Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
ရွှေကျင်နဲ့ကျောက်ကြီးကို လေယာဥ်ဗုံးအလုံး ၃၀ နီးပါးကြဲချလို့ ဒေသခံ ၃၀၀၀ ကျော်ထွက်ပြေးနေရ
ပဲခူးတိုင်း၊ ညောင်လေးပင်ခရိုင်၊ ကရင်အမျိုးသားအစည်းအရုံး-KNU တပ်မဟာ ၃ ထိန်းချုပ်နယ်မြေ ကျောက်ကြီးနဲ့ ရွှေကျင်မြို့နယ်တွေထဲက ရွာတွေကို စစ်ကောင်စီတပ်က လေယာဥ်နဲ့ဗုံးကြဲတိုက်ခိုက်ခဲ့လို့ ဒေသခံ ၃၀၀၀ ကျော် ထွက်ပြေးတိမ်းရှောင်နေရတယ်လို့ KNU ဗဟိုက မတ်လ ၂၂ ရက် ဒီကနေ့မှာ ထုတ်ပြန်ထားပါတယ်။
မတ်လ ၂၀ ရက်နေ့ ညနေ ၅ နာရီကျော်မှာ KNU အုပ်ချုပ်နယ်မြေ ရွှေကျင်မြို့နယ်၊ တကက်ပူကျေးရွာနဲ့ ကျောက်ကြီးမြို့နယ် တကော်ဒဲကျေးရွာတို့ကို တိုက်လေယာဥ် ၄ စီးနဲ့ ၉ ကြိမ်တိုက်ခိုက်ခဲ့ပြီး ဗုံး ၂၈ လုံးထက်မနည်း ကြဲချခဲ့လို့ အဲ့ဒီရွာတွေအပါအဝင် အနီးတဝိုက်ကျေးရွာ ၂၁ ရွာက ဒေသခံ ၃၀၀၀ ကျော်ဟာ ဘေးလွတ်ရာကို ထွက်ပြေးတိမ်းရှောင်ခဲ့ရတယ်လို့ KNU က ဆိုပါတယ်။
စစ်ကောင်စီလေယာဥ်တွေက တကော်ဒဲကျေးရွာကို ဗုံး ၈ လုံးခန့် ကြဲချတိုက်ခိုက်ခဲ့တာကြောင့် မူလတန်းကျောင်း ၁ ကျောင်းနဲ့ နေအိမ် ၅လုံး မီးလောင်ပြာကျခဲ့ပြီး အသက် ၇၀ ရှိ ဒေသခံ ၁ ဦး ထိခိုက်ဒဏ်ရာရရှိခဲ့ကာ၊ တကက်ပူကျေးရွာက ဗုံးကြဲခံရမှုမှာတော့ လူနဲ့နေအိမ် ထိခိုက်တာမရှိပေမယ့် ဥယျာဥ်ခြံအတွင်းက သီးပင်စားပင်တွေ ပျက်စီးတာရှိခဲ့တယ်လို့ သိရပါတယ်။
ဒါ့အပြင် စစ်ကောင်စီတပ်ဟာ မတ် ၁ ရက်နေ့ကနေ ၁၉ ရက်နေ့အထိ ကရင်အမျိုးသားအစည်းအရုံး-KNU တပ်မဟာ ၃ ကော်သူးလေ အုပ်ချုပ်မှုနယ်မြေ၊ ရွှေကျင်နဲ့ကျောက်ကြီးမြို့နယ်တွေအတွင်းကို စစ်ကြောင်းထိုးဝင်ရောက်ပြီး ကျေးရွာတွေထဲကို လက်နက်ကြီးနဲ့အလုံးရေ ၄၀၀ ကျော်အထိ ပစ်ခတ်ခဲ့လို့ ဒေသခံ ၉ ဦး ဒဏ်ရာရရှိခဲ့ကာ နေအိမ် ၁၆ အိမ်နဲ့ ဗုဒ္ဓဘာသာဘုန်းကြီးကျောင်းသိမ် ၁ ခု ထိခိုက်ပျက်စီးခဲ့ရတယ်လို့ ဆိုပါတယ်။
စာတည်း - ရင်ငြိမ်း
#မြေလတ်အသံ