ကျောက်ထုအမြောက်တပ်ကပစ်လိုက်တဲ့ လက်နက်ကြီးကျည်ရွာထဲကျလို့ ကလေးငယ် ၃ ဦး ဒဏ်ရာရ

မကွေးတိုင်း၊ ကျောက်ထုမြို့ အမြောက်တပ်ပစ်တဲ့ ၁၂၀ မမ လက်နက်ကြီးကျည် ၁လုံး ကျေးရွာအတွင်းကို ကျရောက်ပေါက်ကွဲခဲ့လို့ ၁၀ နှစ်အရွယ် မိန်းကလေး ၃ ဦး ထိခိုက်ဒဏ်ရာရခဲ့တယ်လို့ သိရပါတယ်။

ဒီဇင်ဘာ ၆ ရက် မနက် ၈ နာရီခွဲလောက်မှာ ကျောက်ထုအမြောက်တပ်ကပစ်တဲ့ ၁၂၀ မမ လက်နက်ကြီးကျည် ၁ လုံး တေးကျေးရွာအတွင်းကျပြီး ၁၀ နှစ်အရွယ် မိန်းကလေး ၃ ဦးထိခိုက်ဒဏ်ရာ ရရှိခဲ့ပေမယ့် အသက်အန္တရာယ်တော့ မစိုးရိမ်ရဘူးလို့ ဒေသခံတဦးက ပြောပါတယ်။

"မနက် ၅ နာရီလောက်ကနေစပြီး ၈ ခွဲလောက်အထိပစ်ကြတာ ၄/၅ လုံးလောက်ရှိတယ်။ ကျန်တာတွေက ရွာဘေးက တောတောင်တွေထဲကျပေမယ့် အဲ့ ၁ လုံးက တေးရွာထဲကျတာ။ ကလေး ၃ ယောက်ဒဏ်ရာက မစိုးရိမ်ရပါဘူး။ ကုပြီးကြပြီ။" လို့ ကျောက်ထုဒေသခံတဦးက ဆိုပါတယ်။

လက်နက်ကြီးကျည်ပေါက်ကွဲလို့ ခိုင်းနွား ၁ ကောင်လည်း ထိခိုက်ဒဏ်ရာရရှိခဲ့ပြီး နေအိမ်လည်းအနည်းငယ် ထိခိုက်ပျက်စီးခဲ့ရပါတယ်။

စစ်ကောင်စီဘက်က ထောက်ပို့ကားတန်းတွေ ကျောက်ထုကိုဖြတ်ပြီး ချင်းပြည်နယ်ဖက်ကိုတက်တဲ့အခါ ကျောက်ထုအမြောက်တပ်ကနေ လက်နက်ကြီးပစ်ကူပေးတာမျိုးရှိပြီး မင်းတပ်ဖက်မှာတိုက်ပွဲရှိရင်လည်း လက်နက်ကြီးပစ်ကူပေးတာမျိုး လုပ်လေ့ရှိပါတယ်။

ဒီအခြေအနေနဲ့ပတ်သက်ပြီး ကျောက်ထုအမြောက်တပ်က CDM ဗိုလ်ကြီးတဦးကတော့ "လာရောက်တိုက်ခိုက်ခံရမှာစိုးရိမ်ရင် တော်လှန်ရေးတပ်ဖွဲ့တွေရဲ့စုဖွဲ့မှုပျက်ပြားအောင် ပစ်တတ်တာမျိုးရှိတယ်။ အဓိက,ကတော့ လူ၊လက်နက်အင်အားအရ နယ်မြေရှင်းလင်းရေး မသွားနိုင်ဘူးဆိုရင် ပစ်ကြတာပေါ့။"လို့ ပြောပါတယ်။

ကျောက်ထုအမြောက်တပ်ကနေ လက်နက်ကြီးနဲ့ ကျေးရွာတွေဘက်ကိုပစ်ခတ်တာ၊ ဒရုန်းနဲ့ဗုံးကြဲတာမျိုး မကြာခဏ လုပ်ဆောင်လေ့ရှိပြီး ပြီးခဲ့တဲ့ ဧပြီ ၅ ရက်ကလည်း လက်နက်ကြီးနဲ့ပစ်ပြီး ဒရုန်းနဲ့ဗုံးကြဲလို့ ပန်းဆန်ကျေးရွာအတွင်းက နေအိမ် ၁ လုံးကိုထိမှန်ကာ မိခင်ဖြစ်သူနဲ့အတူ ၁၄ နှစ်အရွယ်သမီး ၁ ဦးသေဆုံးခဲ့ပါတယ်။

ဓါတ်ပုံ - ယောအလင်းတန်း

သတင်း - Razor၊ စာတည်း - JCG

#မြေလတ်အသံ

#မကွေး #ကျောက်ထု #အမြောက်တပ် #လက်နက်ကြီး #ပစ်ခတ်