ကန့်ဘလူမှာ ပြည်သူ ၃၇ ဦးဖမ်းဆီးခံရပြီး ၅ ဦးသာပြန်လွတ်

စစ်ကိုင်းတိုင်း၊ ကန့်ဘလူမြို့နယ်၊ ကိုင်းမနဲ့ ရှားချောင်းကျေးရွာကနေ စစ်ကောင်စီတပ်သားတွေနဲ့ ပျူစောထီးအဖွဲ့တွေဖမ်းဆီးသွားတဲ့ ဒေသခံ ၃၇ ဦးအနက် ၅ ဦးသာ ပြန်လွတ်လာတယ်လို့ ကိုးတောင်ဘိုတိုက်နယ် စစ်မြေပြင်ထောက်လှမ်းရေးအရာရှိ - IO ဆီက သိရပါတယ်။

ဒီဇင်ဘာ ၁၆ ရက် မနက် ၅ နာရီကျော်ခန့်မှာ ပျူစောထီးအားကောင်းတဲ့ ကိုးတောင်ဘို့ကျေးရွာက စစ်ကောင်စီနဲ့ပျူစောထီး အင်အား ၅၀ ကျော်ဟာ ကိုင်းမရွာနဲ့ ရှားချောင်းရွာကို ဝင်ရောက်စီးနင်းပြီး ဒေသခံတွေကို ဖမ်းဆီးသွားတာလို့ ဆိုပါတယ်။

ဖမ်းဆီးပြီး ၃ ရက်အကြာ ဒီဇင်ဘာ ၁၉ ရက် ညနေပိုင်းအထိ ဖမ်းဆီးခံလိုက်ရသူတွေထဲက ကိုင်းမရွာနေ ကိုလင်းလင်းနဲ့ ရှားချောင်းကျေးရွာနေ မင်းခိုင်၊ မို့မို့သင်း၊ ဒေါ်စန်းနု၊ ဝင်းထွဋ်အောင် တို့ကိုသာ ပြန်လွှတ်ပေးလိုက်ပြီး ကျန်သူတွေကို ဆက်လက်ဖမ်းဆီးထားတယ်လို့ ဆိုပါတယ်။

"သူတို့ကို ဘာတွေတောင်းဆိုဖို့ ပြန်လွှတ်လိုက်တယ်ဆိုတာ မမေးရသေးဘူး။ လောလောဆယ်တော့ ကျနော်တို့ဆီမှာ ခေါ်ထားတယ်။ မေးမြန်းရဦးမယ်။"လို့ ကိုးတောင်ဘိုတိုက်နယ် IO ကပြောပါတယ်။

ကိုးတောင်ဘို့ရွာကို PDF တွေဘက်က ရိက္ခာလမ်းကြောင်းတွေဖြတ်တောက်ထားတာကြောင့် ရိက္ခာရဖို့ အတွက် ပြည်သူတွေကိုဝင်ရောက်ဖမ်းဆီးပြီး ရိက္ခာနဲ့လဲချင်တာဖြစ်နိုင်တယ်လို့  သူကခန့်မှန်း ပြောဆိုပါတယ်။

"ရွာတွေကို အရပ်သားပုံစံမျိုးနဲ့ သူလိုလိုငါလိုလိုနဲ့ ဝင်စီးသွားတယ်။ ဒေသခံတွေကိုလည်း (ရှောင်)တိမ်းခိုင်းထားပေမယ့် ရွာထဲမှာဝင်အိပ်တဲ့လူတွေလည်း ရှိနေတယ်။ အဲ့နေ့က ဖုန်းလိုင်းလည်း ဖြတ်တောက်လိုက်တော့ သတင်းက ထောက်မရဖြစ်သွားတယ်။ ဖုန်းလိုင်းဖြတ်ပြီးမှာ ရွာကိုဝင်ဖမ်းတာ။"လို့ ကိုးတောင်ဘိုတိုက်နယ် IO တာဝန်ခံက ပြောပါတယ်။

ဖမ်းဆီးခံရသူတွေထဲမှာ အသက် ၁၄ နှစ် ကနေ အသက် ၆၀ အတွင်းရှိ အမျိုးသမီး ၁၁ ဦး အမျိုးသား ၂၆ ဦးဖြစ်တယ်လို့ သိရပါတယ်။

