“ဆရာ၊ဆရာမတွေအိမ်တွေပါ ရေဝင်နေတာလေ။ အိပ်ဖို့နေဖို့ခက် ပစ္စည်းပြောင်းရွှေ့ဖို့ အကူအညီ မရ။ စားသောက်ချက်ပြုတ်ဖို့လည်း အဆင်မပြေဖြစ်နေကြတာ။ အိမ်တွေရေမြုပ်နေလည်း ကိုယ့်အိမ် ကိုယ့်ပစ္စည်းကို မသယ်နိုင်ဘူး။ တာဝန်ကျရေဝင်ကျောင်းတွေကို ရေဂျူတီသွားစောင့်ရပါတယ်”
"အဲနေ့က (ဇူလိုင် ၁၆) တရက်တည်းပဲ အလောင်းတွေကို အကုန်ပြန်တွေ့ရတယ်။ အလောင်းတွေကတော့ဆေးရုံကိုပို့တယ်။ အဲ့ကနေတဆင့် မိသားစုဝင်တွေဆီ ပြန်ရောက်ပြီး နာရေးကိစ္စတွေ ဆောင်ရွက်နေကြတယ်"
“အဓိက ကတော့ ဆန်၊ ဆီနဲ့ သောက်ရေလိုအပ်တာပါ။ လက်ရှိကတော့ အိမ်ကပါလာတာတွေရယ် စကစ က လာပို့တဲ့ တအိမ်ထောင် ဆန် ၃ ပြည်လောက်ပေးတာပဲ ရှိတယ်၊ မလောက်ငှဘူး။ ကျန်းမာရေးအတွက် အထူးသဖြင့်ဝမ်းရောဂါမဖြစ်ဖို့ သောက်သုံးရေလိုအပ်တယ်။ ဆေးဝါးလည်း ပါတာပေါ့၊ လက်ရှိတာ့ ကျန်းမာရေးဆိုးဆိုးဝါးဝါးဖြစ်တာမျိုး မရှိသေးဘူး”
"ရေက တရွာလုံးနစ်သွားတာ။ အကုန်လုံးက မပြေလည်သူများတယ်လေ။ သောက်သုံးရေကအစ လုံးဝအခက်တွေ့ကုန်တယ်။ အခု သင်္ချိုင်းနဲ့ဇရပ်တွေမှာ နေနေကြရတယ်။ မိသားစုတွေလည်း အများကြီးပဲ။ ကလေးတွေ လောက်ပဲထမင်းစားကြရတယ်။ လူကြီးတွေက ကောင်းကောင်း မစားကြရဘူး။ ရေဖြစ်ဖြစ်၊ စားစရာဖြစ်ဖြစ် အကူအညီရရင်တော်သေးတာပေါ့”
စစ်ကိုင်းတိုင်း၊ မြောင်မြို့နယ် အနောက်တောင်ခြမ်းမှာ ၁၀ ရက်ကျော်တဲ့အထိ ရေမကျသေးလို့ ကျေးရွာ ၂၀ ကျော်ခန့် ရေနစ်မြုပ်နေပြီး ပြည်သူတွေဒုက္ခရောက်နေကြတယ်လို့ သိရပါတယ်။
“နှမ်းခင်းစိုက်ဧက သောင်းချီပျက်ကုန်တာ။ နှမ်းခင်းတွေ ဘာမှလုပ်မရတော့ဘူး။ ခုနှစ်က နှမ်းတွေလည်း ကောင်းသလို၊ လူတိုင်းနှမ်းစိုက်တာ နှမ်းကရေဝပ်တာနဲ့ သေတာလေ”
ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုတ်သုံလေအားကောင်းရာကနေ အားအလွန်ကောင်းနေခြင်းနဲ့ တောင်တရုတ်ပင်လယ်ပြင်ရှိ လေဖိအားနည်းဆဲလ်က ရွေ့လျားလာတဲ့ တိမ်တိုက်တွေကြောင့် ဇူလိုင် ၁၆ ရက်ကနေ ၂၀ ရက်အတွင်းမှာ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ရခိုင်ပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ မိုးကြီးပြီး လေပြင်းတိုက်နိုင်တယ်လို့ ဆိုပါတယ်။
