ကပစ ၂၁ က စစ်သားတွေ မိုင်းဆွဲခံရ

မကွေးတိုင်း၊ ဆိပ်ဖြူမြို့နယ်၊ ကန်ဇွန်းမအုပ်စု၊ ကျွန်းချောင်းရွာကိုလာတဲ့ ကပစ ၂၁ က စစ်သားတွေကို မိုင်းဆွဲတိုက်ခိုက်ရာ သေဆုံးမှုတွေရှိခဲ့တယ်လို့ ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့ဆီက သိရပါတယ်။ 

ဒီဇင်ဘာ ၅ ရက်နေ့လယ် ၂ နာရီဝန်းကျင် စစ်သားတွေက ကျေးရွာထဲကိုဝင်ရောက်ချိန်မှာ မိုင်းကြီး ၁ လုံးနဲ့ တိုက်ခိုက်ခဲ့တာလို့ ဆိုပါတယ်။ 

“ကျနော်တို့ ကျွန်းချောင်းရွာအလယ်ခေါင်မှာ မိုင်းဆွဲခဲ့တာ၊ ၄ ယောက်ကတော့ သေဆုံးတယ်”လို့ ဆိပ်ဖြူဘာမထီ ပြည်သူ့ကာကွယ်ရေးတပ်ဗိုလ်မိုင်းရှင်းက ပြောပါတယ်။ 

စုစုပေါင်းစစ်သားအင်အား ၁၅၀ ပါဝင်ကာ ၁၀၀ လောက်က ကျေးရွာတဝိုက်မှာ စောင့်ကာ ၄၀ ဝန်းကျင်ကပဲ ကျေးရွာထဲကိုဝင်ရောက်လာတာဖြစ်ပြီး ဝင်လာတဲ့စစ်သားတွေကို တိုက်ခိုက်ခဲ့တာလို့ ဆိုပါတယ်။

တိုက်ခိုက်ခံရပြီးနောက် စစ်ကြောင်းဟာ ပုသိမ်-မုံရွာလမ်းစုံဘက်ကို ပြန်သွားကာ အလောင်းတွေကိုတော့ ကျေးရွာထဲမှာထားခဲ့တယ်လို့ ဗိုလ်မိုင်းရှင်းက ပြောပါတယ်။ 

ဒီဇင်ဘာ ၅ ရက် စစ်သားတွေဝင်ရောက်လာချိန်မှာ ကျေးရွာသူ၊ ကျေးရွာသားတွေက ရွာက ထွက်ပြေးခဲ့ကြပြီး ဒီဇင်ဘာ ၆ ရက်မှ ရွာထဲကို ပြန်ဝင်လာခဲ့ကြပါတယ်။ ဝင်ရောက်ချိန်မှာ စစ်သားအလောင်းတွေကိုတွေ့ရှိပြီး မီးရှို့သင်္ဂြိုဟ်ပေးခဲ့ကြတယ်လို့ ဒေသခံတွေရဲ့ ပြောပြချက်အရ သိရပါတယ်။ 

မိုင်းဆွဲခံရတဲ့ စစ်ကြောင်းဟာ ရွာကပြန်မထွက်ခင်မှာ ကျွန်းချောင်းရွာထဲက အိမ် ၂ လုံးကို မီးရှို့သွားခဲ့ပါသေးတယ်။ 

ပြီးခဲ့တဲ့ ဒီဇင်ဘာ ၄ ရက်ကလည်း ဆိပ်ဖြူမြို့နယ်၊ ကန်ဇွန်းမရဲစခန်းကို ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့က ဝင်ရောက်တိုက်ခိုက်ခဲ့ရာ စစ်သား ၅ ဦး ရဲ ၂ ဦးသေဆုံးပြီး ၂၅ ဦးဒဏ်ရာရခဲ့တယ်လို့ သိရပါတယ်။

ပုံစာ - ကာကွယ်ရေးတပ်တွေ မိုင်းဆွဲတိုက်ခိုက်ခဲ့သည့်နေရာ။ 

စာတည်း - လင်း 

#မြေလတ်အသံ

#မကွေး #ဆိပ်ဖြူ #ကျွန်းချောင်းရွာ #မိုင်းဆွဲ #စစ်ကောင်စီ #တိုက်ခိုက် #သတင်း #မြေလတ်သတင်