ပဲခူးအနောက်မှာ နှမ်းလှိုင်ချိန် ဈေးချဝယ်နေသော်လည်း နှမ်းဆီဈေး မြင့်တက်နေ

ပဲခူးတိုင်းအနောက်ခြမ်းက တောင်ပေါ်ဒေသတွေမှာ စိုက်ပျိုးထားတဲ့နှမ်းတွေ စက်တင်ဘာ လဆန်းကစလို့ လှိုင်လှိုင်ပေါ်ထွက်လာချိန်မှာ နှမ်းဈေးကျဆင်းပေမယ့် နှမ်းဆီဈေးကတော့ မြင့်တက်နေတယ်လို့ နှမ်းစိုက်တောင်သူတဦးဆီက သိရပါတယ်။ 

နှမ်းစတင်ပေါ်ချိန် စက်တင်ဘာလဆန်းက နှမ်း ၁၅ ပိဿာ တတင်းကို ကျပ် ၁၀၅၀၀၀ ဈေးပေါက်ပြီး လက်ရှိပေါက်ဈေးမှာ ကျပ် ၉ သောင်းဝန်းကျင်သာ ရှိတယ်လို့ ပေါက်ခေါင်းမြို့နေ ဆီစက်လုပ်ငန်းရှင်တဦးက ဆိုပါတယ်။ 

 “ဈေးကောင်းမရလိုက်ဘူး၊ တတင်းကို ၁ သောင်းလောက်နာသွားတယ်၊ ပစ္စည်းလှိုင်လှိုင်ပေါ်ကာမှ ဈေးကျသွားတာ၊ ကိုယ်တိုင်နှမ်းစိုက်ပြီး နှမ်းရော ဆီ ၁ ပိဿာကို တသောင်းကျော် ပြန်ဝယ် စားနေရတယ်။ ကိုယ်ပြန်ပြီးဝယ်စားရမယ့် နှမ်းဆီဈေးကတော့ ခေါင်ခိုက်နေတယ်” လို့ ပေါက်ခေါင်းမြို့နယ်က နှမ်းစိုက်ပျိုးသူတဦးက ပြောပါတယ်။ 

အဲဒီနှမ်းတွေကို ပြီးခဲ့တဲ့မေလဆန်း ဝန်းကျင်က စိုက်ပျိူးခဲ့တာဖြစ်ပြီး ခန့်မှန်းကုန်ကျစားရိတ်အနေနဲ့ တဧကကို ကျပ် ၃ သိန်းဝန်းကျင်လောက် ရှိပြီး အခုနှစ် နှမ်းတွေကောင်းတာကြောင့် ၁ ဧကကို ပျှမ်းမျှ ၆ တင်းခန့် ထွက်ရှိတယ်လို့ ဆိုပါတယ်။

လက်ရှိမှာ စစ်ကောင်စီက စားအုံးဆီကို ဈေးလျော့ရောင်းခိုင်းနေလို့ မြို့နယ်တိုင်းလိုလိုမှာ စားအုံးဆီ ပြတ်လပ်နေပြီး နှမ်းဆီဈေးမှာလည်း ပြီးခဲ့တဲ့ ဩဂုတ်လလယ်က နှမ်းလတ်ဆီ ၁ ပိဿာကျပ် ၁၀၂၀၀ ရှိရာက လက်ရှိမှာ ကျပ် ၁၃၀၀၀ ဈေးပေါက်တယ်လို့ ပေါင်းတည်မြို့ခံအမျိုးသမီးတဦးက ပြောပါတယ်။ 

ပဲခူးတိုင်းအနောက်ခြမ်းမှာ နှမ်းကိုတောင်ပေါ်ဒေသတွေအပြင် မြေပြန့်တွေမှာရှိတဲ့ ကုန်းမြင့်တဲ့ နေရာတွေမှာလည်း စိုက်ပျိုးကြတယ်လို့ သိရပါတယ်။

ပုံစာ - ပဲခူးရိုးမအနောက်ခြမ်းတနေရာက နှမ်းခြွေနေမှု မြင်ကွင်း။

စာတည်း - နွေဦးငြိမ်းချမ်း  

#မြေလတ်အသံ

#သတင်း #စားသောက်ကုန် #ကုန်ဈေးနှုန်း #စားဆီ #ဈေးကွက် #စိုက်ပျိုးရေး #နှမ်း #တောင်သူလယ်သမား #ပဲခူးတိုင်းအနောက်ခြမ်း