ခမ်းပတ်မှာ စစ်ကောင်စီနဲ့ PDF တိုက်ပွဲပြင်းထန်နေ၊ စစ်တပ်ကပစ်တဲ့ လက်နက်ကြီးကြောင့် ဒေသခံတဦး သေဆုံး

စစ်ကိုင်းတိုင်း၊ တမူးမြို့နယ်၊ ခမ်းပတ်မြို့ရဲစခန်းနဲ့ စစ်တပ်စခန်းကို ဇူလိုင် ၂၂ ရက်မနေ့ ညပိုင်းမှာ ဒေသခံကာကွယ်ရေးတပ်တွေက ဝင်ရောက်တိုက်ခိုက်ခဲ့ပြီးနောက် အပြန်အလှန်ပစ်ခတ်မှုတွေ ဖြစ်နေသလို ဒေသခံတဦးလည်း လက်နက်ကြီးထိမှန် သေဆုံးခဲ့တယ်လို့ ဒေသကာကွယ်ရေးတပ်ဖွဲ့ဆီက သိရပါတယ်။

ခမ်းပတ်မြို့၊ အမှတ် ၁ ရပ်ကွက်ရှိ ခမ်းပတ်ရဲစခန်းနဲ့ စစ်တပ်အထိုင်ချတပ်စွဲထားတဲ့နေရာကို မနေ့ည ၉ နာရီလောက်မှာ စတင်တိုက်ခိုက်ခဲ့တာဖြစ်ပြီး ဇူလိုင် ၂၃ ရက် ဒီနေ့ညနေပိုင်းအထိ အပြန်အလှန်ပစ်ခတ်မှုတွေ ရှိနေတာလို့ ဆိုပါတယ်။ 

“အခုထိလည်းတိုက်ပွဲကမပြီးသေးဘူး၊ အခုလည်း တိုက်ပွဲကဖြစ်နေတာပါ၊ ထိခိုက်သေဆုံးတာကတော့ ဒေသခံဘက်က တယောက်တော့ကြားတယ်၊ သေဆုံးတာက အမျိုးသားလို့တော့ ကြားထားတယ်၊ ခမ်းပတ်ဒေသခံတဦးပါ” လို့ ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။ 

သေဆုံးသူဒေသခံနဲ့ ပတ်သက်တဲ့အသေးစိတ်အချက်အလက်တွေကိုတော့ မသိရှိရသေးပါဘူး။ 

ခမ်းပတ် ပြည့်သူ့ကာကွယ်ရေးအဖွဲ့မှ ရဲဘော် ၂ ဦးကို အဲ့ဒီစစ်ကောင်စီအဖွဲ့တွေက ဖမ်းဆီးသွားတဲ့အတွက် ကယ်ထုတ်ဖို့သွားချိန် ကာကွယ်ရေးရဲဘော်တွေဘက်က စတင်တိုက်ခဲ့ရာကနေ ခုလို တိုက်ပွဲစတင်ခဲ့တာဖြစ်ပါတယ်။

စာတည်း - လင်း။

#မြေလတ်အသံ

#စစ်ကိုင်း #တမူး #ခမ်းပတ် #တိုက်ပွဲပြင်းထန် #စစ်ကောင်စီ #လက်နက်ကြီး #ဒေသခံ #သေဆုံး