ဖမ်းဆီးခံရသူတွေထဲမှာ ရှားချောင်းကျေးရွာက ဒေါ်စန်းနု၊ မောင်ရှင်းသန့်၊ ကျော်ဆွေ၊ သိန်းမောင်ကြီး၊ ကျော်စိုးနိုင်၊ ဝင်းထွန်းအောင်၊ မဇင်မြတ်မိုး၊ ဦးသန်းဝင်း၊ မျိုးခန့်၊ ဇော်ဝင်း၊ မို့မို့သင်း၊ ခိုင်စိုးသန်း၊ ဦးကံထူး၊ ကိုငပေါက်၊ ဦးထွန်းခိုင်၊ မတထွာ၊ ဦးလွင်၊ ကိုသက်ပိုင်၊ ကိုချစ်စန်း၊ မထွေး၊ အာကာမိုး၊ မူမူ၊ မင်းခိုင်၊ ဦးဝင်းစိန်၊ မခိုင်ဇင်ဖြိုး၊ ဦးကျော်လှိုင်တို့ဖြစ်ပြီး ကိုင်းမရွာက ဦးရဲပု၊ ဒေါ်ညိုလှ၊ သိန်းအောင်၊ ဒေါ်မိုးခိုင်၊ ဇော်မင်းခိုင်၊ ဦးလင်းလင်း၊ ဘချစ်၊ ဦးဖိုးထောင်၊ ဒေါ်အုန်းတင်၊ မနန်းနေခြည်တို့ ပါဝင်ပါတယ်။ 

ကိုင်းမရွာနဲ့ ရှားချောင်းရွာတို့ဟာ ကိုးတောင်ဘိုကျေးရွာနဲ့ မီတာ ၁၆၀၀ ခန့်သာဝေးကွာတဲ့အတွက် ဒေသခံတွေကို ကျေးရွာထဲမှာမနေထိုင်ကြဖို့ လွန်ခဲ့တဲ့ ၅ လခန့်ကတည်းက ဒေသခံကာကွယ်ရေးတပ်ဖွဲ့တွေဘက်ကသတိပေးထားတဲ့အတွက် ဒေသခံတွေဟာ ရွာပြင်ပမှာနေထိုင်နေကြတယ်လို့ ဆိုပါတယ်။ 

ဒါပေမယ့် ဒေသခံအချို့ကတော့ ခုလပိုင်းတွေမှာကျေးရွာအနီးကလယ်တွေမှာ လယ်ရိတ်၊ ပေါင်းနုတ် လုပ်ငန်းတွေကြောင့် လုပ်ငန်းခွင်ဝင်တဲ့အတွက် ကျေးရွာထဲမှာယာယီပြန်နေထိုင်ချိန်မှာ ယခုလို ဖမ်းဆီးခံလိုက်ရတာ ဖြစ်ပါတယ်။

ကိုးတောင်ဘို့ရွာကို ဒေသခံကာကွယ်ရေးတပ်တွေဘက်က ရိက္ခာသယ်လမ်းကြောင်းတွေကို ပိတ်ဆို့ထားတာ ၂ နှစ်ကျော်ရှိပြီဖြစ်တဲ့အတွက် ကျေးရွာအတွင်းမှာ ငပိ၊ ဆန်၊ ဆီ၊ ဆားတွေကအစ ပြတ်လပ်နေပြီး ကျေးရွာအတွင်း စစ်ကောင်စီနဲ့ပျူအင်အား ၂၀၀ ခန့်ရှိနေတယ်လို့ အထက်ပါ IO ကပြောပါတယ်။ 

ကိုင်းမကျေးရွာမှာ အိမ်ခြေ ၂၀၀ ခန့်ရှိပြီး ၂၀၂၂ ခုနှစ်ကနေ ၂၀၂၄ ခုနှစ်အတွင်း ၃ ကြိမ်မီးရှို့ခံရလို့ အိမ်ခြေ ၁၀၀ ကျော်မီးလောင်ပျက်စီးထားကာ အိမ်ခြေ ၁၀၀ ခန့်ရှိတဲ့ရှားချောင်းရွာကတော့ နေအိမ် ၂ လုံးမီးရှို့ဖျက်ဆီးခံထားရတယ်လို့ သိရပါတယ်။

နိုဝင်ဘာ ၄ ရက်ကလည်း ကန့်ဘလူမြို့နယ်အတွင်းရှိ ဘူကြီး၊ ကျီကုန်း၊ ထန်းကုန်း၊ ကိုင်းတော၊ လိတ္တူကျေးရွာတွေကနေ အမျိုးသား ၁၀၀ ခန့်ကို စစ်ကောင်စီစစ်ကြောင်းက စစ်မှုထမ်းဖို့ဖမ်းဆီး ခေါ်ဆောင်သွားခဲ့ပါသေးတယ်။ 

ပုံစာ - ကန့်ဘလူမြို့နယ်၊ အိုင်ပေါင်းချောင်ရွာကဒေသခံတွေကို စစ်ကောင်စီကစီးနင်းဖမ်းဆီးစဥ်။ (ပုံဟောင်း)

စာတည်း - လင်း 

#မြေလတ်အသံ

#ကန့်ဘလူ #ဒေသခံ #ပျူစောထီး #ဖမ်းဆီး