ရာထူးကနုတ်ထွက်တယ်ကြေညာပြီး စစ်တပ်ကိုလျှို့ဝှက်သတင်းပေးနေတဲ့ရာအိမ်မှူး ပစ်သတ်ခံရ

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်မှာ အုပ်ချုပ်ရေးအဖွဲ့ဝင်ကနေ နုတ်ထွက်ထားတယ်ဆိုပြီး စစ်ကောင်စီကို လျှို့ဝှက်သတင်းပေးနေတဲ့ ရာအိမ်မှူး ၁ ဦးကို သေနတ်နဲ့ပစ်သတ်ခဲ့တယ်လို့ ပဲခူးရိုးမအခြေပြု တပ်ခွဲ BTZM GBK PDF က သတင်းထုတ်ပြန်ထားပါတယ်။

အသတ်ခံရသူဟာ ကြို့ပင်ကောက်မြို့နယ်၊ ဥယျာဉ်ကြီးအုပ်စု၊ အေးရွာလေးရွာက အသက် ၄၅ နှစ်အရွယ် ကိုစိုးနိုင်ဖြစ်ပြီး ဒီဇင်ဘာ ၆ ရက်ည ၈ နာရီခွဲဝန်းကျင်က သူ့ရဲ့နေအိမ်ခြံဝန်းအနီးမှာ ပစ်သတ်ခဲ့တာလို့ ဆိုပါတယ်။

“အိမ်ထဲမှာဝင်ဖမ်းတာ။ အိမ်ပြင်ရောက်တော့ ထွက်ပြေးလို့ ပစ်လိုက်ရတာ၊ ပွဲချင်းပြီးသေတယ်။ နောက်ကျော ၁ ချက်၊ မသေမှာစိုးလို့ ဦးခေါင်း ၂ ချက်ပစ်ခဲ့တာ။ နေရာက တိုက်ပွဲဖြစ်နေကျ နေရာဖြစ်‌ တော့ လူသွားလာနည်းလို့ အလောင်းလာမကောက်ရင် ပုပ်နေမှာစိုးလို့ မြေမြှုပ် သင်္ဂြိုဟ်ပေးခဲ့ပါတယ်။” လို့  BTZM GBK PDF မှ တပ်ခွဲမှူး တေဇမင်းက ပြောပါတယ်။

ကိုစိုးနိုင်ဟာ ရာအိမ်မှူးရာထူးကနေ နုတ်ထွက်တယ်လို့ကြေညာထားပြီးနောက် တော်လှန်ရေးတပ်ဖွဲ့တွေကို ချဉ်းကပ်ပေါင်းနေခဲ့တာဖြစ်ပြီး ပြီးခဲ့တဲ့နိုဝင်ဘာလထဲမှာ ၎င်းရဲ့လျှို့ဝှက် သတင်းပေးမှုတွေကို တော်လှန်ရေးတပ်ဖွဲ့ဝင်တွေက ရိပ်မိလာခဲ့တာလို့ သူကဆက်ပြောပါတယ်။

ကိုစိုးနိုင်ဟာ စစ်ကောင်စီကိုသတင်းပေးရာမှာ တက်ကြွစွာ ကိုယ်ရောစိတ်ပါလုပ်ကိုင်နေသူဖြစ်တဲ့အပြင် ဒေသခံ တော်လှန်ရေးသမားတွေရဲ့လူပ်ရှားမှုတွေကို ပျူစောထီး‌ခေါင်းဆောင်လည်းဖြစ် ကွင်းချောင်းရွာ အုပ်ချုပ်ရေးမှူးလည်းဖြစ်သူနဲ့အတူ စစ်ကောင်စီကိုသတင်းပေးနေသူဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ဒီဇင်ဘာ ၃ ရက် မနက်ပိုင်း ၁၀ နာရီဝန်းကျင်လောက်ကလည်း ကြို့ပင်ကောက်မြို့နယ်၊ တောင်ရွာမရပ်ကွက်က အသက် ၄၅ နှစ်ဝန်းကျင် ရာအိမ်မှူး ကိုအောင်ထွန်းကိုလည်း ရုံးလမ်း‌ထောင့်၊ ဆိုင်ကယ်ကယ်ရီဂိတ် အနီးမှာ Dragon Brother (GBK PDF) က သေနတ်နဲ့ ပစ်သတ်ခဲ့ပါသေးတယ်။

စာတည်း - လင်း 

#မြေလတ်အသံ

#ပဲခူး #ကြို့ပင်ကောက် #ရာအိမ်မှူး #အသတ်ခံရ