ဘုတလင်မှာ ဒေသခံ ၇၀ ကျော် ဓားစာခံအဖြစ် ဖမ်းဆီးခံရ

စစ်ကိုင်းတိုင်း၊ ဘုတလင်မြို့နယ်ရှိကျေးရွာတွေမှာ ကြက်သွန်စိုက်နေတဲ့ ဒေသခံပြည်သူ ၇၀ ကျော်ကို စစ်ကောင်စီတပ်သားတွေက ဒီဇင်ဘာ ၂၅ ရက်ဒီနေ့မနက် ၅ နာရီလောက်မှာ ဓားစာခံအဖြစ် ဖမ်းဆီးသွားတယ်လို့ ဘုတလင်နယ်ခံအမျိုးသမီးတဦးက ပြောပါတယ်။ 

မုံရွာအခြေစိုက် အနောက်မြောက်တိုင်းစစ်ဌာနချုပ် နမခ ကနေ အင်အား ၈၀ ဝန်းကျင်ပါ စစ်ကောင်စီစစ်ကြောင်းက ဇီးတော၊ ကံသစ်၊ ရွှေချောင်းလည်၊ သရက်တို၊ မွန်တော၊ မောင်းထောင် စတဲ့ ကျေးရွာတွေက ဒေသခံတွေကိုဖမ်းဆီသွားတာလို့ ဆိုပါတယ်။ 

“ဒီဘက်က ကြက်သွန်ရာသီဖြစ်နေတာလေ။ ကြက်သွန်ရာသီဆိုတော့ ဒီလမ်းမှာတွေ့သမျှ ကြက်သွန် စိုက်ခင်းကလူတွေကို ဖမ်းခေါ်သွားတယ်။ ဒီဘက်က ဧကပြတ်တွေစိုက်တဲ့အခါကျတော့ မနက် အစောကြီးသွားကြတယ်။ အဲ့လိုသွားပြီးတော့ ညဆိုလည်း မိုးချုပ်အထိစိုက်ကြတယ်လေ၊ နေ့စားမဟုတ်တဲ့အခါကျတော့ မနက်အစောကြီးသွားကြတယ်။ အဲ့အချိန်မှာ ဖမ်းခံရတယ်လို့ ယူဆတယ်။” လို့ သူကဆိုပါတယ်။

အထက်ပါကျေးရွာမှာနေထိုင်တဲ့ဒေသခံတွေလည်း ထွက်ပြေးတိမ်းရှောင်နေကြတဲ့အတွက် စစ်ကောင်စီ တပ်သားတွေရဲ့ ဖမ်းဆီးခြင်းခံထားရသူတွေဟာ ဘယ်သူဘယ်ဝါဖြစ်တယ်ဆိုတာ အတိအကျပြောလို့ မရသေးဘဲ ဖမ်းဆီးခံရသူတွေထဲမှာ အမျိုးသမီးတွေအများဆုံးပါနိုင်တယ်လို့ ဆိုပါတယ်။  

“ဖမ်းခံရတဲ့အထဲမှာ အမျိုးသမီးတွေပဲ များမယ်။ ဘာလို့လဲဆိုလဲတော့ ကြက်သွန်ဘောက်စိုက်က အမျိုးသမီးတွေပဲ။ အမျိုးသားတွေတော့ ပါကောင်းပါနိုင်တယ်။ (ကြက်သွန်)ဘောက်စိုက်တဲ့သူတွေကို လိုက်ပြီးတော့ ထမင်းပို့တဲ့သူ ဒါမှမဟုတ် အခင်းပိုင်ရှင်တွေတော့ ပါကောင်းပါနိုင်တယ်။ ဒါပေမဲ့ အများစုအဖမ်းခံရတော့ အမျိုးသမီးတွေပဲ။” လို့  ဘုတလင်နယ်ခံအမျိုးသမီးက ပြောပါတယ်။

စစ်ကောင်စီစစ်ကြောင်းဟာ ဓားစားခံအဖြစ်ဖမ်းဆီးထားသူတွေနဲ့အတူထွက်လာချိန် ညောင်ပင်ကန်ရွာနဲ့ ကံသစ်ရွာကြားအရောက်မှာ ကာကွယ်ရေးအဖွဲ့တွေက မိုင်းဆွဲတိုက်ခိုက်ခဲ့ပြီး ထိခိုက်သေဆုံးမှု ရှိနိုင်တယ်လို့ ဘုတလင်မြို့နယ် ပြည်သူ့အသံသတင်းတာဝန်ခံ ကပြောပါတယ်။

“မိုင်းဆွဲခံရတာ **တွေတော်တော်ထိတယ်။ မိုင်းဆွဲခံရပြီးတော့ သူတို့လက်နက်ငယ်တွေနဲ့ ရမ်းသမ်းပစ်တာမျိုးပဲရှိတယ်။ ထိတွေ့ပစ်တာမျိုးတော့ မရှိဘူး။ အခုလောလောဆယ်တော့ ဖမ်းဆီးခံထားတဲ့သူတွေနဲ့ သူတို့တွေက ညောင်ပင်ကန်ရွာအနီးတဝိုက်မှာ ရှိနေတုန်းပဲ။” လို့ သူကပြောပါတယ်။ 

စစ်ကောင်စီရဲ့စစ်ကြောင်းထိုးမှုတွေငြိမ်သက်နေတဲ့ ဘုတလင်မြို့နယ်အတွင်း ဒီမနက်မှာ ပြန်လည်စစ်ကြောင်းထိုးလာတဲ့အတွက် ရွှေချောင်းလည်၊ ဇီးတော၊ ကံသစ်၊ ညောင်ပင်ကန်၊ သရက်တို၊ ဆုန်ကုန်း၊ ကျီးပင်ချောင်း၊ သားရိုးကုန်း၊ မွန်တော၊ မောင်ထောင်  စတဲ့ကျေးရွာတွေက ဒေသခံတွေ ထွက်ပြေးတိမ်းရှောင်နေရပါတယ်။ 

ပြီးခဲ့တဲ့ နိုဝင်ဘာ ၇ ရက်ကလည်း ဘုတလင်မြို့နယ်၊ သားဖန်းရွာကို စစ်ကောင်စီက မီးရှို့ခဲ့တာကြောင့် နေအိမ် ၃၂ လုံး မီးလောင်ပျက်စီးခဲ့ပါသေးတယ်။

စာတည်း - လင်း 

#မြေလတ်အသံ

#စစ်ကိုင်း #ဘုတလင် #ဒေသခံ #ဖမ်းဆီးခံရ