ရမည်းသင်း ရေကြီးမှုမှာ လူ ၁၀ ဦးထိ သေဆုံးမှုရှိလာ

မန္တလေးတိုင်း၊ ရမည်းသင်းမြို့နယ်က ကျေးရွာတွေမှာ စက်တင်ဘာ ၁၀ ရက်ကစတင်ကာ မိုးများ၊ ရေကြီးခဲ့ပြီး ဒေသခံ ၁၀ ဦးလည်း သေဆုံးခဲ့တယ်လို့ စက်တင်ဘာ ၁၁ ရက်မှာ မြန်မာနိုင်ငံမီးသတ်ဦးစီးဌာနက ထုတ်ပြန်ထားပါတယ်။ 

ရမည်းသင်းမြို့နယ်၊ ဆည်ကြီးကျေးရွာအုပ်စု၊ ဆည်ကြီးကျေးရွာက အမျိုးသား ၁ ဦး၊ ညောင်အိုင်ကျေးရွာက အမျိုးသမီး ၁ ဦး၊ မြင်းနားကျေးရွာအုပ်စု၊ ကံသာအေးကျေးရွာက အမျိုးသား ၂ ဦးနဲ့ အမျိုးသမီး ၄ ဦး၊ ရွှေနန်းပေါ်ကျေးရွာက အမျိုးသမီး ၁ ဦး၊ ဝါးဖြူတောင်ကျေးရွာအုပ်စု၊ ချောင်းဖျားကျေးရွာက အမျိုးသမီး ၁ ဦး စုစုပေါင်း ၁၀ ဦးသေဆုံးခဲ့တာပါ။  

ဒါ့အပြင် အိမ်ထောင်စု ၁ သောင်းခွဲကျော် (၁၅၁၁၃)၊ စုစုပေါင်း လူဦးရေ ၅ သောင်းကျော် (၅၃၉၇၂) ရေဘေးသင့်နေပြီး သူတို့ကိုတော့ ရမည်းသင့်မြို့ပေါ်ရှိ သီလဝခန်းမ၊ သာသနာ့ဗိမာန်၊ ဘုန်းကြီးကျောင်း၊ ရွာတန်းခန်းမ၊ ကိုးခန်းကြီးဓမ္မာရုံ၊ ရန်ကြီးအောင်ကျောင်းတို့မှာ ရေဘေးကယ်ဆယ်ရေးစခန်းဖွင့်ပြီး ကူညီကယ်ဆယ်ရေးတွေလုပ်နေတယ်လို့ ဆိုထားပါတယ်။ 

#မြေလတ်အသံ

#မန္တလေး #ရမည်းသင်း #ရေကြီးရေလျှံ #သေဆုံး