Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
- - စစ်ရှောင်
- - တိုက်ပွဲ
- - သဘာဝဘေး
ကျေးရွာအုပ်ချုပ်ရေးမှူးသားအဖ ဖမ်းခံရလို့ နောက်ထပ်ဒေသခံ ၃ ဦးဖမ်းခံရ၊ စုစုပေါင်း ၇ ဦးထိဖမ်းခံထားရ
စစ်ကိုင်းတိုင်း၊ ကလေးမြို့အနီး၊ စစ်ကောင်စီခန့် နှောညောင်ပင်ရွာဥက္ကဌ ဖမ်းဆီးခံရမှုနဲ့ပတ်သက်ပြီး ဒေသခံ ၃ ဦးကို စစ်ကောင်စီပူးပေါင်းအဖွဲ့တွေက ထပ်မံဖမ်းဆီးသွားခဲ့ပြီး ၁၂ ရက်ညကဖမ်းဆီးခံခဲ့ရတဲ့ ဒေသခံ ၁ ဦးပြန်လွတ်လာခဲ့တယ်လို့ နှောညောင်ပင်ရွာနဲ့နီးစပ်သူတဦးက ပြောပါတယ်။
ဒီဇင်ဘာ ၁၃ ရက် ည ၈ နာရီဝန်းကျင် စစ်ကောင်စီပူးပေါင်းအဖွဲ့က နှောညောင်ပင်ရွာက အသက် ၄၀ ကျော်ဝန်းကျင်အရွယ်တွေဖြစ်ကြတဲ့ ကိုမျိုးဝင်း၊ မယုနဲ့ မသိန်းသိန်းဌေးတို့ ထပ်မံဖမ်းဆီးခဲ့ပြီး အသက် ၃၀ ကျော်အရွယ် ကိုသိန်းသိန်းမင်းကတော့ ၁၃ ရက်မှာပဲ စစ်ကြောရေးကနေ ပြန်လွတ်လာခဲ့ပြီလို့ ဆိုပါတယ်။
နှောညောင်ပင်ရွာနဲ့နီးစပ်သူတဦးက " ၁၃ရက်နေ့ညမှာ ဖမ်းတဲ့ဟာတွေကိုကတော့ ညတွင်းချင်းစစ်ကြောရေးပို့တာဗျ။ ပျူစောထီး နွားထီးအဖွဲ့ရယ် ဒကစထဲအ၀င်ထွက်များတဲ့ အောင်မောင်းရယ် စစ်သားတချို့ရယ် ၀င်ဖမ်းတာဗျ။ သိန်းသိန်းမင်းကျတော့ သိန်းသိန်းဌေးနဲ့ လူမှားဖမ်းတာမို့ ပြန်လွတ်တာဗျ။ ကိုသိန်းသိန်းမင်းကိုလွှတ်ပေးပြီးမှ မသိန်းသိန်းဌေးကို ပြန်ဖမ်းတာဗျ။" လို့ ပြောပါတယ်။
ဖမ်းဆီးခံရသူတွေဟာ အရပ်သားအစိုးရလက်ထက် အုပ်ချုပ်ရေးမှူးဦးအောင်မြင့်ရီရဲ့မိသားစုဝင်တွေအများဆုံးဖြစ်ပြီး နှောညောင်ပင်ရွာဥက္ကဌ ဦးမောင်ရီကို ဒေသကာကွယ်ရေးတပ်က ဖမ်းဆီးတာနဲ့ဆက်စပ်ပြီး စစ်ကောင်စီက ဖမ်းဆီးသွားခဲ့တာလို့ သိရပါတယ်။
အဲ့ဒီလိုဖမ်းဆီးခံရပြီးတဲ့ နောက်မှာပဲ စစ်ကောင်စီက နှောညောင်ပင်ရွာနှင့် ကံပုလဲရွာက ဒေသခံတွေကို ငွေကြေးကောက်ခံပြီး ရွာဝင်ရွာထွက်ကဒ်ပြားတွေ လုပ်ခိုင်းနေတယ်လို့ ဆိုပါတယ်။
