စစ်ကောင်စီတပ်ဖွဲ့က ပိတ်ခိုင်းလို့ မုံရွာက စက်သုံးဆီအရောင်းဆိုင်ငယ် ၃၀ ကျော် ပိတ်ထားရ

စစ်ကိုင်းတိုင်း၊ မုံရွာမြို့မှာ စစ်ကောင်စီတပ်ဖွဲ့ဝင်တွေက လမ်းဘေးစက်သုံးဆီအရောင်းဆိုင်တွေကို ပိတ်သိမ်းခိုင်းခဲ့တာကြောင့် ဆိုင် ၃၀ကျော် ပိတ်ထားရတယ်လို့ မြို့ခံတွေဆီကနေ သိရပါတယ်။

ဇန်နဝါရီ ၈ ရက် မနေ့မနက်ပိုင်းက လမ်းဘေးစက်သုံးဆီအရောင်းဆိုင် ၁ ခုဖြစ်တဲ့ ဒေါနခြံရပ်ကွက်က ချမ်းသာနိုင်ဆီဆိုင်ကို စစ်ကောင်စီတပ်ဖွဲ့ဝင် ၇ ဦးခန့်ရောက်လာပြီး ဆိုင်ပိတ်ခိုင်းခဲ့တယ်လို့ ဆိုပါတယ်။

"မနေ့က ဆိုင်ထိလာပြီး ဓာတ်ပုံတွေလာရိုက်သွားတယ်၊ ဖွင့်ရင် ဖမ်းမှာလို့လည်း ပြောသွားတယ်။ အဲ့ဒါကြောင့် ဒီနေ့ ဆိုင်ပိတ်ထားတာ။ တမြို့လုံးက လမ်းဘေးဆီဆိုင်တွေလည်း ပိတ်ထားတယ်။"လို့ ချမ်းသာနိုင်ဆီဆိုင်နဲ့ ရင်းနှီးတဲ့ မြို့ခံအမျိုးသမီးတဦးက ပြောပါတယ်။

ဇန်နဝါရီ ၉ ရက် ဒီကနေ့မှာတော့ ရေသန့်ဘူးနဲ့ရောင်းချတဲ့ စက်သုံးဆီဆိုင်တွေ၊ လမ်းဘေးပန့်ဆိုင်ငယ်တွေ အားလုံး ပိတ်ထားရပြီး စက်သုံးဆီ ဆီဆိုင်ကြီးတွေမှာသာ တန်းစီစောင့်ဆိုင်းပြီး ဝယ်ယူနေရတယ်လို့ ဆိုပါတယ်။

မုံရွာမြို့မှာ ပြည်မြန်မာစိုး၊ သန်းကုဋေအောင်၊ စိုး၊ ပါဝါနိုင်း၊ နယူးဒေး စတဲ့ဆီဆိုင်ကြီး ၁၀ ဆိုင်ကျော်ရှိပြီး လမ်းဘေးစက်သုံးဆီဆိုင်တွေကတော့ ချမ်းမြသာစည်၊ အောင်ချမ်းသာ၊ ဒေါနခြံ၊ အောင်မင်္ဂလာ၊ ဂွေ့ကြီး၊ သလ္လာဝတီ၊ ရတနာပုံ၊ မြို့သစ်စတဲ့ ရပ်ကွက်တွေမှာ ဆိုင်ပေါင်း ၃၀ ကျော်ရှိတယ်လို့ သိရပါတယ်။

စက်သုံးဆီအရောင်းဆိုင်ကြီးတွေမှာ 92 ၁ လီတာကို ၄၂၀၀ ကျပ်၊ 95 ၁ လီတာကို ၄၅၀၀ ကျပ်နဲ့ ရောင်းချပြီး လမ်းဘေးပန့်ဆိုင်တွေမှာတော့ 92 ၁ လီတာကို ၆၀၀၀ ကျပ်နဲ့ 95 ၁လီတာကို ၆၂၅၀ ကျပ်နဲ့ ရောင်းချတယ်လို့ မုံရွာမြို့ ဒေသခံတဦးက ပြောပါတယ်။

ဇန်နဝါရီ ၈ ရက် မနေ့မနက်ပိုင်း ၈ နာရီကျော်လောက်ကလည်း မုံရွာမြို့၊ ကျွဲရဲအဝိုင်းပတ်အနီးက “စိုး”ဆီဆိုင်နားမှာ ဆီဖြည့်ဖို့လာတဲ့ ဆိုင်ကယ်တွေကို စစ်ကောင်စီတပ်သားတွေက တားဆီးပြီး လိုင်စင်မဲ့ဆိုင်ကယ်နဲ့ သက်တမ်းမတိုးရသေးတဲ့ ဆိုင်ကယ်တွေကို ဖမ်းဆီးတာတွေ လုပ်ဆောင်ခဲ့တယ်လို့ ဆိုပါတယ်။

မုံရွာမှာ ဇန်နဝါရီလအစပိုင်းထဲက စက်သုံးဆီ ဝယ်ယူရောင်းချမှုကို ကန့်သတ်တော့မယ်ဆိုတဲ့ သတင်းတွေ ထွက်ပေါ်နေခဲ့ပြီး မြို့ခံတွေကတော့ အခုလက်ရှိ စက်သုံးဆီ ဆီဆိုင်ကြီးတွေမှာ တန်းစီဝယ်ယူနေရတယ်လို့ သိရပါတယ်။

ပုံစာ - ပိတ်သိမ်းထားရသည့် ချမ်းသာနိုင်ဆီဆိုင်နှင့် စက်သုံးဆိီ တန်းစီဝယ်နေရသည့် မြို့ခံများ။

သတင်း - ခေတ်သဒ္ဒါ၊ စာတည်း - ချယ်ရီ

#မြေလတ်အသံ

#မုံရွာ #စက်သုံးဆီ #ကန့်သတ် #စစ်ကောင်စီ