အုတ်ဖိုမှာ ပျူစောထီးခေါင်းဆောင်လို့ဆိုသူ သေနတ်နဲ့ပစ်ခတ် ရှင်းလင်းခံရ

ပဲခူးတိုင်းအနောက်ခြမ်း၊ အုတ်ဖိုမြို့နယ်၊ ပဲခူးရိုးမအစပ်မှာ ဩဂုတ် ၁၈ ရက် မနေ့က ပျူစောထီးခေါင်းဆောင်လို့သတင်းကြီးသူ ၁ ဦးကို သေနတ်နဲ့ပစ်ခတ်ခဲ့တယ်လို့ သာယာဝတီခရိုင်တပ်ရင်း ၃၈၀၂၊ တပ်ခွဲ ၄၊ မြေအောက်ပြောက်ကျားတပ်ဖွဲ့ - အုတ်ဖိုရဲ့ တာဝန်ခံဆီက သိရပါတယ်။

အုတ်ဖိုမြို့နယ်၊ ဝိုင်းရဲစခန်းအနီးက နေအိမ်တအိမ်မှာ ဦးငသောင်းလေး(၅၀ နှစ်ခန့်) ကို မနေ့မနက် ၁၁ နာရီလောက်က သေနတ်နဲ့ ၄ ချက်ပစ်ခတ်ခဲ့တာလို့ ဆိုပါတယ်။ 

“ သူ့ကိုရှင်းလင်းရတဲ့ အဓိကအကြောင်းက သူကနယ်မြေခံ PDF တွေရဲ့ သတင်းကိုစစ်ကောင်စီကိုပေးနေတာပဲ။ ပျူစောထီးခေါင်းဆောင်လည်းဖြစ်တယ် ရဲစခန်းထဲမှာလည်းနေတယ်။ ပိုဆိုးတာက စစ်တပ်ကလာရင် PDF စခန်းတွေကိုလမ်းပြတာပဲ။ သူလိုလူမျိုးတွေရှိနေလို့ ကျနော်တို့ ဝိုင်းရဲစခန်းကို မစိုးမိုးနိုင်သေးတာ။ ဒါကြောင့်ရှင်းလင်းလိုက်ရတာပါ" လို့ မြေအောက်ပြောက်ကျားတပ်ဖွဲ့တာဝန်ခံက ပြောပါတယ်။

ဝိုင်းကျေးရွာသား ဦးငသောင်းလေးဆီကနေ ဖုန်း ၂ လုံးနဲ့ ငွေသားအနည်းငယ်ကို သိမ်းဆည်းနိုင်ခဲ့တယ်လို့လည်း သူကဆက်ပြောပါတယ်။

အုတ်ဖိုမြို့နယ်၊ ဝိုင်းကျေးရွာမှာ နယ်မြေရဲကင်းစခန်းရှိပြီး စစ်ကောင်စီတပ်ကလည်း တပ်စွဲထားသလို အဲ့ဒီစခန်းကနေ ဒေသခံပြည်သူအချို့ကို စည်းရုံးကာ သတင်းပေးလုပ်ခိုင်းတာအပြင် သစ်ကားတွေဆီက ဂိတ်ကြေးတောင်းခိုင်းတာနဲ့ လောင်းကစားဝိုင်းထောင်ကာ လိုင်းကြေးကောက်ခံတာတွေ ပြုလုပ်ခိုင်းတယ်လို့လည်း ဒေသခံတဦးက ပြောပါတယ်။

ပြီးခဲ့တဲ့ ဩဂုတ် ၁၇ ရက်ကလည်း အုတ်ဖိုမြို့နယ်နဲ့ နယ်မြေချင်းထိစပ်နေတဲ့ မင်းလှမြို့နယ်၊ မြို့ချောင်း- စိန်ကန့်လန့်လမ်းက သစ်တောဂိတ်မှာ ဂိတ်ကြေးကောက်ခံနေတဲ့ ပျူစောထီးလို့ သတင်းထွက်နေတဲ့ ကိုအေးလွင်ဦးနဲ့ မခင်စန်းဝင်တို့လင်မယားကို သာယာဝတီခရိုင်တပ်ရင်း ၃၈၀၂ တပ်ခွဲ ၅ က ပစ်ခတ်ရှင်းလင်းခဲ့ပါသေးတယ်။

ပဲခူးတိုင်းအနောက်ခြမ်းမှာ အုတ်ဖိုမြို့နယ်အပါ နတ်တလင်း၊ ပေါင်းတည်နဲ့ ပေါက်ခေါင်းမြို့တို့ကို စစ်ကောင်စီက ဖေဖော်ဝါရီ ၂ ရက် စစ်အုပ်ချုပ်ရေး ကြေညာထားတာလည်း ဖြစ်ပါတယ်။

စာတည်း - နွေဦးငြိမ်းချမ်း

#မြေလတ်အသံ#သတင်း #ပဲခူးအနောက်ခြမ်း #အုတ်ဖို #ပျူစောထီး #PDF #ပစ်ခတ်ရှင်းလင်း #စစ်ကောင်စီ #ပဲခူးရိုးမ