ရွာဝင်ရွာထွက်ကဒ်ပြားတွေကို ကံပုလဲရွာကစာသင်ကျောင်းမှာ စစ်ကောင်စီတပ်ကြပ် ၁ ဦးနဲ့ ရွာခံပျူစောထီးတွေပူးပေါင်းပြီး ၁ ကဒ်ကို ၁ ထောင်ကျပ်နှုန်းနဲ့ ဒေသခံတွေအားလုံး ကဒ်ပြားပြုလုပ်ရမှာဖြစ်ပြီး ကဒ်ပြားမရှိပါက စစ်ဆေးရေးဂိတ်တွေကိုဖြတ်သန်းခွင့်မရှိဘူးလို့ ပြောပါတယ်။
"အခက်ခဲကတော့ အများကြီးပဲဗျ။ အိမ်ထောင်စုမိတ္တူနဲ့ မှတ်ပုံတင်မိတ္တူပါပေးရတော့ အချက်အလက်အစုံကိုပေးရတာဆိုတော့ ဒီအချက်အလက်တွေကနေ လိုက်ဆွဲမှာတော့ ကြောက်ရတာအမှန်ပဲဗျ။ မလုပ်ရင်လည်း ကဒ်မပြနိုင်မထွက်ရဘူးဆိုတော့ မလုပ်ဘဲလည်း မနေရဲအခက်တော့အတော်လေးတွေ့တယ်ဗျ။" လို့ ကံပုလဲရွာသားတဦးက ပြောပါတယ်။
အဆိုပါ ကံပုလဲရွာမှာ အိမ်ခြေ ၄၀၀ နီးပါးရှိပြီး လူဦးရေ ၁,၀၀၀ ကျော်နေထိုင်သလို နှောညောင်ပင်ရွာမှာလည်း အိမ်ခြေ ၃၀၀ ကျော်ရှိပြီး လူဦးရေ ၁,၀၀၀ ဝန်းကျင်နေထိုင်တယ်လို့ သိရပါတယ်။
ဒီဇင်ဘာ ၁၂ ရက်ညက ဖမ်းဆီးခံရတဲ့ အသက် ၅၀ကျော်အရွယ် ကိုတင်မိုးဆွေ၊ အသက် ၆၀ ကျော်အရွယ် ဒေါ်ဝင်းနုနှင့် အသက် ၃၀ ကျော်အရွယ်မဇင်မာဖြူတို့ကတော့ ကလေး ဒေသကွပ်ကဲမှုစစ်ဌာနချုပ်မှာ စစ်ဆေးခံနေရဆဲ ဖြစ်ပါတယ်။
ဒီဇင်ဘာ ၁၂ ရက် မနက်အစောပိုင်းက နှောညောင်ပင်ရွာဥက္ကဌ ဦးမောင်ရီတို့ သားအဖ ၂ ဦးဟာ တောထဲကိုနွားကျောင်းသွားရင်း ဒေသကာကွယ်ရေးတပ်ရဲ့ဖမ်းဆီးခြင်းကို ခံခဲ့ရတာပါ။
နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP ရဲ့စာရင်းပြုစုချက်အရ စစ်အာဏာသိမ်းခဲ့တဲ့ ၂၀၂၁ ဖေဖော်ဝါရီ ၁ ရက်ကနေ ၂၀၂၄ ဒီဇင်ဘာလ ၁၃ ရက်အထိ စစ်ကောင်စီကအရပ်သား ၂၇,၈၇၂ ဦး ဖမ်းဆီးထားကြောင်း ဖော်ပြထားပါတယ်။
သတင်း - သက်ဝေ၊ စာတည်း - JCG
#မြေလတ်အသံ
#ကလေး #အုပ်ချုပ်ရေးမှူး #ဖမ်းဆီး #စစ်တပ်
Share Share Share