စစ်ကောင်စီကဖမ်းသွားတဲ့ ကြို့ပင်ကောက်က စစ်ရှောင်ပြည်သူ ၆၀ ဦးဝန်းကျင် ပြန်မလွတ်သေး

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်၊ ပဲခူးရိုးမအစပ်မှာ စစ်ကောင်စီကဖမ်းထားတဲ့ စစ်ရှောင်ပြည်သူ ၆၀ ဦးဝန်းကျင်ကို အောက်တိုဘာ ၂၈ ရက် ဒီနေ့အထိ ပြန်လွှတ်မပေးသေးဘူးလို့ ကြို့ပင်ကောက်မြို့နယ် အခြေစိုက် သာယာဝတီခရိုင်တပ်ရင်း ၃၈၀၁၊ တပ်ခွဲ ၁ ရဲ့ တပ်ခွဲမှူးက ပြောပါတယ်။

ကြို့ပင်ကောက်မြို့နဲ့  ၁၂ မိုင်ခန့်အကွာ ဥယျာဉ်ကြီးရွာနဲ့ အေးရွာလေးရွာက ကလေးငယ်နဲ့ အမျိုးသား အမျိုးသမီးအပါ ၆၀ ဦးဝန်းကျင်ခန့်ကို အောက်တိုဘာ ၂၆ ရက် ညနေပိုင်းက အေးရွာလေးရွာထိပ်၊ ကျစွာဘုန်းတော်ကြီးကျောင်းမှာ စစ်ရှောင်နေချိန်ဖမ်းဆီးခဲ့တာလို့ ပြောပါတယ်။

အဲဒီနေ့ မွန်းလွဲပိုင်းက ဥယျာဉ်ကြီးရွာမှာရှိနေတဲ့စစ်အုပ်စုနဲ့  အေးရွာလေးရွာမှာ ရောက်နေတဲ့ဒေသခံ ပြည်သူ့ကာကွယ်ရေးတပ်ဖွဲ့တို့ ၃ နာရီကြာတိုက်ပွဲဖြစ်အပြီး ဒေသခံပြည်သူ့ကာကွယ်ရေးတပ်ဖွဲ့တွေ တပ်ဆုတ်အပြီးမှာ စစ်ရှောင်တွေကို ဖမ်းဆီးခဲ့တာလို့ ဆိုပါတယ်။

“တိုက်ပွဲဖြစ်လို့ ကျစွာဘုန်းတော်ကြီးကျောင်းမှာ စစ်ရှောင်နေတာကို **တွေကရောက်လာပြီး ဖမ်းထားတာ၊ ပြန်လွှတ်မပေးဘူး။ ခုထိကျစွာဘုန်းတော်ကြီးကျောင်းမှာ တပ်စွဲထားတုန်း၊ အင်အားကလည်း ၇၀ လောက်ရှိတယ်။” လို့ တပ်ခွဲမှူးကိုကရင်လေးက ပြောပါတယ်။

အခုလို ပြည်သူတွေကိုဖမ်းဆီးထားတဲ့အတွက် ပြည်သူ့ကာကွယ်ရေးတပ်ဖွဲ့တွေက စစ်အုပ်စုကိုတိုက်ဖို့ အခက်တွေ့နေသလို စစ်အုပ်စုကလည်း ကျစွာဘုန်းတော်ကြီး‌‌ကျောင်းဝန်းထဲကနေ တောတောင်တွေထဲကို လက်နက်ကြီးတွေ ပစ်ခတ်တာ၊ ဒရုန်းတွေနဲ့ ကြဲချတာတွေလုပ်နေတယ်လို့ သူက ဆက်ပြောပါတယ်။

ဒေသခံတဦးကလည်း အဲဒီ‌ကျေးရွာ ၂ ရွာပေါင်းဟာ ပျမ်းမျှလူဦးရေ ၄၀၀ ဝန်းကျင်လောက်ရှိပြီး ရွာလုံးကျွတ် စစ်ရှောင်နေကြပြီး တချို့ဟာမြို့ပေါ်ကို တိမ်းရှောင်သူရှိသလို ‌တခြားရွာတွေကို တိမ်းရှောင်နေသူတွေလည်းရှိတယ်လို့ ပြောပါတယ်။

အောက်တိုဘာ ၂၈ ရက် ဒီနေ့အချိန်ထိ နှစ်ဘက်ပစ်ခတ်မှုမရှိပေမယ့် စစ်ရေးတင်းမာနေဆဲဖြစ်တယ်လို့ ကိုကရင်လေးက ဆိုပါတယ်။

အဲဒီစစ်ကြောင်းကို အောက်တိုဘာ ၂၅ ရက် မနက် ၇ နာရီလောက်ကလည်း ဒေသခံပြည်သူ့ကာကွယ်ရေးတပ်ဖွဲ့ တွေက ဥယျာဉ်ကြီးရွာထိပ်ကနေ တိုက်ခိုက်လို့ စစ်ကောင်စီတပ်သားတချို့ သေဆုံးသူတွေရှိခဲ့ပါသေးတယ်။

ပြီးခဲ့တဲ့ အောက်တိုဘာ ၁၃ ရက်မွန်းလွဲပိုင်းကလည်း ကြို့ပင်ကောက်မြို့နယ်နဲ့ ထိစပ်နေတဲ့ အုတ်ဖိုမြို့နယ်၊ ဝိုင်းကျေးရွာ ရဲစခန်းနေ အင်အား ၃၀ ဦးခန့်နဲ့ထွက်လာတဲ့ စစ်ကြောင်းကို ဝိုင်းရွာအုပ်စု ဆေးခန်းအနီး ကနေ သာယာဝတီခရိုင်တပ်ရင်း ၃၈၀၁၊ တပ်ခွဲ ၅ မှ ရဲဘော်တွေက မိုင်းဆွဲတိုက်ခိုက်ခဲ့ပါသေးတယ်။

ပုံစာ - စစ်ကောင်စီ တပ်ဖွဲ့ဝင်များ။ (ပုံဟောင်း) 

စာတည်း - လင်းဇေ

#မြေလတ်အသံ

#ပဲခူးတိုင်း #ကြို့ပင်ကောက် #စစ်ကောင်စီ #စစ်ရှောင်ပြည်သူ #သာယာဝတီခရိုင်