မင်းလှမှာ အရက်မူးပြီးပြန်လာတဲ့ စစ်ဗိုလ်တဦး ဆိုင်ကယ်မှောက်သေဆုံး

ပဲခူးတိုင်းအနောက်ခြမ်း၊ မင်းလှမြို့နယ် ပဲခူးရိုးမအစပ်မှာ ဒီဇင်ဘာ ၁၀ ရက် ညနေ ၄ နာရီလောက်က စစ်ကောင်စီဗိုလ်တဦး ဆိုင်ကယ်မှောက်ပြီး သေဆုံးသွားတယ်လို့ ဒေသခံတဦးဆီက သိရပါတယ်။ 

သေဆုံးသူမှာ မင်းလှအခြေစိုက် ခလရ ၁ က သုံးပွင့်ဗိုလ်ကြီးတဦးဖြစ်ပြီး ဟိုင်းယုလမ်းစုံမှာ ကင်းပုန်းဝတ်နေတဲ့ စစ်သားတွေဆီကနေ တယောက်တည်းပြန်လာချိန် မြို့ချောင်း -စိန်ကန့်လန့် ရိုးမဖြတ်လမ်း ဘန့်ဘွေးကုန်းရွာနဲ့ အောင်ဆန်းမြိုင်(ဝံလူး)ကျေးရွာကြားရှိ သဲဖြူကွေ့ကားလမ်းပေါ်မှာ  ဆိုင်ကယ်မှောက်ပြီး သေဆုံးခဲ့တာလို့ ဆိုပါတယ်။ 

“စစ်*ဗိုလ်တကောင် ဆိုင်ကယ်မှောက်ပြီး မသာပေါ်သွားတယ်ဗျ။ အဲ့*က အရက်ကလည်း မတရားသောက်ထားတော့ လမ်းကွေ့ကို သတိမထားမိပဲ မှောက်ပြီးပွဲချင်းပြီး မသာပေါ်တာ” လို့ ဒေသခံတဦးက ပြောပါတယ်။

ဦးခေါင်းထိခိုက်ပြီးနေရာမှာတင် သေဆုံးခဲ့ကာ အလောင်းကိုတော့ လူမှုကူညီရေးအသင်တွေက ပြည်မြို့ကို သယ်သွားတယ်လို့ ဒေသခံတဦးက ပြောပါတယ်။

ပြီးခဲ့တဲ့ မတ်လ ၂ ရက် မနက်အစောပိုင်းကလည်း မင်းလှမြို့နယ်အပိုင် ပဲခူးရိုးမထဲရှိ မြို့ချောင်း - စိန်ကန့်လန့်ရိုးမဖြတ်လမ်း ခါချဥ်တောင်အဆင်းမှာ စစ်ကောင်စီကားတစီး တိမ်းမှောက်လို့ အရာရှိတဦးအပါ စစ်သားအချို့ သေဆုံးခဲ့ပါသေးတယ်။

အခုရက်ပိုင်း မင်းလှမြို့နယ်ထဲမှာ စစ်ကောင်စီတပ်နဲ့ ဒေသခံပြည်သူ့ကာကွယ်ရေးတပ်ဖွဲ့တွေ ထိတွေ့တိုက်ပွဲတွေ ဖြစ်နေပြီး ဒီဇင်ဘာလ ၈ ရက်ကလည်း စမ်းဘုတ်ရွာစစ်ကောင်စီဂိတ်စခန်းကို သာယာဝတီခရိုင် တပ်ရင်း ၃၈၀၂ တပ်ခွဲ ၅  က  တိုက်ခိုက်ခဲ့လို့ စစ်ကောင်စီတပ်ဘက်က သေဆုံးမှုတွေ ရှိခဲ့ပါသေးတယ်။

ပုံစာ - မင်းလှမြို့နယ်ထဲက ခရီးသွားပြည်သူတွေကို စစ်ဆေးနေတဲ့ စစ်အုပ်စု(ပုံဟောင်း)

စာတည်း - လင်း

 #မြေလတ်အသံ

#ပဲခူး #မင်းလှ #ခလရ၁ #သုံးပွင့်ဗိုလ် #ဆိုင်ကယ်မှောက် #သေဆုံး #သတင်း #မြေလတ်သတင်း