တိုက်ပွဲပြင်းထန်ခဲ့တဲ့ မင်းတုန်းမှာ ကာကွယ်ရေးတပ်ဖွဲ့ဝင် ၁ ဦးသေဆုံးပြီး စစ်ကောင်စီဘက်ကလည်း သေဆုံးသူများပြားဟုဆို

မကွေးတိုင်း၊ မင်းတုန်းမြို့နယ်၊ မြောက်ပြင်ရွာမှာ စစ်ကောင်စီတပ်ဖွဲ့ဝင်တွေနဲ့ ဒေသခံကာကွယ်ရေးတပ်တို့ တိုက်ပွဲဖြစ်ခဲ့ရာက နှစ်ဖက်ထိခိုက်သေဆုံးမှုရှိပြီး အရပ်သား ၁ ဦးလည်းဒဏ်ရာရတယ်လို့ ဖေဖော်ဝါရီ ၂၁ ရက်မှာ သရက်ခရိုင် အမှတ် ၄ တပ်ရင်းက သတင်းထုတ်ပြန်ထားပါတယ်။

ဖေဖော်ဝါရီ ၁၉ ရက်နေ့လယ် ၂ နာရီကျော်မှာ ကျေးရွာဘုန်းကြီးကျောင်းအတွင်း အင်အား ၇၀ ခန့်နဲ့တပ်စွဲထားတဲ့ စစ်ကောင်စီတပ်ဖွဲ့ဝင်တွေကို ဒေသခံကာကွယ်ရေးတပ်ဖွဲ့ဝင်တွေက ဒရုန်းတွေနဲ့ ဗုံးချတိုက်ခိုက်ပြီးနောက် ညနေ ၃ နာရီမှာ အနီးကပ်သွားရောက်တိုက်ခိုက်ခဲ့ရာက နှစ်ဖက်တိုက်ပွဲ ပြင်းထန်ခဲ့တာလို့ဆိုပါတယ်။

"ဒရုန်း ၃ စီးနဲ့ ၆၀ မမဗုံးသီးတွေချပြီး တိုက်ခိုက်တယ်။ ၃ နာရီလောက်မှာမြေပြင်ကနေပြီးတော့ တချိန်တည်း လူအားနဲ့ထိုးစစ်ဆင်တယ်။ ကျောင်းထဲကို။ တိုက်ပွဲအချိန်ကတော့ ၂ နာရီလောက် ကြာတယ်။ အပြန်အလှန် ပစ်ခတ်မှုအပြင်းအထန် ဖြစ်တယ်။ သူတို့(စကစ)ဘက်ကလည်း ကျောင်း အုတ်ကာ ၂ ထပ်အဆောက်အဦကနေ သေချာနေရာယူပြီး ပြန်လည်ခုခံတယ်။ သူတို့မှာ စနိုက်ပါလည်း ပါတယ်။"လို့ သရက်ခရိုင်အမှတ် ၄ တပ်ရင်း ပြန်ကြားရေးတာဝန်ခံ ကိုမြတ်က ပြောပါတယ်။

တိုက်ပွဲဖြစ်ပွားနေချိန် ညနေ ၅ နာရီခန့်မှာ စစ်ကောင်စီဘက်က ဂျက်ဖိုက်တာ ၁ စီးနဲ့ တိုက်ပွဲဖြစ်တဲ့ နေရာကို ပေါင် ၅၀၀ ဗုံးသီး ၁ လုံးချခဲ့ရာ မြောက်ပြင်ရွာအပြင်ဘက်ကိုကျရောက်ပေါက်ကွဲပြီး ပွိုင့်ဖိုက်နဲ့ကျေးရွာထဲကို ပစ်ခတ်ခဲ့တယ်လို့ ဆိုပါတယ်။

တိုက်ပွဲအတွင်းမှာ စစ်ကောင်စီတပ်ဘက်က ပစ်ခတ်တဲ့ စနိုက်ပါကျည်ထိပြီး သရက်ခရိုင်အမှတ် ၄ တပ်ရင်းက အသက် ၁၉ နှစ်အရွယ် တပ်ဖွဲ့ဝင် သားငယ်နဲ့ နောက်ထပ်အဖွဲ့ဝင် ၂ ဦးဒဏ်ရာရပြီးနောက် ပြန်ဆုတ်လာစဉ်မှာ တပ်ဖွဲ့ဝင်သားငယ်ကတော့ လမ်းမှာပဲသေဆုံးခဲ့တယ်လို့ ကိုမြတ်ကပြောပါတယ်။ 

သေဆုံးခဲ့တဲ့တပ်ဖွဲ့ဝင်သားငယ်ကိုတော့ ဖေဖော်ဝါရီ ၂၀ ရက်မှာပဲ တပ်ရင်းရဲ့တနေရာမှာ သင်္ဂြိုဟ်ခဲ့တယ်လို့ ဆိုပါတယ်။

