မြင်းခြံက တကျော့ပြန် ၄ ရက်တာတိုက်ပွဲ စစ်ကောင်စီဘက် သေဆုံးသူများခဲ့ (ရုပ်/သံ)

မန္တလေးတိုင်း၊ မြင်းခြံမြို့ တောင်ဘက် ၄ မိုင်ခန့်အကွာရှိ ကူရွာ၊ ကွမ်းစိုက်ရွာနဲ့ ခြေဆေးရွာအနီးမှာ စစ်သား၊ ရဲနဲ့ ပျူစောထီး အင်အား ၆၀၀ ဝန်းကျင်ပါ စစ်ကြောင်းနဲ့ ၄ရက်ဆက်တိုက် တိုက်ပွဲဖြစ်ပွားခဲ့တယ်လို့ Myingyan Black Tiger - MBT မြင်းခြံခရိုင်တပ်ရင်း - ၉ ဆီက သိရပါတယ်။

နိုဝင်ဘာ ၁၅ ရက် ည ၈ နာရီခွဲ ဝန်းကျင်ကစပြီး စစ်ကောင်စီစစ်ကြောင်းနဲ့ ခြေဆေးကျေးရွာ၊ ကူရွာနဲ့ ကွမ်းစိုက်ရွာအနီးမှာ ၄ ရက်ဆက်တိုက် တိုက်ပွဲဖြစ်ခဲ့တာလို့ Myingyan Black Tiger - MBT မြင်းခြံခရိုင်တပ်ရင်း - ၉ ခေါင်းဆောင်ဗိုလ်မိုက်ခဲက ပြောပါတယ်။

တိုက်ပွဲ ၄ ရက်အတွင်း စစ်ကောင်စီဘက်က Mi 35နဲ့ ၃ ကြိမ်၊ ဂျက်ဖိုက်တာနဲ့ ၁ ကြိမ်၊ လေကြောင်းနဲ့ တိုက်ခိုက်ရာမှာ အချင်းချင်း မှားကြဲမိတဲ့အတွက် စစ်ကောင်စီဘက်က ထိခိုက်သေဆုံးတာကို သိခဲ့ရတယ်လို့ Myingyan Black Tiger - MBT မြင်းခြံခရိုင်တပ်ရင်း - ၉ ခေါင်းဆောင်ဗိုလ်မိုက်ခဲက ပြောပါတယ်။

စစ်ကောင်စီဘက်က လေကြောင်းတိုက်ခိုက်မှုအပြင် ဟောင်ဝှစ်ဇာ လက်နက်ကြီးပစ်ကူ၊ ဒရုန်းနဲ့ပစ်ကူတွေ ဆက်တိုက်လုပ်လာတာကြောင့် တိုက်ပွဲကနေ ဆုတ်ခွာခဲ့ရတယ်လို့လည်း ဗိုလ်မိုက်ခဲက ဆက်ပြောပါတယ်။

အဆိုပါ ၄ ရက်တာ တိုက်ပွဲအတွင်း စစ်ကောင်စီဘက်က ၂၁ ဦး သေဆုံးကာ ထိခိုက်ဒဏ်ရာရသူတွေလည်းရှိပြီး ဒီနေ့အထိ စစ်ရေးတင်းမာနေဆဲဖြစ်တယ်လို့လည်း ဆိုပါတယ်။

အဆိုပါ အင်အား ၆၀၀ ပါစစ်ကြောင်းမှာ တပ်မ ၉၉ လက်အောက်ခံ မြင်းခြံ ခြေမြန်တပ်ရင်းအပြင် မိတ္ထီလာက စစ်​သားတွေနဲ့ မြင်းခြံမြို့နယ်က သီတာယုမွန်ဦးဆောင်တဲ့ ပျူစောထီးတွေ ပါဝင်တယ်လို့ သိရပါတယ်။

အဲဒီစစ်ကြောင်းဟာ နိုဝင်ဘာ ၁၁ ရက်နေ့ကနေ ၁၃ ရက်နေ့အထိ မြင်းခြံမြို့နယ်၊ ကွမ်းစိုက်ကျေးရွာအနီးမှာ MBT နဲ့ မဟာမိတ်တပ်တွေက ၃ ရက်ဆက် တိုက်ခိုက်ခဲ့လို့ ၁၅ ဦး သေဆုံးခဲ့တဲ့ စစ်ကြောင်းဖြစ်တယ်လို့လည်း သိရပါတယ်။

အခုတိုက်ခိုက်မှုကို Myingyan Black Tiger-MBT မြင်းခြံခရိုင်တပ်ရင်း - ၉၊ Popa Guerilla Force (PGF)၊ မြင်းခြံခရိုင် တပ်ရင်း (၁၊ ၂၊ ၃၊ ၄၊ ၇၊ ၈)၊မြင်းခြံခရိုင် ပကဖ၊ နွားထိုးကြီးမြို့နယ် ပကဖ၊ အမှတ် (၈၁၅) ပြည်သူ့လွတ်မြောက်ရေးတပ်မတော် (PLA)၊ မြင်းခြံခရိုင် ဒရုန်းတပ်ဖွဲ့၊ စွန်ရဲပြောက်ကျားတပ်၊ SPY ပြောက်ကျားတပ်၊ နှလုံးလှ လူမိုက်တပ်ဖွဲ့တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

တည်းဖြတ် - HP

#မြေလတ်အသံ

#မန္တလေး #မြင်းခြံ #တိုက်ပွဲ #စစ်ကောင်စီ #သေဆုံး