လက်နက်ကြီးဗုံးစထိမှန်ကျဆုံးတဲ့ YPDF ရဲဘော်ဗစ်တာရဲ့ ဈာပနကို ခရစ်ယာန်ထုံးတမ်းအစဉ်အလာအတိုင်း ပြုလုပ်ပေး

မကွေးတိုင်း၊ ဂန့်ဂေါခရိုင်အခြေပြုလှုပ်ရှားနေတဲ့ ယောဒေသပြည်သူ့ကာကွယ်ရေးတပ်ဖွဲ့ YPDF မှ ကျဆုံးခဲ့တဲ့ ရဲဘော်ရဲ့ဈာပနအခမ်းအနားကို ခရစ်ယာန်ထုံးတမ်းအစဉ်အလာအတိုင်းပြုလုပ်ခဲ့တယ်လို့ အဲ့ဒီတပ်ဖွဲ့ ဆီက သိရပါတယ်။

တိုက်ပွဲကျသေဆုံးသူမှာ အသက် ၂၇ နှစ်အရွယ် ရဲဘော်ဗစ်တာဖြစ်ပြီး အောက်တိုဘာ ၂၇ ရက်က မြောက်ခရမ်း (လေးရွာ)အနီး စစ်ကောင်စီတပ်နဲ့ လက်နက်ကြီးအပြန်အလှန်ပစ်ခတ်မှုအတွင်း လက်နက်ကြီးဗုံးစထိမှန် ကျဆုံးခဲ့တာလို့ ဆိုပါတယ်။

“ ကျနော်တို့ဘက်က လက်နက်ကြီးနဲ့ ၂ ချက်ပစ်တယ်၊ ၃ ချက်မြောက်မှာ ဟိုဘက်က ကောင်တာ(တန်ပြန်) ပြန်ထုလို့ ကျဆုံးခဲ့တာ၊ ရဲဘော်က ခရစ်ယာန်ဖြစ်နေလို့ ခရစ်ယာန်ထုံးတမ်းအစဉ်အလာအရ ဈာပနကို ပြုလုပ်ခဲ့ပါတယ်” လို့ ယောဒေသပြည်သူ့ကာကွယ်ရေးတပ်ဖွဲ့ YPDF တာဝန်ခံရဲဘော်လူလှက ပြောပါတယ်။

ရဲဘော် ဗစ်တာ ဈာပနကို အောက်တိုဘာ ၂၈ ရက် မနေ့က ခရစ်ယာန်ဘာသာထုံးတမ်းအစဉ်အလာအတိုင်း ဝတ်ပြုဆုတောင်းပြီးနောက် မြေမြုပ်သင်္ဂြိုဟ်ပေးခဲ့ပြီး  မိသားစုဝင်တွေအပြင် မဟာမိတ်ရဲဘော်အများအပြားက လိုက်ပါပို့ဆောင်ပေးခဲ့ကြတယ်လို့ ဆိုပါတယ်။

“ ကျနော်တို့ ဗုဒ္ဓဘာသာထုံးတမ်းအစဉ်အလာအရ သင်္ဂြိုဟ်လို့ရှိရင် အရိုးယူရင်ရတာကို အရိုးယူမယ် ဆိုတော့၊ သူတို့(မိသားစု)က မြေပဲမြုပ်မယ်ဆိုတော့ သူတို့ရဲ့ဆန္ဒအတိုင်းမြေမြုပ်ပေးခဲ့ပါတယ်” အထက်ပါတာဝန်ခံက ဆက်ပြောပါတယ်။

ယောဒေသပြည်သူ့ကာကွယ်ရေးတပ်ဖွဲ့ YPDF မှာ ရဲဘော်ဗစ်တာအပြင် ဌာနမှူးအဆင့်အရာရှိအပါအဝင် ရဲဘော် ၆ ဦး ကျဆုံးထားတယ်လို့ သိရပါတယ်။

စာတည်း - ဟိန်းစံ

#မြေလတ်အသံ

#မကွေး #ဂန့်ဂေါ #ရဲဘော် #ကျဆုံး #ဈာပန