မြင်းခြံမြို့၊ ကုကဲရဲစခန်း ဒရုန်းဗုံးနဲ့ တိုက်ခိုက်ခံရပြီး ၃ ဦးသေ၊ ၆ ဦးဒဏ်ရာရ

မန္တလေးတိုင်းဒေသကြီး၊ မြင်းခြံမြို့နယ်၊ ကုကဲကျေးရွာအနီးရှိ ကုကဲရဲစခန်းကို တော်လှန်ရေးတပ်ဖွဲ့တွေက ဒရုန်းဗုံးနဲ့ တိုက်ခိုက်ခဲ့လို့ ၃ ဦးသေဆုံးပြီး ၆ ဦးဒဏ်ရာရခဲ့တယ်လို့ ဒေါင်းမင်းတမန်အထူးပြောက်ကျားတပ်ဖွဲ့ထံက သိရပါတယ်။

ဖေဖော်ဝါရီ ၁၃ ရက် မနက် ၁၀ နာရီခန့်မှာ ရဲ၊ စကစ၊ ပျူ အင်အား ၃၀ ခန့်ရှိနေတဲ့ ကုကဲရဲစခန်းကို ဒရုန်းဗုံး ၃ လုံးချ တိုက်ခိုက်ခဲ့တယ်လို့ဆိုပါတယ်။

"အရင်ဆုံးတလုံးချတာ စခန်းအရှေ့ဘန်ကာထဲကို ကျတာ။ နောက်နှစ်လုံးက စခန်းထဲကိုကျတာ။ အချုပ်ထောင် နားက ပျူတွေနဲ့စကစတွေ ထိခိုက်တယ်၊ ဘန်ကာထဲက ရဲတွေလည်းထိတယ်။ ပြေးတဲ့သူတွေလည်း ပြေးကြတယ်" လို့  ဒေါင်းမင်းတမန်အထူးပြောက်ကျားတပ်ဖွဲ့ တာဝန်ရှိသူက ပြောပါတယ်။

ဒရုန်းဗုံးချတိုက်ခိုက်မှုမှာ စစ်ကောင်စီ၊ ပျူစောထီးနဲ့ ရဲ ၃ ဦးသေဆုံးပြီး ၆ ဦးဒဏ်ရာရခဲ့တယ်လို့ ဆိုပါတယ်။

ဗုံးချတိုက်ခိုက်ခံရပြီးနောက် PDF တွေရှိမယ်ထင်တဲ့ ကုကဲကျေးရွာထဲကို ရဲစခန်းအတွင်းက စစ်ကောင်စီဘက်က ၄၀ မမအပါအဝင် လက်နက်ကြီးတွေနဲ့ ပစ်ခတ်ခဲ့ရာ ကျေးရွာထဲပေါက်ကွဲပြီး နွား ၄ ကောင်သေဆုံးခဲ့တယ်လို့ သိရပါတယ်။ 

အဲဒီတိုက်ခိုက်မှုကို MGN ဒေါင်းမင်းတမာန်အထူးပြောက်ကျားတပ်ဖွဲ့၊ ဒေါင်းနီပြောက်ကျားတပ်ဖွဲ့၊ မြင်းခြံခရိုင် တပ်ရင်း 27၊ မြင်းခြံမြို့နယ် ပကဖတို့မှ ပူးပေါင်းတိုက်ခိုက်ခဲ့တာပါ။

ဖေဖော်ဝါရီ ၁၀ ရက်ကလည်း မြင်းခြံမြို့နယ်၊ မြင်းခြံ-နဘူးအိုင်လမ်းပိုင်း သစ်ရုံးကျေးရွာနဲ့တူရွင်းဘိုကျေးရွာကြားမှာ စစ်ကောင်စီကားတန်း မိုင်း ၁၂ လုံးဆွဲတိုက်ခိုက်ခံရလို့ ၄ ဦးထက်မနည်းသေဆုံးခဲ့တယ်လို့ သိရပါတယ်။

စာတည်း - လင်းဇေ

#မြေလတ်အသံ

#မန္တလေးတိုင်း #မြင်းခြံမြို့ #ကုကဲကျေးရွာ #ကုကဲရဲစခန်း #ဒရုန်း