ရေနံချောင်း၊ အုတ်ရှစ်ကုန်းရွာက အမျိုးသား ၂၀ ခန့်ကို စစ်တပ်က ဖမ်းဆီးခေါ်ဆောင်

မကွေးတိုင်း၊ ရေနံချောင်းမြို့နယ်၊ အုတ်ရှစ်ကုန်းရွာကို စစ်ကောင်စီစစ်ကြောင်းက အင်အားအများအပြားနဲ့ ပိတ်ဆို့ပြီး ရွာသား ၂၀ ခန့်ကို ဖမ်းဆီးစစ်ဆေးမှုတွေပြုလုပ်ခဲ့တယ်လို့ ဒေသခံတွေက ပြောပါတယ်။

အောက်တိုဘာ ၁၅ ရက် နံနက်အစောပိုင်းက ရေနံချောင်းမြို့ အရှေ့ဘက် ၄ မိုင်အကွာခန့်မှာရှိတဲ့ အုတ်ရှစ်ကုန်းရွာကို စစ်ကောင်စီတပ်သားအင်အား ၅၀ ခန့်ဟာ တောလမ်းအတိုင်းဝင်ရောက်လာကာ ရွာကိုဝိုင်းပတ်ပိတ်ဆို့ပြီး ဒေသခံတွေထဲက အမျိုးသားတွေကို မျက်နှာအဝတ်နဲ့စည်းပြီး ဖမ်းဆီးစစ်မေးတာတွေ ပြုလုပ်ခဲ့တယ်လို့ အနီးဝန်းကျင်ရွာတွေကနေ သိရပါတယ်။

"မနေ့ကဆို သူတို့ဝင်လာပြီကတည်းက မျက်နှာအဝတ်စည်းပြီး ဖမ်းထားတာ ညက ရေနံချောင်းမြို့ပေါ်က ၈ ယောက် ခေါ်သွားတယ်။ ရွာထဲမှာ ဆက်ဖမ်းထားတာက ၁၀ ကျော်တယ်။ နာမည်တပ်ပြောပြီး ရှာခိုင်းတာ လည်းရှိတယ်။ ရွာတိုက်ပွဲဖြစ်နေတဲ့နေရာလည်း မဟုတ်ဘူး။" လို့ ဒေသခံ ၁ ဦးက ပြောပါတယ်။

ဒီနေ့အောက်တိုဘာ ၁၆ ရက်အထိ ရွာကို ပိတ်ဆို့စစ်ဆေးနေဆဲဖြစ်ပြီး နောက်ထပ်အင်အား ၃၀ ခန့်လည်း ထပ်မံရောက်လာတယ်လို့ ပြောပါတယ်။

"နောက်ရောက်လာတာနဲ့ဆို အင်အားက ၈၀ လောက်ရှိတယ်။ ပြီးခဲ့တဲ့ရက်ကတော့ ရွာနဲ့ နည်းနည်းလှမ်းတဲ့ နေရာမှာ တော်လှန်ရေးအဖွဲ့တွေ မိုင်းဆွဲသွားတာရှိတယ်။ အဲဒါကြောင့် ရွာကို မဲနေတာ။ ကြွက်မနိုင်ကျီမီးနဲ့ လာရှို့တာ" လို့ ဒေသခံ ၁ ဦးက ပြောပါတယ်။

ရွာခံတချို့ကတော့ စစ်ကြောင်းမလာခင်ကတည်းက အနီးနားရွာတွေမှာ တိမ်းရှောင်တာ၊ ညပိုင်းတွေမှာ ကျေးရွာမှာ မအိပ်ဘဲ တခြားနေရာတွေမှာ ရှောင်တိမ်းအိပ်နေကြတာတွေ ပြုလုပ်နေရတယ်လို့ ဆိုပါတယ်။

"ဖမ်းသွားတဲ့သူတွေကို စီမံချက်နဲ့ စစ်မှုထမ်းခိုင်းမှာ စိုးရိမ်ရတယ်။ အမျိုးသားတွေချည်းပဲဆိုတော့ အပြစ်မရှိလည်း ပြန်မလွှတ်ဘဲ တပ်ထဲထည့်မှာကို မိသားစုတွေ စိုးရိမ်နေကြတယ်။" လို့ ဒေသခံ ၁ ဦးက ပြောပါတယ်။

လက်ရှိကာလမှာတော့ အဲဒီဒေသမှာ မြေပဲပေါ်ချိန်ဖြစ်လို့ ယာလုပ်ငန်းခွင်ထဲမှာ မြေပဲနှုတ်ရမှာဖြစ်ပေမယ့် ရွာထဲကသူတွေကို ပေးမထွက်သလို အခြားသူတွေကိုလည်း အဝင်မခံဘူးလို့ သိရပါတယ်။

ဒါ့အပြင် ဩဂုတ်လဝန်းကျင်ကလည်း ရွာတွေဘက်ကို စစ်ကြောင်းထိုးဝင်ရောက်ကာ နေအိမ်ထဲက ပစ္စည်းတွေနဲ့ အဖိုးတန်အရာတွေကို ယူဆောင်တာ ၄ ကြိမ်ထက် မနည်းရှိခဲ့တယ်လို့ ဒေသခံတွေက ပြောပါတယ်။

စာတည်း - လင်းဇေ

#မြေလတ်အသံ

#မကွေးတိုင်း #ရေနံချောင်းမြို့ #အုတ်ရှစ်ကုန်းရွာ #စစ်ကောင်စီ #စစ်ကြောင်း