ချောက်မြို့လယ်ခေါင်ရှိ မြို့မရဲစခန်း လက်ပစ်ဗုံးနဲ့ပစ်ခတ်တိုက်ခိုက်ခံရလို့ ထိခိုက်သေဆုံးမှုရှိနိုင်

မကွေးတိုင်း၊ ချောက်မြို့ မြို့မရဲစခန်းရှိ ဘန်ကာထဲက စစ်သားတွေကို ယနေ့စက်တင်ဘာ ၂၃ ရက် နေ့လယ် ၁၂ နာရီခွဲကျော်ခန့်က လက်ပစ်ဗုံးပစ်သွင်း တိုက်ခိုက်ခဲ့တယ်လို့ Chauk Guerrilla Force(C.G.F) အဖွဲ့ဆီက သိရပါတယ်။

ချောက်မြို့၊ မြို့လယ်ခေါင်မှာရှိတဲ့ ရဲစခန်းရှေ့မှာ ကာရံထားတဲ့ ဘန်ကာ ၃ ခုကြားကို လက်ပစ်ဗုံးနဲ့ ပစ်သွင်းခဲ့သလို သေနတ်နဲ့လည်း ၃ ချက်ပစ်ခတ်ခဲ့တယ်လို့ ဆိုပါတယ်။

"ကျနော်တို့ ရဲစခန်းရှေ့တည့်တည့်ကနေပြီးတော့ ဘန်ကာအတွင်းထဲကို လက်ပစ်ဗုံး ၁ လုံးသွင်းတိုက်ခိုက်ခဲ့တာ၊ ဂိတ်တဲစခန်းရှေ့မှာက ဘန်ကာ ၃ ခုရှိတယ်၊ အဲ့ဒီ ၃ ခုကြားထဲမှာ ဗုံးကတည့်တည့်ကျပြီးတော့ ပေါက်ကွဲတာ၊ ဘန်ကာ ၃ ခုထဲမှာက စစ်**တွေပဲ လုံခြုံရေးယူတာ၊ ဗုံးပေါက်ကွဲသွားပြီး ကျနော်တို့ကို သေနတ်နဲ့ပစ်တယ်၊ ကျနော်တို့ကလည်း သေနတ်နဲ့ ၃ ချက်ပစ်ပြီး လွတ်ရာကိုပြန်လည်တိမ်းရှောင်နိုင်ခဲ့တယ်" လို့ Chauk Guerrilla Force(C.G.F)  ဒုခေါင်းဆောင် ဗိုလ်ပေတက ပြောပါတယ်။

ပစ်ခတ်ခဲ့တဲ့ လက်ပစ်ဗုံးဟာ ပေါက်ကွဲအားပြင်းတဲ့အတွက် ထိခိုက်သေဆုံးမှုတွေရှိနိုင်တယ်လို့ ဆိုပါတယ်။

လက်ပစ်ဗုံးနဲ့ပစ်ခံရပြီး ကာကွယ်ရေးအဖွဲ့တွေကို စစ်အုပ်စုက သခင်ဖိုးလှကြီးပန်းခြံအနားအထိ သေနတ်နဲ့ လိုက်ပစ်တာကြောင့် ဈေးသူဈေးသားတွေ ပြေးလွှားနေရကာ ဘောလုံးကွင်းလမ်း၊ ရေနံစက်ရုံလမ်း၊ အေးစေတီလမ်းဆုံတို့ကို ပိတ်ထားပြီး အစစ်အဆေးတွေလုပ်နေတယ်လို့ သိရပါတယ်။

ချောက်မြို့မရဲစခန်း ဘန်ကာ ၁ ခုထဲမှာတင် စစ်သား ၃ ဦးခန့်ရှိပြီး ဘန်ကာနောက်က ရဲဂိတ်ကင်းတဲစခန်းမှာ ၅ ဦးလောက်ရှိကာ စက်လတ်ဆင်ထားတယ်လို့ သိရပါတယ်။

ပစ်ခတ်မှုကို Chauk Guerrilla Force(C.G.F) ၊Myaing People Defense Force မြိုင် ပကဖ နဲ့ မကွေးခရိုင် အမှတ် ၂ တပ်ရင်း တပ်ခွဲ ၁ People's Defence Force Yenangyaung အဖွဲ့တို့ကပြုလုပ်ခဲ့တာ ဖြစ်ပါတယ်။

ပြီးခဲ့တဲ့ စက်တက်ဘာ ၁၈ ရက်ကလည်း အခွန်အခတွေတိုးကောက်နေတဲ့ ချောက်မြို့ စည်ပင်သာယာရုံးကို Chauk Guerrilla Force(C.G.F) အဖွဲ့က လက်ပစ်ဗုံးနဲ့ပစ်ပြီးဖောက်ခွဲ့လို့ ဦးစီးမှူးကားပျက်စီးခဲ့သေးတယ်လို့ သိရပါတယ်။

စာတည်း - နွေဦးငြိမ်းချမ်း

#မြေလတ်အသံ

#သတင်း #မြို့မရဲစခန်း #လက်ပစ်ဗုံးပစ်ခတ်တိုက်ခိုက်ခံရ #ချောက် #မကွေးတိုင်း #ဘန်ကာ #စစ်ကောင်စီ #ပကဖ #ဒေသကာကွယ်ရေးတပ်ဖွဲ့