ဖေဖော်ဝါရီ ၂၀ ရက်ညနေပိုင်းမှာ ကျေးရွာထဲနယ်မြေရှင်းလင်းရေးလုပ်ချိန် စစ်ကောင်စီတပ်ဖွဲ့ဝင်တွေနေထိုင်ခဲ့တဲ့ ဘုန်းကြီးကျောင်းအတွင်းမှာ သွေးကွက်နဲ့ သွေးစွန်းနေတဲ့ ပတ်တီးစတွေတွေ့တာကြောင့် တိုက်ပွဲအတွင်း စစ်ကောင်စီတပ်ဖွဲ့ဝင်တွေဘက်ကလည်း ထိခိုက်သေဆုံးမှုများနိုင်တယ်လို့ ကိုမြတ်ကပြောပါတယ်။

စစ်ကောင်စီတပ်ဘက်က ဂျက်ဖိုက်တာနဲ့ဗုံးကြဲစဉ်မှာတော့ မြောက်ပြင်ကျေးရွာ လယ်တောတွေထဲမှာ စစ်ရှောင်နေတဲ့ တံစိုးတုံကျေးရွာက အသက် ၆၀ ကျော်အမျိုးသမီး ၁ ဦး ဗုံးစမှန်ဒဏ်ရာရခဲ့ပါတယ်။

ဖေဖော်ဝါရီ ၂၀ ရက်မနက်ပိုင်းမှာတော့ မြောက်ပြင်ကျေးရွာမှာတပ်စွဲထားတဲ့ စစ်ကြောင်းဟာ မင်းတုန်းမြို့ဝင်ရှိ စစ်ကောင်စီဂိတ်ကနေ လက်နက်ကြီးပစ်ကူယူပြီး မင်းတုန်းမြို့ဘက်ကို ပြန်ဆုတ်သွားတယ်လို့ သူကဆက်ပြောပါတယ်။

အဲ့ဒီစစ်ကြောင်းဟာ တပ်မ ၈၈၊ ကပစ ၁၂၊ ပြည်သူ့စစ် ပူးပေါင်းစစ်ကြောင်းဖြစ်ပြီး ဖေဖော်ဝါရီ ၁၈ ရက်ကတည်းက ကံမနိုင်ကျေးရွာဘက်ကနေ မြောက်ပြင်ကျေးရွာကို ရောက်ရှိတပ်စွဲနေထိုင်ခဲ့တာပါ။

စစ်ကောင်စီ စစ်ကြောင်းထိုးဝင်ရောက်လာတာကြောင့် ကံမနိုင်၊ မြောက်ပြင်၊ ရွာသစ်၊ တံစို့တုံ၊ ကြိုးဝကျေးရွာတွေက ဒေသခံအချို့ ဘေးလွတ်ရာမှာ တိမ်းရှောင်နေကြရပါတယ်။

ယခုထွက်ပြေးရတဲ့ ကျေးရွာတွေက ဒေသခံတွေဟာ ၂၀၂၅ နှစ်စပိုင်းလောက်ကတည်းက တိုက်ပွဲမကြာခဏဖြစ်နေလို့ ကျေးရွာထဲမှာ အတည်တကျမနေရဲကြဘဲ စစ်ဘေးရှောင်နေရသူများတယ်လို့ သိရပါတယ်။

ဒီတိုက်ပွဲကိုကူဖို့အတွက် သရက်အခြေစိုက် ကပစ ၁၂ ကနေ အင်းအား ၂၀ လိုက်ပါလာတဲ့ စစ်ကောင်စီဖောကား ၁ စီးကိုလည်း ဖေဖော်ဝါရီ ၁၉ ရက်ညနေ ၄ နာရီခွဲလောက်မှာ သရက်-မင်းတုန်းလမ်းပိုင်းရှိ အလယ်ချောင်းရဲစခန်းအနီး  ကြားဖြတ်တိုက်ခိုက်ခဲ့ပြီး ၈ ဦးသေဆုံးကာ အရာရှိ ၂ ဦးအပါ ၄ ဦးဒဏ်ရာရခဲ့တယ်လို့ USB Army - မကွေးတိုင်း ပကဖအထူးလှုပ်ရှားတပ်ဖွဲ့ဆီက သိရပါတယ်။

“ဒရိုင်ဘာကတော့ ကားစီယာတိုင်ပေါ်မှာ မှောက်ပြီးတော့ ကားခေါင်းထဲမှာ မလုပ်ပဲငြိမ်နေတဲ့ အနေအထားကို ပြည်သူတွေကတွေ့တာကနေတဆင့် ပြန်ပြောတာပါ။ အရာရှိ  ၂ ဦးကတော့ ရဲမဟုတ်ဘူး။ ဒီ စခ ထဲကပါပဲ။ ဘာအဆင့် ဘာရာထူး၊ ဘာနာမည်ဆိုတာတွေက သိတော့သိပြီးပေါ့နော် ဒါပေမဲ့ ကွန်ဖန်းလုပ်ဖို့ နည်းနည်းလိုနေသေးလို့ပါ၊ အရာရှိဆိုတာကတော့ သေချာတယ်။” လို့ USB Army - မကွေးတိုင်း ပကဖအထူးလှုပ်ရှားတပ်ဖွဲ့ ရဲ့တပ်ဖွဲ့ဝင်တဦးက ပြောပါတယ်။

