စစ်ကိုင်းမှာ စက်သုံးဆီဈေး ရုတ်တရက်မြင့်တက်လို့ ရေသွင်းစိုက်ပျိုးတဲ့တောင်သူတွေ အခက်ကြုံ

စစ်ကိုင်းတိုင်းမှာ စက်သုံးဆီစျေးတွေ ရုတ်တရက်မြင့်တက်လာတာကြောင့် စက်ရေသွင်းစနစ်နဲ့ စိုက်ပျိုးရေး လုပ်ကိုင်နေတဲ့တောင်သူတွေ အခက်ကြုံနေရတယ်လို့ ဒေသခံတောင်သူတွေက ပြောပါတယ်။

ပုလဲ၊ ဆားလင်းကြီးနဲ့ ယင်းမာပင်မြို့နယ်တွေမှာ စက်သုံးဆီဈေးနှုန်းတွေဟာမှာ ဒီဇင်ဘာ ၄ ရက်က သိသိ သာသာမြင့်တက်ခဲ့တာဖြစ်ပြီး 92 ဓာတ်ဆီ ၁ လီတာကို ကျပ် ၃,၂၀၀ ကျော်ကနေ ကျပ် ၄,၀၀၀ အထိ တဖြည်းဖြည်းပြောင်းလဲလာရာက ဒီဇင်ဘာ ၁၁ ရက်မှာ ၁ လီတာကို ကျပ် ၆,၅၀၀ အထိ မြင့်တက်ခဲ့တာ ဖြစ်ပါတယ်။  

မုံရွာမြို့မှာလည်း ဒီဇင်ဘာ ၅ ရက်က စက်သုံးဆီ 92 ၁ လီတာ ကို ၃,၂၀၀ ကျပ်၊ 95 ၁ လီတာကို ၃,၅၀၀ ကျပ် ရှိရာမှာ ဒီဇင်ဘာ ၈ ရက်မှာတော့ 92 ၁ လီတာကို ၄,၄၀၀ ကျပ်၊ 95 ၁ လီတာကို ၄,၈၀၀ ကျပ်ထိ စျေးတွေ တက်ခဲ့ပြီး ဓာတ်ဆီဆိုင်ကြီးတွေမှာ တန်းစီဝယ်ယူနေရာက ဆီပြတ်လပ်တဲ့အထိ ဖြစ်ခဲ့ရတယ်လို့ ဒေသခံတွေက ဆိုပါတယ်။

အခုလို စက်သုံးဆီဈေးနှုန်းတွေ ရုတ်တရက်မြင့်တက်လာတဲ့အတွက် ဆောင်းသီးနှံဖြစ်တဲ့ ကြက်သွန်နီ၊ ကြက်သွန်ဖြူကို ရေသွင်းစိုက်ပျိုးကြတဲ့ တောင်သူတွေ အခက်အခဲနဲ့ ရင်ဆိုင်နေရတယ်လို့ ဘုတလင်မြို့နယ်က တောင်သူတဦးက မြေလတ်အသံကို ပြောပါတယ်။ 

“ရေ ၁ ကြိမ်သွင်းရင် ဓာတ်ဆီ ၃ ဂါလံလောက် အနည်းဆုံးကုန်တယ်။ ဆောင်းသီးနှံဆိုတော့ ရေသွင်းစနစ်နဲ့ပဲ စိုက်ပျိုးရတော့ ကုန်ကျစရိတ် ကြီးမားတယ်။" လို့ သူက ဆိုပါတယ်။ 

ဆောင်းရာသီ သီးနှံဖြစ်တဲ့ ကြက်သွန်နီ၊ ကြက်သွန်ဖြူ စတဲ့သီးနှံတွေဟာ ရေသွင်းစနစ်နဲ့ စိုက်ပျိုးရတာဖြစ်ပြီး ၁ ရာသီကို ၆ ကြိမ်ကနေ ၁၀ ကြိမ်အထိ မြေအမျိုးအစားပေါ်မူတည်ပြီး ရေသွင်းစိုက်ပျိုးရတယ်လို့ ဆိုပါတယ်။ 

ဆားလင်းကြီးမြို့နယ်အတွင်းက သီးနှံစိုက်ပျိုးတဲ့တောင်သူတွေဟာလည်း ဆည်ရေအသုံးပြုပြီး စိုက်ပျိုးတာ မဟုတ်ဘဲ စက်နဲ့ရေသွင်းစိုက်ပျိုးရတာဖြစ်လို့ အခုလို စက်သုံးဆီဈေးနှုန်းမြင့်တက်သွားတဲ့အတွက် စိုက်ပျိုးရေး ကုန်ကျစရိတ်တွေများကာ အခက်ကြုံနေရတယ်လို့ ပြောတယ်။ 

စက်နဲ့ရေသွင်းစိုက်ပျိုးတဲ့ တောင်သူတွေအနေနဲ့ ရေတင်စက်အတွက်အသုံးပြုရတဲ့ စက်သုံးဆီအပြင် ထွန်စက်ခတွေ ဈေးကြီးတဲ့ဒဏ်ကိုပါခံနေရတယ်လို့ ဆားလင်းကြီးမြို့နယ်ထဲက ကြက်သွန်စိုက်တောင်သူက ပြောပါတယ်။ 

"တချို့ ကြက်သွန်စိုက်စရိတ် မတတ်နိုင်လို့ ပျိုးပင်တွေတောင် ရောင်းကုန်ကြပြီ။" လို့ သူက ဆက်ပြောတယ်။ 

စစ်ကိုင်းတိုင်းအတွင်းမှာ စက်သုံးဆီးခွဲတမ်းတွေ ဖြတ်တောက်မယ်ဆိုတဲ့ ပြောဆိုမှုတွေ ထွက်ပေါ်လာပြီးနောက် အခုလို စက်သုံးဆီဈေးနှုန်း ရုတ်တရက် မြင့်တက်လာတာဖြစ်တယ်လို့ ဒေသခံတွေက ပြောပါတယ်။ 

လက်ရှိအနေအထားရ စက်သုံးဆီစျေးတွေဟာ တနေရာနဲ့ တနေရာမတူညီဘဲ မြို့ပြနဲ့ အလှမ်းဝေးတဲ့ ချင်းတွင်းမြစ် အနောက်ဘက်ကမ်းဒေသတွေမှာ စက်သုံးဆီ ၁ လီတာကို ၆,၇၀၀ အထိပေါက်စျေးနေပါတယ်။

သတင်း - သိုက်ထွန်း၊ စာတည်း - JCG

#မြေလတ်အသံ

#စစ်ကိုင်း #စက်သုံးဆီ #စက်ရေသွင်း #စိုက်ပျိုးရေး #ပုလဲ #ဆားလင်းကြီး #ယင်းမာပင်