ပုလဲမြို့က ထွက်လာတဲ့ စစ်ကောင်စီစစ်ကြောင်း မိုင်းဆွဲခံရလို့ ထိခိုက်သေဆုံးမှုတွေရှိဟုဆို

စစ်ကိုင်းတိုင်း၊ ပုလဲမြို့နယ်ထဲကနေ  ထွက်လာတဲ့စစ်ကောင်စီစစ်ကြောင်းကို နိုဝင်ဘာ ၁၂ ရက် မနေ့က မိုင်းဆွဲတိုက်ခိုက်ခဲ့တယ်လို့ ယင်းမာပင်ခရိုင်အမှတ် ၁၀ တပ်ရင်း၊  ဒေါင်းနက် နယ်စည်းမခြားပြောက်ကျားတပ်ဖွဲ့က သတင်းထုတ်ပြန်ထားပါတယ်။

ပုလဲမြို့ပေါ်ကနေ အင်အား ၇၀ ဦးလောက်နဲ့ ဆားလင်းကြီးမြို့နယ်ဘက်ကို စစ်ကြောင်းထွက်လာတာကို ပုလဲမြို့ အရှေ့ဘက်အထွက်မှာ မနေ့ မနက် ၇ နာရီခွဲလောက်က ရှေ့ထွက်မိုင်း ၈ လုံးဆွဲကာ တိုက်ခိုက်ခဲ့တာလို့ ပြောပါတယ်။

မိုင်းဆွဲတိုက်ခိုက်ခဲ့လို့ စစ်ကောင်စီဘက်က ၉ ဦးသေကာ ၄ ဦးဒဏ်ရာရရှိခဲ့တယ်လို့ ဆိုပါတယ်။

"မိုင်းဆွဲပြီးတော့ မသေတဲ့ကောင်တွေက ဗြောင်းဆန်အောင်ပြန်ပစ်တာ" လို့ ဒေါင်းနက် နယ်စည်းမခြားပြောက်ကျားတပ်ဖွဲ့က ရဲဘော်ပေ က ပြောပါတယ်။

စစ်အုပ်စုဘက်က အဆက်မပြတ်ပစ်ခတ်တာကြောင့် တိုက်ခိုက်ရေးရဲဘော်တွေ တပ်ပြန်ဆုတ်ခဲ့သလို စစ်ကောင်စီစစ်ကြောင်းဟာလည်း အလောင်းတွေနဲ့ ဒဏ်ရာရလူနာတွေကို သယ်ဆောင်ပြီး ပုလဲမြို့နယ်၊ အေးကုန်းရွာကို ဆက်ထွက်သွားတယ်လို့ သူက ဆက်ပြောပါတယ်။

အဲ့ဒီစစ်ကြောင်းဟာ နိုဝင်ဘာ ၇ ရက်က ယင်းမာပင်မြို့ကို သွားရောက်ပြီးမှ နိုဝင်ဘာ ၉ ရက်က ပုလဲမြို့ကို ပြန်ဝင်လာတဲ့ စစ်ကြောင်းဖြစ်တယ်လို့ ဆိုပါတယ်။

ဒေါင်းနက်နယ်စည်းမခြား ပြောက်ကျားတပ်ဖွဲ့ဟာ ပြီးခဲ့တဲ့ အောက်တိုဘာ ၄ ရက် ညနေကလည်း ဆားလင်းကြီးမြို့နယ်က ထွက်လာတဲ့ စစ်ယာဥ်တန်းကို လည်ငေါက်ရွာအနီးကနေ မိုင်းဆွဲတိုက်ခိုက်ခဲ့ကြပါသေးတယ်။

စာတည်း - လင်းဇေ

#မြေလတ်အသံ

#စစ်ကိုင်းတိုင်း #ပုလဲမြို့နယ် #စစ်ကောင်စီ #စစ်ကြောင်း #မိုင်းဆွဲ #ယင်းမာပင် #ဒေါင်းနက် #ပြောက်ကျားတပ်ဖွဲ့ #သတင်း #မြေလတ်သတင်း