မြင်းမူတိုက်ခိုက်မှုအတွင်း ပျက်စီးသွားတဲ့စစ်ကောင်စီကားတစီးကို PDF သိမ်းဆည်းခဲ့

စစ်ကိုင်တိုင်း၊ မြင်းမူမြို့အဝင်မှာ စစ်ကောင်စီတပ်သားတွေနဲ့ ဒေသခံကာကွယ်ရေးတပ်တို့ ပစ်ခတ်မှုဖြစ်ပြီးနောက် ကျန်ခဲ့တဲ့စစ်ကောင်စီကားတစီးကို သိမ်းဆည်းနိုင်ခဲ့တယ်လို့ Dog Killers People's Defence Force Myinmu အဖွဲ့ဆီက သိရပါတယ်။ 

ပစ်ခတ်မှုဖြစ်ခဲ့တဲ့နေရာအနီးမှာ ကျန်ခဲ့တဲ့ စစ်ကောင်စီရဲ့ Nissan Minibus အမျိုးအစားကားကို သြဂုတ် ၁၀ ရက် နေ့လယ် ၂ နာရီလောက်မှာ သွားရောက်သိမ်းဆည်းခဲ့တာလို့ ဆိုပါတယ်။ 

“သွားသိမ်းတာ ပစ်ခတ်မှုဖြစ်တဲ့နေရာနဲ့ သိပ်မဝေးဘူး။ ပစ်ခတ်တဲ့နေရာမှာပဲ ကားကိုထိုးထားခဲ့တာမလို့ အဲ့ဒါကို ကျနော်တို့သွားသိမ်းတာ။” လို့ Dog Killers People's Defence Force Myinmu မှ ရဲဘော်မောင်ကာ က ပြောပါတယ်။

ဒီကားဟာ ပြည်သူတွေဆီကနေ အဓမ္မယူဆောင်လာတဲ့ကား ဖြစ်နိုင်တယ်လို့ခန့်မှန်းနေကြပြီး တပ်ဖွဲ့မှာ ပြန်လည်အသုံးပြုနိုင်ဖို့အတွက်လည်း ပြန်လည်ပြင်ဆင်ဖို့လိုအပ်နေသေးတယ်လို့ ဆိုပါတယ်။ 

“ကားကတော့ ပြန်သုံးလို့ရမှာပါ။ ကျနော်တို့ အဲ့ဒီကားကိုပြင်ဖို့အတွက်ကျ ငွေအလုံအလောက်မရှိဘူး။ ဒီကောင်တွေ ကြည့်ရပုံကတော့ ပြည်သူတွေရဲ့ကားကို ချောဆွဲပြီးမှ မောင်းယူလာတာဖြစ်မယ်။ သူတို့ကားဆို အဲ့လိုဖြစ်ရင် ပြန်ဆွဲသွားတာများတယ်။” လို့ ရဲဘော်မောင်ကာ က ပြောပါတယ်။ 

သြဂုတ် ၉ ရက် မနက် ၁၀ နာရီ ၅၅ မိနစ်လောက်မှာ မုံရွာဘက်ကနေ စစ်မှုထမ်းသင်တန်းဆင်းနဲ့ စစ်သားအင်အား ၆၀ ဦးလောက်လိုက်ပါလာတဲ့ ကား ၄ စီးကို မြင်းမူမြို့နယ်၊ တန်ပိုတိုးဂိတ်အနီးမှာ ဒေသခံကာကွယ်ရေးတပ်တွေက တိုက်ခိုက်ခဲ့တာကြောင့် စစ်ကောင်စီဘက်က ထိခိုက်ပျက်စီးမှုတွေရှိခဲ့တာပါ။ 

ဒီပစ်ခတ်တိုက်ခိုက်မှုကို Dog Killers People's Defence Force Myinmu (DK-PDF MMU)နဲ့ Moe Nyo Revolution Force MNRF တို့က ပူးပေါင်းလုပ်ဆောင်ခဲ့ကြတာဖြစ်ပြီး တိုက်ခိုက်မှုအတွင်း အထက်ပါ သိမ်းဆည်းခဲ့တဲ့ကားလည်း တိမ်းမှောက်ခဲ့သလို စစ်ကောင်စီတပ်သား ၁၈ ဦးခန့်သေဆုံးခဲ့တယ်လို့ ရဲဘော်မောင်ကာက အတည်ပြုဖြေဆိုထားပါတယ်။ 

စာတည်း - လင်း 

#မြေလတ်အသံ

#စစ်ကိုင်း #မြင်းမူ #စစ်ကောင်စီ #ကားတိမ်းမှောက် #သိမ်းဆည်း #တိုက်ပွဲ