Sharing Information to the Local
သတင်း
- - သတင်းတို
- - စီးပွားရေး
- - ရွေးကောက်ပွဲ
- - နိုင်ငံရေး
- - အင်တာဗျူး
- - မှုခင်း
- - ကျန်းမာရေး
- - ပညာရေး
- - အလုပ်သမား
- - သမိုင်း
- - ပေးစာ
- - စစ်ရှောင်
- - တိုက်ပွဲ
- - သဘာဝဘေး
ဂန့်ဂေါမှာ စစ်ကောင်စီလက်နက်ကြီးကျည်ထိလို့ ဒေသခံအမျိုးသမီး ၂ ဦးသေဆုံး
မကွေးတိုင်း၊ ဂန့်ဂေါမြို့နယ်၊ ဇဟောရွာမှာ ဒီဇင်ဘာ ၂၇ ရက် ဒီနေ့ ညနေ ၃ နာရီဝန်းကျင်က စစ်ကောင်စီတပ်ကပစ်တဲ့ လက်နက်ကြီးကျည်ထိလို့ ဒေသခံအမျိုးသမီး ၂ ဦးပွဲချင်းပြီး သေဆုံးခဲ့တယ်လို့ ဒေသခံတွေက ပြောပါတယ်။
ဂန့်ဂေါမြို့ ခလရ ၅၀ က ဂန့်ဂေါမြို့ပေါ်နဲ့ ၂ မိုင်ခန့်ကွာဝေးတဲ့ ဇဟောရွာကို လက်နက်ကြီး ၃ ချက်ပစ်ခတ်ခဲ့ရာ ဇဟောရွာအတွင်းကို တလုံးကျရောက်ပေါက်ကွဲခဲ့ရာကနေ ဒေသခံ အမျိုးသမီး ၂ ဦးသေဆုံးခဲ့တာလို့ ဆိုပါတယ်။
လက်နက်ကြီးကျည်ထိမှန်ပြီး ဇဟောရွာက အသက် ၇၀ ကျော်အရွယ် ဒေါ်သာလိမှာ ခန္ဓာကိုယ်အစိတ်အမွမွပြန့်ကြဲသေဆုံးခဲ့သလို အသက် ၂၇ နှစ်အရွယ် မမီးဝေကလည်း ဈေးဝယ်အသွားလမ်းမှာ ခေါင်းကိုကျည်စ ထိခိုက်ပြီး ပွဲချင်းပြီးသေဆုံးခဲ့တာလို့ ဆိုပါတယ်။
ဇဟောရွာနဲ့ နီးစပ်တဲ့ ဒေသခံအမျိုးသားတဦးက "ဒေါ်သာလိက သူ့အိမ်ကိုမှန်တာလို့ပြောတယ်။ ဒေါ်သာလိကသူ့အိမ်မှာတိုင်းသေတာ။ ဟိုကလေးမကတော့ မနက်ခါအလှူအတွက်ပိုက်ဆံကြဲဖို့ချိုချဉ်သွားဝယ်တာတဲ့။ ချိုချဉ်နဲ့ပိုက်ဆံရောကြဲအောင်လို့ ဈေးဆိုင်အသွားမှာ လမ်းမှာတင် ခေါင်းကိုထုတ်ချင်းပေါက်သွားတာဗျ။ အစကမှန်တာ(လက်နက်ကြီးစ)။"လို့ ပြောပါတယ်။
ဒေါ်သာလိရဲ့ရုပ်အလောင်းကို ဒီနေ့မှာပဲ နေ့ချင်းသင်္ဂြိုဟ်လိုက်ကြပြီး မီးဝေရဲ့ရုပ်အလောင်းကိုတော့ ဒီဇင်ဘာ ၂၈ ရက် မနက်ဖြန်မှာ သင်္ဂြိုဟ်မယ်လို့ သူက ဆက်ပြောပြပါတယ်။
ဇဟောရွာအတွင်းမှာ တော်လှန်ရေးအင်အားစုတွေရှိမယ်အထင်နဲ့ စစ်ကောင်စီတပ်ဘက်က လက်နက်ကြီးနဲ့ ပစ်ခတ်တာဖြစ်နိုင်တယ်လို့ ဒေသခံတွေက ယူဆနေကြတာလည်း ရှိပါတယ်။
စစ်ကောင်စီဘက်ကပစ်လိုက်တဲ့ လက်နက်ကြီးအမျိုးအစားကို တော်လှန်းရေးအင်အားစုတွေဘက်က ၁၂၂ မမ နဲ့ ဟောင်ဝစ်ဇာလို့ ပြောဆိုနေကြပေမယ့် သီးခြားအတည်မပြုနိုင်သေးပါဘူး။
ဒီဇင်ဘာ ၉ ရက် မနက်ပိုင်းကလည်း စစ်ကောင်စီက ဂန့်ဂေါမြို့ပေါ် အမြောက်တပ်ဘက်ကနေ လက်နက်ကြီးနဲ့ပစ်ခတ်ခဲ့တာကြောင့် မင်းရွာ ဒေသခံ အသက် ၆၀ ဝန်းကျင်အရွယ် ဦးပြူးမောင် သေဆုံးခဲ့ပါသေးတယ်။
စစ်ကောင်စီတပ်ဘက်ကတော့ အရပ်သားတွေနေတဲ့ တော်လှန်ရေးအားကောင်းတဲ့နယ်မြေတွေဘက်ကို လက်နက်ကြီးတွေနဲ့အမြဲပစ်ခတ်လေ့ရှိတယ်လို့ ဆိုပါတယ်။
နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP ရဲ့စာရင်းပြုစုချက်အရ စစ်အာဏာသိမ်းခဲ့တဲ့ ၂၀၂၁ ဖေဖော်ဝါရီ ၁ ရက်ကနေ ၂၀၂၄ ဒီဇင်ဘာ ၂၇ ရက်အထိစစ်ကောင်စီလက်ချက်ကြောင့် အရပ်သား ၆,၀၈၇ ဦး သေဆုံးထားကြောင်း ဖော်ပြထားပါတယ်။
သတင်း - သက်ဝေ၊ စာတည်း - JCG
#မြေလတ်အသံ
#မကွေး #ဂန့်ဂေါ #စစ်ကောင်စီ #လက်နက်ကြီး #ဒေသခံ #သေဆုံး
Share Share Share