်သုံးဆီဆိုင်မီးလောင်နေတယ်လို့ မြို့ခံတွေထံက သိရပါတယ်။ 

နိုဝင်ဘာ ၁၅ ရက် ဒီကနေ့မနက် ၄ နာရီခွဲခန့်မှာ ဆင်ဖြူကျွန်းမြို့ ဆုတ်လှေဦးဘုရားအနီးလမ်းခွဲမှာ ကာကွယ်ရေးအဖွဲ့တွေနဲ့ စစ်ကောင်စီတပ်တွေ အပြန်အလှန် ထိတွေ့ပစ်ခတ်‌မှုဖြစ်ခဲ့ပြီး အခင်းဖြစ်နေရာအနီးက ရတနာစက်သုံးဆီဆိုင်အပေါ် လက်နက်ကြီးဗုံးသီး ကျရောက်ပေါက်ကွဲခဲ့တာလို့ ဆိုပါတယ်။

“ ဘယ်ကပစ်တဲ့ လက်နက်ကြီးကျည်ကျပြီး ဆီဆိုင်မီးလောင်တာတော့ မသိဘူး” လို့ မြို့ခံတဦးက ပြောပါတယ်။

လက်ရှိမှာ ဆင်ဖြူကျွန်းမြို့ကို မင်းဘူး(စကု)အခြေစိုက် ခလရ ၁၀ တပ်က အင်အား ၁၅၀ ခန့်နဲ့ အင်အားဖြည့်တင်းထားပြီး သစ္စာမြိုင်ရပ်ကွက် ဝါဂိုဒေါင်မှာ တပ်စွဲကာ လက်နက်ကြီးတွေနဲ့ အဆက်မပြတ်ပစ်ခတ်နေတယ်လို့ ဆိုပါတယ်။

“ လက်ရှိမှာ စကုစစ်တပ်က စစ်သားတွေက သစ္စာမြိုင်ကွက်သစ် ဝါဂိုဒေါင်အတွင်းကနေ လက်နက်ကြီးတွေနဲ့ ကာကွယ်ရေးအဖွဲ့တွေရှိတဲ့ စလင်းချောင်းအနောက်ဘက်ကို ပစ်ခတ်နေတုန်းပဲ” လို့ ၎င်းက ပြောပါတယ်။

ဆင်ဖြူကျွန်းမှာ စစ်ကောင်စီတပ်ရဲ့ စလင်းတပ်နယ် ခလရ ၂၅၃၊ ခလရ ၂၅၄၊ ခလရ ၂၅၅ နဲ့ ဆိပ်ဖြူ၊ ကဇွန်းမ အခြေစိုက် ကပစ ၂၁ က စစ်ကောင်စီတပ်သား‌တွေ ပူးပေါင်းကာ ဆုတ်လှေဦး လမ်းခွဲအပါအဝင် မြို့ပေါ် နေရာ ၅ ခုထက်မနည်းမှာ အထိုင်ချတပ်စွဲနေတယ်လို့ သိရပါတယ်။

စာတည်း- ဟိန်းစံ

#မြေလတ်အသံ

#မကွေး #ဆင်ဖြူကျွန်း #တိုက်ပွဲ #စစ်တပ် #လက်နက်ကြီး