အနက်ရောင်သေမင်းတမန်အဖွဲ့စာတမ်းပါ အမျိုးသား ၂ ဦးအလောင်းကို လမ်းဆုံမှာ စွန့်ပစ်ထား

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့နယ်မှာ ဒီဇင်ဘာ ၁၇ ရက်က အနက်ရောင်သေမင်းတမန် စာတမ်းပါ လူငယ်အမျိုးသား ၂ ဦးရဲ့အလောင်း စွန့်ပစ်သွားတယ်လို့ ဒေသခံတွေဆီက သိရပါတယ်။

အဲဒီအလောင်းတွေကို ဆင်လူးကျေးရွာအုပ်စုအတွင်းရှိ မဲခေါင်းလမ်းနဲ့ ဒေါင်းယက်ချောင်းရွာ လမ်းဆုံအနီး မနက်အစောပိုင်းမှာ ဒေသခံတချို့က တွေ့ရှိခဲ့တယ်လို့ ဆိုပါတယ်။

အဲဒီအလောင်းတွေရဲ့ လည်ပင်းမှာ လှီးဖြတ်ထားတဲ့ ဓားဒဏ်ရာတွေကိုတွေ့ရပြီး နှစ်ဦးစလုံးကို အနက်ရောင်သေမင်းတမန်စာတမ်းပါ လည်ဆွဲတွေကို ချိတ်ဆွဲထားခဲ့တယ်လို့ သိရပါတယ်။

"မနက်ခင်း ဈေးကိုသွားတဲ့ ဈေးသည်တွေ မြင်ခဲ့ကြတယ်။ အဲဒီလမ်းကို ဘယ်သူမှ မသွားရဲကြဘူး။ ဓားဒဏ်ရာတွေနဲ့ သေနေကြတယ်။ ညပိုင်းမှာ လာပြီးတော့ စွန့်ပစ်ထားတာဖြစ်မယ်။" လို့ ဒေသခံရွာသားတဦးက ပြောပါတယ်။

အခုလို ကျေးရွာချင်းဆက်လမ်းဆုံအနီးမှာ စွန့်ပစ်ထားတဲ့ အမျိုးသားအလောင်း ၂ လောင်းဟာ ပေါင်းတည် ဒေသခံရွာသားမဟုတ်ဘဲ ဘယ်အရပ်ဒေသက မည်သူမည်ဝါဖြစ်ကြောင်း မသိရသေးဘဲ ရဲတပ်ဖွဲ့ဝင်တွေ လာရောက်ပြီး မှတ်တိုင်ရဲစခန်းကို သယ်ယူသွားတယ်လို့ ဆိုပါတယ်။

ဒီဇင်ဘာ ၃ ရက် ညပိုင်းကလည်း ပေါင်းတည်ပြည်သူ့ကာကွယ်ရေးတပ်ဖွဲ့ဝင်တွေက ဆင်လူးရွာအုပ်စုအုပ်ချုပ်ရေးမှူးနဲ့ သားဖြစ်သူကို နေအိမ်မှာရှိနေချိန် သေနတ်နဲ့ပစ်သတ်ခဲ့အပြီး ၂ ပတ်အကြာမှာ အလောင်းတွေကို အခုလို လာရောက်စွန့်ပစ်ခဲ့တာလို့ အုပ်ချုပ်ရေးပိုင်းနဲ့ နီးစပ်သူတဦးထံက သိရပါတယ်။

အခုလို အလောင်းတွေ စွန့်ပစ်ထားတာဟာ ဆင်လူးရွာ အုပ်ချုပ်ရေးမှူးသားအဖကို PDF ရဲဘော်တွေ သတ်တာကြောင့် လက်စားချေသတ်တာမျိုးဖြစ်နိုင်တယ်လို့ သူက မှတ်ချက်ပြုပါတယ်။

ပဲခူးတိုင်း၊ ပေါင်းတည်၊ လက်ပံတန်း၊ ပြည်နဲ့ ပေါင်းတလည်မြို့နယ်တို့မှာလည်း အနက်ရောင် သေမင်းတမန်အဖွဲ့က အမည်၊ နေရပ်လိပ်စာစုံစမ်းလို့ မရဘဲ အမျိုးသားတချို့ကို PDF ဟု စွပ်စွဲကာ သတ်ဖြတ်ပြီး စွန့်ပစ်ထားတာ ၄ ကြိမ်အထက်ရှိတယ်လို့ စစ်ကောင်စီကို ထောက်ခံတဲ့ တယ်လီဂရမ်မှာ ထုတ်ပြန်ချက်အရ သိရပါတယ်။

PDF အဖွဲ့တွေကို အနက်ရောင်သေမင်းတမန်အဖွဲ့က သတ်ဖြတ်ခဲ့ပြီး သူတို့ရဲ့ရုပ်အလောင်းတွေမှာ အနက်ရောင်သေမင်းတမန် စာတန်း ချိတ်ဆွဲထားခဲ့တယ်လို့ စစ်ကောင်စီထောက်ခံမီဒီယာတွေမှာ ဖော်ပြထားပါတယ်။ 

ဒါ့အပြင် အနက်ရောင်သေမင်းတမန်အဖွဲ့ဟာ အုပ်ချုပ်ရေးမှူး၊ အစိုးရ၀န်ထမ်းတွေနဲ့ ပြည်သူတွေကို လိုက်လံသတ်ဖြတ်နေတဲ့ PDF ကို ရှင်းလင်းသွားမှာဖြစ်တယ်လို့ ဖော်ပြထားပြီး အနက်ရောင်သေမင်းတမန်အဖွဲ့မှ နေရာတိုင်းမှာ သက်ဝင်လှုပ်ရှားဆောင်ရွက်သွားမယ်လို့ စစ်ကောင်စီထောက်ခံ ဝါဒဖြန့်မီဒီယာတွေမှာ ဖော်ပြထားပါတယ်။ 

ပုံစာ - သေဆုံးသူအမျိုးသားတဦး၏ အလောင်းတွင် ချိတ်ဆွဲထားသည့် အနက်ရောင်သေမင်းတမန်အဖွဲ့တံဆိပ်။

စာတည်း - လင်းဇေ

#မြေလတ်အသံ

#ပဲခူးတိုင်း #ပြည်ခရိုင် #ပေါင်းတည် #အနက်ရောင်သေမင်းတမန် #အလောင်းစွန့်ပစ်