"ပျောက်ဆုံးနေသူတွေ အသက်ရှင်လျက်ပြန်တွေ့ရဖို့ကတော့မျှော်လင့်ချက်တော့နည်းနေပြီ။ ဒါပေမယ့် ဆက်ရှာနေကြတယ်။ ပြန်တော့မတွေ့ကြသေးဘူး"
"အနောက် လက်ခုတ်ပင်ရွာ ရွာဝင်လမ်းတောင် မြုပ်နေပြီ၊ ရွာတော့ အတော် မြုပ်လောက်ပြီ။ အဆင်ပြေသလို အမြင့်ပိုင်းတွေ ရွှေ့နေကြတာ၊ ခုလည်း မိုးရွာနေတယ်။"
“ ချောင်းက ရေစီးသန်နေတော့ မျောပါသွားပြီး သူ ရေစကူးတယ်လို့ ယူဆရတဲ့နေရာနဲ့ ဓါတ်တိုင် ၄ ခန်း အကွာလောက်မှာ ပြန်တွေ့တာ။ ချောင်းကလည်း လူတရပ်လောက်နက်ပြီး ဓါတ်တိုင်ခန်းဝက်ကျော် ကျယ်တာ”
ပဲခူးတိုင်းအနောက်ခြမ်း၊ ဧရာဝတီမြစ်ကမ်းတလျောက်ရှိ ပန်းတောင်းမြို့နယ်နဲ့ မိုးညိုမြို့နယ်အတွင်းက ကျေးရွာအချို့ကို ဧရာဝတီမြစ်ရေတက်လာပြီး နေအိမ်တွေနစ်မြုပ်နေတယ်လို့ ဒေသခံတွေဆီက သိရပါတယ်။
"မြစ်ကမ်းပါး ပြိုကျတယ်။ တာခြေနဲ့ အရမ်းနီးကပ်နေပြီလေ။ ဒီအတိုင်းဆို ရေကာတာကျိုးပေါက်မယ့် အခြေအနေနဲ့ ရင်ဆိုင်နေရတာ။”
"လူတွေအထိအခိုက်တော့ မရှိဘူး။ ပျက်စီးသွားတဲ့ အိမ်တွေရဲ့အခြေအနေကိုတော့ ရေပြန်ကျမှ သိရမယ်ဗျ။ အခုထိတော့ ရေက မကျသေးဘူးဗျ။"
“မာကလာကုန်း ရေဝင်နေပြီ။ သူတို့တံတားထိပ်(နဝင်းတံတား)မှာ တဲတွေထိုးနေကြပြီ။ ရေတက်ကြမ်းတယ်။ ဒီညနေစရွှေ့ကြပြီ။ မြစ်ရေက ချောင်းရေထက်မြင့်နေပြီ။ နဝင်းချောင်းကော လော့သော်ချောင်းပါ ရေတက်နေပြီ။ စကစ ဘက်ကတော့ ကူညီကယ်ဆယ်ရေး ဘာမှလုပ်တာမမြင်သေးဘူး။ ပရဟိတအဖွဲ့တွေကတော့ ပြင်ဆင်နေကြတယ်။ အရင်ရက်ကတည်းက ကယ်ဆယ်ရေးအတွက်။”
မန္တလေးတိုင်း၊ စဉ့်ကူးမြို့နယ်အတွင်းက ကျေးရွာတွေနဲ့ စစ်ရှောင်နေရာတွေမှာ ဇွန်လနှောင်းပိုင်းကစလို့ ဧရာဝတီမြစ်ရေ ကြီးလာတာကြောင့် ဒေသခံပြည်သူတွေနဲ့ စစ်ရှောင်တွေမှာ အခက်အခဲမျိုးစုံကြုံတွေ့နေကြရတယ်လို့ ရွှေဘိုမြို့နယ် လွတ်လပ်သောထောက်ပို့ရေးအဖွဲ့ ဆီက သိရပါတယ်။
Sharing Information to the Local