ရေစကြိုမှာတိုက်ပွဲပြီးလို့ နယ်မြေရှင်းလင်းချိန် ခဲယမ်းပစ္စည်းတွေရရှိ

မကွေးတိုင်း၊ ရေစကြိုမြို့နယ်၊ ကိုရင့်ရွာနဲ့ ကိုရင့်ကျွန်းရွာအကြားမှာ စစ်ကောင်စီအဖွဲ့နဲ့ ဒေသခံ ကာကွယ်ရေးတပ်ဖွဲ့ဝင်တို့ တိုက်ပွဲဖြစ်ပြီး စစ်ကောင်စီဘက်က ထိခိုက်သေဆုံးမှုတွေရှိခဲ့ကာ ခဲယမ်းနဲ့ ဆက်စပ်ပစ္စည်းတွေလည်း သိမ်းဆည်းရရှိခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။ 

ရေစကြိုမြို့နယ်၊ ဟင်္သာကျေးရွာကထွက်လာတဲ့ စစ်သားနဲ့ပျူစောထီး အင်အား ၆၀ လောက်နဲ့ ဒေသခံ ကာကွယ်ရေးတပ်ဖွဲ့တွေ ဇူလိုင် ၃၀ ရက် မနက် ၈ နာရီခွဲလောက်ကစပြီး တိုက်ခိုက်ခဲ့ကြတာလို့ ဆိုပါတယ်။ 

“အကွာအဝေးက မီတာ ၂၀၀၊ မီတာ ၃၀၀ လောက်ကနေ အဲ့ဒီစစ်ကြောင်းသွားတဲ့နောက်ကို တောက်လျှောက်လိုက်ပစ်ခဲ့တာ။ ပစ်ခတ်တိုက်ခိုက်ချိန်က ၃ နာရီလောက် ကြာတယ်။ ၄ ကောင်ကတော့ သေဆုံးတယ်။” လို့ ရေစကြိုပကဖ သတင်းနဲ့ပြန်ကြားရေးတာဝန်ခံက ပြောပါတယ်။ 

တိုက်ခိုက်မှုအတွင်း စစ်ကောင်စီဘက်က ၄ ဦး သေဆုံးခဲ့တယ်လို့ ပြောပေမယ့် ဒီသေဆုံးမှုနဲ့ ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။ 

ပစ်ခတ်မှုတွေပြီးလို့ စစ်ကောင်စီတပ်သားတွေ ဟင်္သာရွာကိုပြန်ဆုတ်ခွာသွားချိန်မှာ တိုက်ပွဲဖြစ်တဲ့ နေရာကို ဒေသခံကာကွယ်ရေးတပ်ဖွဲ့တွေ နယ်မြေရှင်းလင်းရေးဝင်လုပ်ချိန် လက်နက်ခဲယမ်းတွေနဲ့ သွေးကွက်တွေကိုတွေ့ခဲ့ရတယ်လို့ ဆိုပါတယ်။ 

ကာဘိုင်ကျည် ၂၀၀ တောင့်၊ ကာဘိုင်ကျည်‌ဘောက် ၂ ခု၊ ၄၀ မမ ဗုံးသီး ၁ လုံး၊ G3 ကျည်ဘောက် ၁ ခု၊ AK ကျည်ဘောက် ၂ ခုနဲ့ ၇.၆၂ မမ ကျည် ၂၀ တောင့်တို့ကို သိမ်းဆည်းရမိခဲ့တယ်လို့ အထက်ပါသတင်းနဲ့ပြန်ကြားရေးတာဝန်ခံက ပြောပါတယ်။ 

ပြီးခဲ့တဲ့ ဇူလိုင် ၂၆ ရက်ကလည်း ရေစကြိုမြို့နယ် ခလရ ၂၅၈ တပ်ရင်းက စစ်ဆေးရေးဂိတ်ကို ရေစကြိုပကဖ က မိနစ် ၂၀ ကြာပစ်ခတ်တိုက်ခိုက်ခဲ့ပါသေးတယ်။ 

စာတည်း - လင်း 

#မြေလတ်အသံ

#မကွေး #ရေစကြို #တိုက်ပွဲ #ခဲယမ်း #သတင်း