ကျည်ရှားပါးမှုပြဿနာကိုဖြေရှင်းဖို့ တတောင့်ထိုးကာဘိုင်သေနတ်ကို MBT တပ်ဖွဲ့ထုတ်လုပ် (ရုပ်/သံ)

စစ်ကောင်စီနဲ့တိုက်ပွဲတွေမှာ ကျည်ရှားပါးမှုပြဿနာကို ဖြေရှင်းနိုင်ဖို့ Myingyan Black Tiger-MBT မြင်းခြံခရိုင်တပ်ရင်း ၉ အဖွဲ့က ၅.၅၆ ကျည်သုံး တတောင့်ထိုးကာဘိုင်သေနတ်ကို စမ်းသပ်ထုတ်လုပ်နိုင်ခဲ့တယ်လို့  သိရပါတယ်။ 

ကာဘိုင်သေနတ်ကို ပြီးခဲ့တဲ့ အောက်တိုဘာ ၁၇ ရက်မှာ စမ်းသပ်ထုတ်လုပ်ခဲ့တာ ဖြစ်ပြီး နိုဝင်ဘာ ၈ ရက်မှာ စမ်းသပ်ပစ်ခတ်ခဲ့တယ်လို့ Myingyan Black Tiger-MBT မြင်းခြံခရိုင်တပ်ရင်း ၉ ခေါင်းဆောင်ဗိုလ်မိုက်ခဲက ပြောပါတယ်။

အဲဒီကျည်တတောင့်ထိုး ကာဘိုင်အမျိုးအစားသေနတ်ဟာ ကာဘိုင်အစစ်ရဲ့ နည်းပညာကိုအသုံးပြုပြီး ထုတ်လုပ်ရေးပိုင်းဆရာတွေက ဒီဇိုင်းပြောင်းပြီး ထုတ်လုပ်ထားတယ်လို့ ဗိုလ်မိုက်ခဲက ပြောပါတယ်။

အညာဒေသမှာ ၇.၆၂ ကျည်တတောင့်ကို ၁၀,၀၀၀ ဝန်းကျင်ရှိပြီး ၅.၅၆ ကျည်တတောင့်ကို ၅,၀၀၀ ဝန်းကျင်သာရှိတဲ့အတွက် စျေးနည်းပြီးဝယ်ရလွယ်ကူတဲ့ ၅.၅၆ ကျည်သုံး ကာဘိုင်ကိုထုတ်လုပ်ခဲ့တာလို့ ဆက်ပြောပါတယ်။

ကာဘိုင်အစစ် ၁ လက်ကို မြန်မာကျပ် သိန်း ၁၀၀ ဝန်းကျင်ပေးရကာ အခု ကာဘိုင်သေနတ် ထုတ်လုပ်ရာမှာ စုစုပေါင်း ၄ သိန်းကျော်ပဲ ကုန်ကျတယ်လို့ ဗိုလ်မိုက်ခဲက ပြောပါတယ်။

ဒါ့အပြင် အဲဒီကာဘိုင်သေနတ်တွေကို MBT တပ်ဖွဲ့ ရဲဘော်တွေကို အရင်ဆုံးဖြည့်တင်းပြီး နောက်ပိုင်း ညီနောင်မဟာမိတ်အဖွဲ့တွေကိုလည်း ပြန်လည် မျှဝေသွားဖို့ရှိတယ်လို့ ဆိုပါတယ်။

တည်းဖြတ် - HP

#မြေလတ်အသံ

#မြင်းခြံ #MBT #ကာဘိုင် #သေနတ် #ထုတ်လုပ်ရေး