ရွှေဘို၊ အောင်ချမ်းသာရွာမှာ တရက်တည်း တိုက်ပွဲနှစ်ကြိမ်ဖြစ်ပြီး နှစ်ဘက်ထိခိုက်မှုရှိ

စစ်ကိုင်းတိုင်းဒေသကြီး၊ ရွှေဘိုမြို့နယ်၊ အောင်ချမ်းသာကျေးရွာမှာ တရက်တည်းတိုက်ပွဲနှစ်ကြိမ်ဖြစ်ပြီး နှစ်ဘက်ထိခိုက်ရှိတယ်လို့ ရွှေဘိုမြို့နယ်ပကဖထံက သိရပါတယ်။

ဩဂုတ် ၁၃ ရက်မှာ အင်အား ၅၀ ကျော်နဲ့ စစ်ကြောင်းထိုးလာတဲ့စစ်ကောင်စီအဖွဲ့နဲ့ ပြည်သူ့ကာကွယ်ရေးတပ်ဖွဲ့တွေဟာ မနက် ၁၀ နာရီ ၅၀ မိနစ်မှာ အောင်ချမ်းသာကျေးရွာအနီးမှာ တကြိမ်၊ ညနေ ၃ နာရီ ၃၀ မိနစ်ခန့်မှာ အောင်ချမ်းသာရွာသစ် အရှေ့ဘက် ဆန်စက်ဟောင်းအတွင်း စခန်းချနေတဲ့နေရာမှာတကြိမ် တိုက်ပွဲဖြစ်ပွားခဲ့တယ်လို့ ဆိုပါတယ်။

"ပထမအကြိမ်တိုက်ပွဲကတော့ ကျနော်တို့ဘက်က လူအင်အားနည်းတော့ ခဏလောက်ပဲ တိုက်ပွဲဖြစ်ပြီး ပြန်ဆုတ်ခဲ့ရတယ်။ ညနေပိုင်းမှာကျတော့ အင်အားထပ်စုပြီး သူတို့စခန်းချထားတဲ့နေရာကို သွားတိုက်တာ။ အနီးကပ်တိုက်ပွဲဖြစ်ခဲ့တာ" လို့ ရွှေဘိုမြို့နယ်ပကဖ တာဝန်ရှိသူက ပြောပါတယ်။

တိုက်ပွဲအတွင်းမှာ စစ်ကောင်စီဘက်က ၂ ဦးသေဆုံး(အလောင်းရ)နဲ့ ဒဏ်ရာရသူများပြားခဲ့သလို တော်လှန်ရေး ပူးပေါင်းတပ်တွေဘက်က ရဲဘော် ၂ ဦး မစိုးရိမ်ရဒဏ်ရာရခဲ့ပါတယ်။

ဒါ့အပြင် စစ်ကောင်စီတပ်သားတွေ အသုံးပြုတဲ့ ယူနီဖောင်းတွေနဲ့ ပစ္စည်းအချို့ကိုလည်း သိမ်းဆည်းရမိခဲ့ တယ်လို့ ဆိုပါတယ်။

အဆိုပါတိုက်ခိုက်မှုကိုတော့ ရွှေဘိုမြို့နယ် ပကဖတိုက်ခိုက်ရေး(PDO)အဖွဲ့၊ တိုက်နယ် (၅) ပကဖ တိုက်ခိုက် ရေးအဖွဲ့၊ တိုက်နယ် (၅) ရပ်ကျေးပကဖတွေနဲ့ တိုက်နယ် (၅) ပကဖ Fixed Wings Drone အဖွဲ့တို့ပူးပေါင်းပြီး တိုက်ခိုက်ခဲ့တာလို့ သိရပါတယ်။

ဩဂုတ် ၉ ရက်ကလည်း ရွှေဘိုမြို့နယ်၊ ဇီးကုန်းလေးရွာ မူးတံတား ကင်းစောင့်နေတဲ့ ပျူစောထီးအဖွဲ့ တိုက်ခိုက်ခံရပြီး ၃ ဦးသေဆုံးကာ သေနတ် ၂ လက်ရခဲ့တယ်လို့ သိရပါတယ်။

စာတည်း - လင်းဇေ

#မြေလတ်အသံ

#စစ်ကိုင်းတိုင်း #ရွှေဘိုမြို့နယ် #အောင်ချမ်းသာကျေးရွာ #PDF #ပကဖ