ညီညွတ်မှုနဲ့ လှမ်းယူရမယ့် လက်တကမ်းက တော်လှန်ရေးအောင်ပန်း (အယ်ဒီတာ့ အာဘော်)

စစ်အာဏာရှင်ဆန့်ကျင်တဲ့ နွေဦးတော်လှန်ရေးခရီးတလျှောက် လက်ရှိအခြေအနေဟာ တော်လှန်ရေး အောင်မြင်မှုရဲ့ အထွဋ်အထိပ်လို့ ဆိုရမှာပါ။ 

မြန်မာနိုင်ငံမှာ အာဏာသိမ်းဆန့်ကျင်ဆန္ဒပြပွဲတွေ တနိုင်ငံလုံး ခြိမ့်ခြိမ့်သဲဆင်နွှဲခဲ့ကြတယ်။ စစ်အာဏာရှင်က လက်နက်အားကိုးနဲ့ အကြမ်းဖက်ဖြေရှင်းလာတဲ့အခါ လူထုဟာ လက်နက်ကိုင်တော်လှန်ရေးလမ်းစဉ်ကို ရွေးချယ်ပြီး စစ်အာဏာရှင်စနစ် အမြစ်ဖြတ်ချေမှုန်းဖို့ ကြိုးစားခဲ့ကြတယ်။ 

လက်လုပ်သေနတ်တွေကိုင်ပြီး အာဏာရှင်စစ်တပ်ကို ပြောက်ကျားနည်းစနစ်နဲ့ နေရာအစုံမှာ တော်လှန်ခဲ့ကြတယ်။ ၃ နှစ်နီးပါးရှိလာတဲ့ ကာလတလျှောက်လုံးမှာ လက်ရှိအခြေအနေဟာ လက်နက်ကိုင်တော်လှန်ရေး၊ စစ်အာဏာရှင်တော်လှန်ရေးရဲ့ အအောင်မြင်ဆုံးနဲ့ အတိုးတက်ဆုံးအချိန်လို့ ဆိုရမှာပါ။ 

ပြည်သူလူထုရဲ့ လက်နက်ကိုင်တော်လှန်ရေးတိုက်ပွဲ အောင်မြင်မှုဆိုတာ အကြမ်းဖက်စစ်အာဏာရှင်အတွက် အရှုံးတွေနဲ့ ရင်ဆိုင်နေရတဲ့အချိန်၊ အရေးနိမ့်နေတဲ့အချိန် တနည်းအားဖြင့် စစ်အာဏာရှင် မင်းအောင်လှိုင် ဦးဆောင်တဲ့ စစ်ကောင်စီတပ်ရဲ့ အားအနည်းဆုံးအချိန်ပါ။

ဒီအခြေအနေ၊ ဒီအခွင့်အရေးဟာ ၂ ခါ ရချင်မှ ရပါလိမ့်မယ်။ ကျိန်းသေတာက လက်ရှိ ကြုံလာရတဲ့အခွင့်အရေးကို အမိအရဆုတ်ကိုင်နိုင်ဖို့ပါပဲ။ 

ဒါကြောင့် မြန်မာလူထုလိုလားတောင့်တနေတဲ့ စစ်အာဏာရှင်စနစ်ချုပ်ငြိမ်းရေးဆိုတာ မြန်မာပြည်သူတဦးချင်းစီရဲ့ အရှေ့ကို ဆိုက်ဆိုက်မြိုက်မြိုက်ရောက်လာခဲ့ပြီလို့ ဆိုရမှာပါ။ လှမ်းယူဆုတ်ကိုင်ရမယ့် အားစိုက်မှုတခုသာ လိုပါတော့တယ်။

ရရှိလာတဲ့အခွင့်အရေးကို  မလွတ်တမ်းအမိအရဆုပ်ကိုင်ပြီး တော်လှန်ရေးအောင်ပန်းကို လှမ်းယူနိုင်ဖို့ လူတိုင်းကိုယ်စီ ကျရာတာဝန်ကို ရောက်ရာနေရာက ထမ်းဆောင်ကြဖို့ ကျွန်ုပ်တို့ မြေလတ်အသံက အလေးအနက် တိုက်တွန်းလိုက်ပါတယ်။

#မြေလတ်အသံ

#အယ်ဒီတာ့အာဘော် #ညီညွတ်မှု #တော်လှန်ရေး #တော်လှန်ရေးအောင်ပန်း #အာဏာရှင်စနစ် #ချုပ်ငြိမ်းရေး