ခင်ဦးမြို့လယ်မှာ ဘန်ကာဆောက်ပြီးတပ်စွဲထားတဲ့ စစ်အုပ်စုကို မောင်းသူမဲ့လေယာဉ်ငယ်နဲ့ ဗုံးချတိုက်ခိုက်

စစ်ကိုင်းတိုင်း၊ ခင်ဦးမြို့နယ်၊ မြို့လယ်လမ်းဆုံ ဗိုလ်ချုပ်ကြေးရုပ်အနီး မင်းသိုက်သုံးထပ်တိုက်ရှေ့မှာ ဘန်ကာဆောက်ပြီး တပ်စွဲထားတဲ့စစ်အုပ်စုကို မောင်းသူမဲ့လေယာဉ်နဲ့ ဗုံးသီးချ တိုက်ခိုက်ခဲ့တယ်လို့ Northern Tigers Group (NTG) အဖွဲ့ဆီက သိရပါတယ်။

အင်အား ၃၀ လောက်နဲ့ တပ်စွဲထားတဲ့ အဲ့ဒီနေရာကို စက်တင်ဘာ ၂၃ ရက် မနေ့မနက် ၇ နာရီလောက်မှာ ကာကွယ်ရေးဒရုန်းအဖွဲ့တွေက ဗုံးသီး ၃ လုံးချ တိုက်ခိုက်ခဲ့တာလို့ ဆိုပါတယ်။

“ အရင်တုန်းကတော့ ၇၀၁ နဲ့ ၇၀၂ထိုင်တာ။ တပ်ချိန်းသွားတာ ၂ ပတ်လောက်ရှိသွားပြီ။ ဗုံးသီးက ရှေ့ဘန်ကာထဲကို ကျတယ်။ ၃ယောက်သေဆုံးတာကို မြေပြင်ကင်းထောက်က အတည်ပြုပေးတယ်။ ဒဏ်ရာရကိုတော့ စုံစမ်းနေတုန်းပါ” လို့ Northern Tigers Group (NTG) တာဝန်ခံက မြေလတ်အသံကို ပြောပါတယ်။

ဒဏ်ရာရတဲ့သူတွေကို မနက် ၇ နာရီခွဲလောက်မှာ ကားနဲ့တင်သွားပြီး ခင်ဦးမြို့ဆေးရုံကို ပို့ဆောင်တယ်လို့ မြေပြင်သတင်းရင်းမြစ်တွေရဲ့ပြောဆိုချက်ကို ကိုးကားပြီး သူကဆက်ပြောပါတယ်။

ဒီတိုက်ခိုက်မှုကို Northern Tigers Group (NTG)၊ TTA people defense force (Shwe Bo)၊ Black Eagle local PDF (Khin U)၊ PDAF၊ Shar Htoo Waw နည်းပညာ Team 3 နဲ့ ခင်ဦးမြို့နယ် တိုက်နယ် ၁ တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

ပြီးခဲ့တဲ့ ဇွန်လ ၂၄ ရက်ကလည်း ကနီမြို့နယ်၊ ရေလယ်ကျွန်းပျူရွာကို Northern Tigers Group (NTG) အဖွဲ့က မောင်းသူမဲ့လေယာဉ်ငယ်နဲ့ ဗုံးကြဲချ တိုက်ခိုက်ခဲ့သေးတယ်လို့ သိရပါတယ်။

စာတည်း - ရင်ငြိမ်း

#မြေလတ်အသံ 

#ခင်ဦး #စစ်ကောင်စီတပ် #Dropbomb #RCPlane #ဗုံးကြဲတိုက်ခိုက် #PDF #သတင်း