ပြည်နဲ့အောင်လံအစပ်မှာ တိုက်ပွဲဖြစ်၊ စစ်တပ်က တောနင်းရှာနေလို့ စစ်ရေးတင်းမာနေ

မကွေးတိုင်း၊အောင်လံမြို့နယ်နဲ့ ပဲခူးတိုင်း၊ ပြည်မြို့နယ်အစပ် ဝက်ထီးကန်မြို့၊ ကံကြီးကုန်းကျေးရွာအုပ်စု၊ ဝိုင်းချောင်းကျေးရွာအနီးမှာ စစ်ကောင်စီတပ်နဲ့ တော်လှန်ရေးတပ်တွေအကြား တိုက်ပွဲတွေဖြစ်ပွားခဲ့ပြီး နှစ်ဖက်ထိခိုက်မှုရှိခဲ့တယ်လို့ ဒေသခံတွေနဲ့ ဒေသတွင်းတော်လှန်ရေးအဖွဲ့ဝင်တွေထံက သိရပါတယ်။

ဩဂုတ် ၂၂ ရက် နေ့လယ်ပိုင်းမှာ စစ်ကောင်စီတပ်၊ ရဲနဲ့ ပျူစောထီးပူးပေါင်းအင်အား ၁၀၀ ကျော်ပါတဲ့ယာဉ်တန်းကို တော်လှန်ရေးအဖွဲ့တွေဘက်က မိုင်းဆွဲတိုက်ခိုက်ခဲ့ရာမှစတင်ပြီး နှစ်ဖက်အပြန်အလှန် ထိတွေ့တိုက်ပွဲဖြစ်ပွားခဲ့တာလို့ ဆိုပါတယ်။

" စကစကား တက်လာတာကို မိုင်းဆွဲပြီး ချောင်းပစ်တာ။ စကစဘက်ကလည်း အင်အားများတော့ သူ့ဘက် ကိုယ့်ဘက် ထိကုန်တာ။ အကျဆုံးတွေလည်း ရှိတယ်။” လို့ ပြည်ခရိုင်တော်လှန်ရေးအဖွဲ့ဝင်တဦးက မြေလတ်အသံကို ပြောပါတယ်။

ဝက်ထီးကန်နယ် ဒေသခံတဦးကတော့ အဆိုပါတိုက်ပွဲမှာ နေ့လယ် ၂ နာရီကနေ ညနေ ၆ နာရီခန့်အထိ ဖြစ်ပွားခဲ့တာဖြစ်ပြီး တိုက်ပွဲဖြစ်ပွားနေချိန်မှာပဲ စစ်ကောင်စီတပ်က စစ်ကား ၁၀ စီးခန့်နဲ့ စစ်ကူရောက်ရှိလာတယ်လို့ ဆိုပါတယ်။

“ အောင်လံ နဲ့ ပြည်ခရိုင် ဝက်ထီးကန်နဲ့ အစပ်နေရာ စကားတောင်ကြောအဆက်အစပ်မှာ ပထမဆုံး တိုက်ပွဲကြီးဖြစ်တာ။ ညဘက်ထိ တိုက်ပွဲတွေ ဆက်ဖြစ်တယ်။ သေဆုံးတာက ဝက်ထီးကန်ရဲစခန်းက သက်နိုင်စိုး လို့သိရတယ်။ ရာထူးတော့မသိရဘူး” လို့ ၎င်းက ပြောပါတယ်။

စစ်ကောင်စီကိုထောက်ခံရေးသားနေတဲ့ တယ်လီဂရမ်ချန်နယ်တွေမှာတော့ အဆိုပါတိုက်ပွဲမှာ PDF ၃ ဦးသေဆုံး၊ ၁ ဦး ဖမ်းဆီးရမိထားကာ သေနတ် ၂ လက်သိမ်းဆည်းရမိထားတယ်လို့ ရေးသားဖော်ပြထားပါတယ်။

တိုက်ပွဲအတွင်း နှစ်ဖက်ထိခိုက်သေဆုံးတာတွေနဲ့ပတ်သက်ပြီး သီးခြားအတည်မပြုနိုင်သေးဘဲ တော်လှန်ရေးအင်အားစုတွေဘက်က ထုတ်ပြန်တာမျိုးမရှိသေးသလို မြေလတ်အသံအနေနဲ့ ဆက်လက်စုံစမ်းနေပါတယ်။

လက်ရှိမှာ စစ်ကောင်စီတပ်စစ်ကြောင်းက အင်အားထပ်မံဖြည့်တင်းကာ ဝိုင်းချောင်းရွာနဲ့ ကံကြီးကုန်းရွာဝန်းကျင်ကို တောနင်းရှာဖွေတာတွေလုပ်ဆောင်နေလို့ ဒေသတွင်းစစ်ရေးတင်းမာနေတယ်လို့ သိရပါတယ်။

ဝက်ထီးကန်မြို့ဟာ ပြည်မြို့နယ်အတွင်းတည်ရှိတာဖြစ်ပြီး ပြည်မြို့မှာ ဒေသကွပ်ကဲမှုစစ်ဌာနချုပ် (ဒကစ) အခြေစိုက်ထားသလို ပြည်မြို့တဖက်ကမ်း ပန်းတောင်နယ်ထဲမှာလည်း ကပစစက်ရုံအများအပြားတည်ရှိကာ ဝက်ထီးကန်မြို့မှာလည်း ရဲလေ့ကျင့်ရေးသင်တန်းကျောင်းတခု အခြေစိုက်ထားတာလည်းဖြစ်ပါတယ်။

ပုံစာ - ပြည်ခရိုင် ၃၆၀၂ တပ်ရင်း PDF ရဲဘော်များ စစ်ကြောင်းထွက်စဉ် (ပုံဟောင်း)။

စာတည်း - ဟိန်းစံ

#မြေလတ်အသံ

#မကွေး #အောင်လံ #ပြည် #တိုက်ပွဲ #စစ်ရေးတင်းမာ