ကမ္မမြို့ဈေးထဲက ဆိုင်ခန်းတွေကိုဖောက်ပြီးပြန်လာတဲ့ စစ်သားတွေ ဒရုန်းနဲ့ ဗုံးကြဲတိုက်ခိုက်ခံရ (ရုပ်/သံ)

မကွေးတိုင်း၊ ကမ္မမြို့ စည်ပင်သာယာဈေးက ဆိုင်ခန်းတွေကို ဖောက်ပြီးပြန်လာတဲ့ စစ်ကောင်စီစစ်ကြောင်းကို ဒီဇင်ဘာ၂၆ ရက်က ကမ္မမြို့ ရဲစခန်းအနီးမှာ ဒရုန်းနဲ့ ဗုံးချတိုက်ခိုက်ခဲ့တယ်လို့ ကမ္မဒေသတော်လှန်ရေး တပ်ပေါင်းစုဆီက သိရပါတယ်။

တပ်မ ၁၀၁ က အင်အား ၁၃၀ ခန့်ရှိတဲ့ စစ်သားတွေဟာ  ဒီဇင်ဘာ၂၄ ရက်မှာ ကမ္မမြို့၊ ညောင်ဂျစ်ပင်ရွာကနေ စတင်စစ်ကြောင်းထိုးကာ ၂၆ ရက်မှာ ကမ္မမြိို့ပေါ်ကိုရောက်လာတာလို့ ဆိုပါတယ်။

အဲဒီစစ်ကြောင်းဟာ ဒီဇင်ဘာ၂၆ ရက် မနက် ၇ နာရီခန့်မှာ ကမ္မမြို့ပေါ် စည်ပင်သာယာဈေးက ဈေးဆိုင်ခန်းတွေကိုဖောက်ပြီး ပစ္စည်းတွေကိုယူဆောင်သွားတာလို့ ဆိုပါတယ်။

ဈေးဆိုင်ခန်းတွေကို ဖောက်ပြီး ကမ္မမြို့ရဲစခန်းကိုပြန်ချိန် မနက် ၈ နာရီခန့်မှာ ဒရုန်း ဗုံးသီး ၅၀ လုံးနဲ့ တိုက်ခိုက်ခဲ့ပြီး ထိခိုက်သေဆုံးမှုကိုမသိရသေးဘူးလို့ ကမ္မဒေသ တော်လှန်ရေးတပ်ပေါင်းစု တာဝန်ခံက ပြောပါတယ်။

ဖောက်ထွင်းခံခဲ့ရတဲ့ ဈေးဆိုင်ခန်း ၈ ခန်းလောက်ရှိပြီး ငွေကျပ် ၁၀ သိန်းဖိုးလောက် ပါသွားတယ်လို့ဆိုပါတယ်။

ဒီတိုက်ခိုက်မှုကိုတော့ ကမ္မဒေသ တော်လှန်ရေးတပ်ပေါင်းစု၊ Three Brothers Drone Force၊ Black Eagle Drone Force၊ ပေါက် ပကဖ Drone Team၊  BLY ပြည်သူ့ကာကွယ်ရေးအဖွဲ့ ၊ မြိုင် ပကဖ Drone အဖွဲ့ ၊ MGPDF(ဂဠုန်ပြည်သူ့ကာကွယ်ရေးတပ်ဖွဲ့) ၊ မကွေးတိုင်း Drone Team ၊ မဟာမိတ် Drone အဖွဲ့တို့က ပူးပေါင်းတိုက်ခိုက်ခဲ့တာလို့ သိရပါတယ်။

ဒီဇင်ဘာ ၂၇ ရက် ဒီနေ့မနက်မှာ ကမ္မမြို့ပေါ်ရောက်နေတဲ့ ပခုက္ကူ တပ်မ ၁၀၁ က စစ်သားတွေဟာ ကမ္မမြို့အရှေ့ခြမ်းက ရွာတွေကို စစ်ကြောင်းထိုးနေတယ်လို့ သိရပါတယ်။

တည်းဖြတ်-HP

#မြေလတ်အသံ

#မကွေး #ကမ္မ #စစ်ကြောင်း #တိုက်ခိုက် #သတင်း