ကျောက်ရစ်ရဲစခန်းက စစ်သားတွေ RPG နဲ့ ပစ်ခံရလို့ စစ်သား ၄ ဦးသေဆုံးဟုဆို (ရုပ်/သံ)

စစ်ကိုင်းတိုင်း၊ မြောင်မြို့နယ်၊ ကျောက်ရစ်စခန်း ဘန်ကာရှေ့က စစ်သားတွေကို မေလ ၂၁ ရက် ညနေ ၂ နာရီခွဲကျော်မှာ RPG နဲ့ပစ်ခဲ့တဲ့အပြင် လက်နက်ငယ်တွေနဲ့ပါ ပစ်ခတ်ခဲ့လို့ ၄ ဦးသေဆုံးတယ်လို့ 11 Brothers Revolution Forces Myaung အဖွဲ့ဆီက သိရပါတယ်။

အင်အား ၁၀ ဦးခန့်ဟာ ဘန်ကာတွေရှေ့မှာ စုပြီးဖဲရိုက်နေစဉ် ပစ်ခဲ့တာကြောင့် ၄ ဦး သေဆုံးခဲ့တယ်လို့ 11 Brothers Revolution Forces Myaung ဗိုလ်ရာကျော်က ပြောပါတယ်။

"ညနေပိုင်းမှာ ဘန်ကာရှေ့မှာ ကင်းသမားတွေက ဖဲထိုင်ရိုက်နေတယ်ပေါ့။ လုပ်မယ်ဆို လုပ်လို့ရတယ်ဆိုပြီး ပြည်သူတဦးကသတင်းပေးတာ။ သွားပြီးတော့ပစ်ခတ်ခဲ့တာ။ ပထမတော့ လက်နက်ကြီး RPG နဲ့ ၁ ချက်ပစ်တယ်။ နောက်ပိုင်း ကျနော်တို့လက်နက်ငယ်တွေနဲ့ ပစ်တယ်။ ကျနော်တို့ပစ်ခတ်တဲ့အချိန်မှာ ၄ ကောင်သေတယ်။ ပစ်ပြီးတာနဲ့ ပြန်ဆုတ်လာခဲ့တယ်" လို့ ဗိုလ်ရာကျော်က ပြောပါတယ်။

ပစ်ခတ်မှုပြီးချိန်မှာ ၂ဦးကတော့ ပွဲချင်းပြီးသေဆုံးပြီး ကျန်၂ဦးလည်း ဒဏ်ရာပြင်းထန်ပြီး နောက်မှသေသွားတယ်လို့ မြေပြင်သတင်းပေးမှုအရ သိရတယ်လို့ ဆိုပါတယ်။