သေဆုံးသွားတဲ့ အလောင်းတွေကို အရပ်သားကားတွေနဲ့ ကပစ ၁၂ ထဲကို သယ်ဆောင်သွားပြီး ဒဏ်ရာရတဲ့သူတွေကိုတော့ မင်းတုန်းဆေးရုံမှာ လုံခြုံရေးတွေချပြီး အရေးပေါ်ကုသနေတယ်လို့ ဆိုပါတယ်။ 

ဒါ့အပြင် ဖေဖော်ဝါရီ ၂၀ ရက် မနက် ၂ နာရီကျော်လောက်မှာလည်း ပုသိမ်-မုံရွာကားလမ်းပေါ်ရှိ မင်းတုန်းမြို့နယ်၊ ကျောက်တိုင်ဆေးရုံမှာ အင်အား ၅၀ ဝန်းကျင်နဲ့  ၅ လကြာ စခန်းချထားတဲ့ စစ်ကောင်စီတပ်စခန်းကို ကာကွယ်ရေးတပ်ဖွဲ့တွေက ဝင်ရောက်စီးနင်းတိုက်ခိုက်ခဲ့တယ်လို့ USB Army - မကွေးတိုင်း ပကဖအထူးလှုပ်ရှားတပ်ဖွဲ့ ရဲ့တပ်ဖွဲ့ဝင်တဦးက ပြောပါတယ်။ 

အပြန်အလှန်ပစ်ခတ်မှု မိနစ် ၄၀ ကြာဖြစ်ပွားခဲ့ပြီး ပစ်ခတ်မှုအတွင်း ရဲတပ်သား ၂ ဦးသေဆုံး၊ ၁၁ ဦး ဒဏ်ရာရခဲ့ကာ ပစ်ခတ်နေစဉ်မှာ ခဲယမ်းတွေမလုံလောက်တဲ့အတွက် စခန်းကိုသိမ်းဆည်းရရှိတာမျိုးတော့ မရှိခဲ့ဘူးလို့ ဆိုပါတယ်။

“ ၂ ယောက်ပဲ သေတယ်လို့ ကြားသိရတယ်။ အဲ့ဒါကတော့ မနက်မိုးလင်းမှပဲ Dead Body ကို အရပ်သားကားနဲ့ လာထုတ်သွားတာပါ။ သူတို့က ပြည်သူလူထုရဲ့ ကုန်သွယ်ရေးတွေကို ဖြတ်တောက်ပိတ်ဆို့ပြီး ပြည်သူလူထု ဒုက္ခပေးတာတွေ၊ စစ်ဆေးပြီးတော့မှဖမ်းဆီးတာတွေ၊ ရိုက်နှက်နှိပ်စက်တာတွေ၊ ငွေတောင်းတာတွေလုပ်တယ်။ နောက်ပြီး ပေါ်တာဆွဲတာတွေရောပေါ့။”လို့ USB Army (မကွေးတိုင်း ပကဖအထူးလှုပ်ရှားတပ်ဖွဲ့)ဝင်က ဆက်ပြောပါတယ်။

တိုက်ခိုက်မှုကို မကွေးတိုင်းပကဖ အထူးလှုပ်ရှားတပ် USB Army မှဦးဆောင်ကာ မင်းတုန်းမြို့နယ် ပကဖ၊ အထက်မင်းလှမြို့နယ် ပကဖတို့နဲ့ ပူးပေါင်းတိုက်ခိုက်ခဲ့ကြတာ ဖြစ်ပါတယ်။ 

လက်ရှိ ကျောက်တိုင်ဆေးရုံမှာ ဘန်ကာတွေပြင်ဆင်ထားကာ ခံစစ်တွေကိုသေချာပြင်ဆင်ထားပြီး ရှေ့မှာထွက်စစ်တဲ့ဂိတ်မှာ ၂ ယောက်လောက်နဲ့သာ အစစ်ပြပေမယ့် အတွင်းထဲမှာတော့ ပြင်ဆင်မှုတွေပြုလုပ်နေတယ်လို့ဆိုပါတယ်။ 

နိုဝင်ဘာ ၂၆ ရက်ကလည်း မင်းတုန်းမြို့နယ်၊ ကြိုးဝရွာအပြင်ဘက်မှာ စစ်ကောင်စီစစ်ကြောင်း တိုက်ခိုက်ခံရပြီး ၂၀ ကျော်သေဆုံးကာ လက်နက်တွေကို တော်လှန်ရေးအဖွဲ့တွေဘက်က သိမ်းဆည်းရမိ ခဲ့တယ်လို့ သိရပါတယ်။

စာတည်း - လင်း 

#မြေလတ်အသံ

#မကွေး #မင်းတုန်း #မြောက်ပြင် #တိုက်ပွဲ #နှစ်ဖက်သေဆုံး