ကန့်ဘလူမှာ စစ်ကောင်စီစစ်ကိုင်းတိုင်းဝန်ကြီးချုပ်ရဲ့ခယ်မအပါ ၆ ဦးကို စစ်ကောင်စီဖမ်းဆီး

စစ်ကိုင်းတိုင်း၊ ကန့်ဘလူမြို့နယ်၊ ကာဘိုးကျေးရွာမှာ စစ်ကောင်စီစစ်ကိုင်းတိုင်းဝန်ကြီးချုပ် ဦးမြတ်ကျော်ရဲ့ခယ်မ အပါအဝင် ၆ ဦးဖမ်းဆီးခံရတယ်လို့ ကာဘိုးတိုက်နယ်ဒေသကာကွယ်ရေးအဖွဲ့ဝင်တဦးထံက သိရပါတယ်။

မတ် ၃ ရက် မနက် ၉ နာရီခန့်မှာ စစ်ကောင်စီအင်အား ၂၀ ကျော်လောက်က ကျေးရွာထဲကို ကားတွေနဲ့ဝင်လာပြီး ဦးမြတ်ကျော်ရဲ့ ခယ်မဖြစ်သူ ဒေါ်ကေသီ ၊ ကိုအောင်ကျော်၊ ဦးမျိုးဝင်းမောင်၊ ဒေါ်ဝင်းတင့်နဲ့ နောက်ထပ်အမျိုးသမီး ၂ ဦး စုစုပေါင်း ၆ ဦးကို ၎င်းတို့ရဲ့နေအိမ်တွေကနေ အသီးသီးဖမ်းဆီးခေါ်ဆောင်သွားတာလို့ ဆိုပါတယ်။

"သူတို့ဘက်က မသင်္ကာဘူးဆိုပြီး လာဖမ်းသွားတာပဲ။ ကာဘိုးက စကစကုန်းရှိတယ် တပ်စွဲထားတာ။ ဖမ်းခံရတဲ့ရွာခံအချို့လည်း သာမန်ဒေသခံတွေပဲ။ အရက်ရောင်းတာ၊ လက်ဖက်ရည်ရောင်းတာတွေပဲ။"လို့ ကာဘိုးတိုက်နယ် ဒေသကာကွယ်ရေးတာဝန်ရှိသူတဦးက မြေလတ်အသံကို ပြောပါတယ်။

ဖမ်းဆီးခံရသူတွေထဲမှာ အမည်မသိအမျိုးသမီး ၂ ဦးက  အရပ်သားအစိုးရလက်ထက် စစ်ကိုင်းတိုင်းဝန်ကြီးချုပ် ဒေါက်တာမြင့်နိုင်ရဲ့ ဇနီး ဒေါ်ရီခင်နဲ့သမီးဖြစ်သူတို့ဖြစ်တယ်လို့ သတင်းတွေ ထွက်ပေါ်နေပြီး အတည်ပြုနိုင်ဖို့စုံစမ်းနေတယ်လို့ သူကဆက်ပြောပါတယ်။

စစ်ကောင်စီအဖွဲ့ဝင်တွေဟာ ဖမ်းဆီးထားသူ ၆ ဦးကို ကန့်ဘလူမြို့အခြေစိုက် ၆၀၀၆ တင့်ကားတပ်ထဲကိုခေါ်ဆောင်သွားခဲ့တာဖြစ်ပြီး မတ် ၅ ရက် ဒီကနေ့ နေ့လယ်ပိုင်းအထိ ဖမ်းဆီးခံရသူတွေနဲ့အဆက်အသွယ်မရဘူးလို့ ဆိုပါတယ်။

ကာဘိုးကျေးရွာဟာ စစ်ကောင်စီခန့်စစ်ကိုင်းတိုင်းဝန်ကြီးချုပ် ဦးမြတ်ကျော်ရဲ့ ဇာတိကျေးရွာဖြစ်ပြီး အဆိုပါကျေးရွာကို စစ်ကောင်စီတပ်က ထိန်းချုပ်ထားကာ ကျေးရွာထဲမှာ စစ်ကောင်စီတပ်အင်အား ၅၀ ကျော်နဲ့ စခန်းအထိုင်ချတပ်ဆွဲထားတယ်လို့ သိရပါတယ်။

ဖေဖော်ဝါရီ ၂၃ ရက်ကလည်း ငှက်ပျောတိုင်းကျေးရွာမှာတပ်စွဲထားတဲ့ စစ်ကောင်စီတပ်ဖွဲ့ဝင် ၁၅ ဦးခန့်က ငှက်ပျောတိုင်း-ကျေးပင်အက်လမ်းအတိုင်း ကင်းလှည့်နေစဥ် ရွှေကပ်ကျော် ဘုရားအနီးမှာ လူ ၇ ဦးကို ဖမ်းဆီးခဲ့ပြီး ၄ ဦးကို သေနတ်နဲ့ပစ်သတ်ခဲ့တယ်လို့ သိရပါတယ်။

ပုံစာ - စစ်ကောင်စီခန့်စစ်ကိုင်းတိုင်းဝန်ကြီးချုပ် ဦးမြတ်ကျော်။

စာတည်း - ဟိန်းစံ

#မြေလတ်အသံ

#ကန့်ဘလူ #ကာဘိုး #စစ်ကိုင်းတိုင်းဝန်ကြီးချုပ် #ခယ်မ #ဖမ်းဆီး