ရဲဘော်သစ် ၇၇ ဦးပါတဲ့ အမျိုးသားလွတ်မြောက်ရေးတပ်တော်ရဲ့ အခြေခံစစ်သင်တန်းဆင်းပွဲ

စစ်ကိုင်းတိုင်း၊ ကဘော်ဒေသမှာ အမျိုးသားလွတ်မြောက်ရေးတပ်တော်က သင်တန်းသား ၇၇ ဦးပါတဲ့ အခြေခံစစ်ပညာသင်တန်း အပတ်စဥ် ၅ သင်တန်းဆင်းပွဲကို စက်တင်ဘာ ၃၀ ရက် ဒီနေ့မနက် ၈ နာရီမှာ ပြုလုပ်ခဲ့ပါတယ်။

အမျိုးသား ၇၃ ဦးနဲ့ အမျိုးသမီး ၄ ဦးပါတဲ့ အပတ် ၅ အခြေခံစစ်သင်တန်းကို ဇွန် ၂၁ရက်ကနေ စက်တင်ဘာ ၂၁ ရက်အထိ ၃ လကြာသင်တန်းပေးခဲ့ပြီး သင်တန်းသားအားလုံး ပြီးဆုံးတဲ့အထိပါဝင်နိုင်ခဲ့ကြတယ်လို့ အမျိုးသားလွတ်မြောက်ရေးတပ်တော် ပြောရေးဆိုခွင့်ရှိသူက ပြောပါတယ်။

"သင်တန်းမှာတော့ လက်နက်မဲ့၊ လက်နက်နဲ့ စစ်ရေးပြတွေအပြင် စစ်နည်းဗျူဟာဘာသာရပ်၊ နိုင်ငံရေးဖက်ဒရယ်ဘာသာရပ်၊ စစ်ဖက်ဆိုင်ရာ ဥပဒေတွေကို ကျနော်တို့သင်ကြားပြသခဲ့တယ်" လို့ အမျိုးသားလွတ်မြောက်ရေးတပ်တော် ပြောရေးဆိုခွင့်ရှိသူက ပြောပါတယ်။

အမျိုးသားလွတ်မြောက်ရေးတပ်တော်ဟာ တအာင်းအမျိုးသားတပ်မတော် TNLAဆီမှာ စစ်ပညာသင်ပြီး စစ်ကိုင်းတိုင်း၊ တမူးဒေသမှာ စစ်ရေးလှုပ်ရှားနေတဲ့အဖွဲ့တခု ဖြစ်ပါတယ်။

အခု အပတ်စဥ် ၅ အပါအဝင် အခြေခံစစ်ပညာသင်တန်းကို TNLA သင်တန်းဆင်းတွေနဲ့ ဦးဆောင်သူ DSA အပတ်စဉ် ၄၆ ဆင်း စစ်တပ်အရာရှိဟောင်းတဦးတို့က စစ်ပညာသင်တန်းပေးခဲ့ကြတာလို့ ဆိုပါတယ်။

သင်တန်းဆင်းပွဲမှာ ဘက်စုံကောင်းမွန်တဲ့ သင်တန်းသား ၁ ဦး၊ လေ့ကျင့်ရေးမှာ စည်းကမ်းလိုက်နာတဲ့ ၁ ဦး၊ စက်ပစ်ကွင်းမှာ သေနတ်ပစ်တော်တဲ့ လက်ဖြောင့်ရဲဘော် ၁ ဦး၊ သင်တန်းအစကနေအဆုံးအထိ ဇွဲရှိရှိလုပ်ခဲ့တဲ့ အမျိုးသမီးရဲဘော် ၄ ဦးထဲက ၁ ဦးတို့ကို ဆုချီးမြှင့်ခဲ့တယ်လို့ ဆိုပါတယ်။

သင်တန်းဆင်းပွဲကို မိတ်ဖက်အဖွဲ့အစည်းဖြစ်တဲ့ CNO/CNDF ကလည်း တာဝန်ရှိတဲ့သူတွေ တက်ရောက်ကြတယ်လို့ သိရပါတယ်။

အမျိုးသားလွတ်မြောက်ရေးတပ်တော်ကို ၂၀၂၁ အောက်တိုဘာလမှာ စတင်ဖွဲ့စည်းခဲ့ပြီး စစ်ကိုင်းတိုင်းအတွင်း စစ်ကောင်စီကို တော်လှန်တိုက်ခိုက်နေတာလို့ ဆိုပါတယ်။

အဖွဲ့အနေနဲ့ စခန်းသိမ်းတိုက်ပွဲတခုရှိခဲ့သလို မြို့သစ် မြို့သိမ်းတိုက်ပွဲမှာလည်း MOD ရဲ့တပ်ရင်းတွေနဲ့ စစ်ရေးဖော်ဆောင်မှုလုပ်တဲ့အပြင် ၁၀၂၇ ဒုတိယလှိုင်းမှာလည်း မန္တလေး PDF နဲ့အတူ ပူးပေါင်းပါဝင် စစ်ရေးဖော်ဆောင်ခဲ့တယ်လို့ သိရပါတယ်။

စာတည်း - ဈာန်မြင့်

#မြေလတ်အသံ

#စစ်ကိုင်း #အမျိုးသားလွတ်မြောက်ရေးတပ်တော် #အခြေခံစစ်သင်တန်း #သင်တန်းဆင်းပွဲ