စစ်တပ်ရဲ့ထောက်လှမ်းရေးဒရုန်းတစင်းကို တော်လှန်ရေးတပ်ဖွဲ့ဝင်တွေသိမ်းဆည်းရရှိ

ပဲခူးတိုင်း၊ ဖြူးမြို့နယ်အတွင်းကတနေရာမှာ စစ်ကောင်စီအသုံးပြုတဲ့ဒရုန်းတစင်းကို သိမ်းဆည်းရရှိခဲ့တယ်လို့ ဖြူးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။ 

ဒီဇင်ဘာ ၂၂ ရက် နေ့လယ်ပိုင်းမှာ တော်လှန်ရေးအဖွဲ့တွေရှိတဲ့နယ်မြေဘက်ကို သတင်းစုံစမ်းထောက်လှမ်းဖို့လာတယ်လို့ယူဆရတဲ့ဒရုန်းတစင်းကို မြေပြင်မှာတွေ့ရှိပြီး သိမ်းဆည်းခဲ့တာလို့ ဆိုပါတယ်။

"သူတို့ Scout (ကင်းထောက်)လိုက်ရင်း Battery အားကုန်ရင်းပြုတ်ကျတာကိုတွေ့လို့ သိမ်းဆည်းရမိထားတာပါ။ ဒရုန်းကတော့ အကောင်းတိုင်းပါဘဲ။ ပြန်သုံးလို့ ရမရကတော့လေ့လာနေဆဲ"လို့ ဖြူးမြို့နယ်ပြည်သူ့ကာကွယ်ရေးအဖွဲ့ ပြန်ကြားရေးတာဝန်ရှိသူက ပြောပါတယ်။

သိမ်းဆည်းရမိတဲ့ ဒရုန်းဟာ တရုတ်နိုင်ငံထုတ် eVTOL အမျိုးအစားဒရုန်းဖြစ်ပြီး သတင်းထောက်လှမ်းရေးအတွက်သာအသုံးပြုတဲ့ ဒရုန်းအမျိုးအစားဖြစ်တယ်လို့ သူကဆက်ပြောပါတယ်။ 

ဒရုန်းနဲ့ပတ်သက်တဲ့ အချက်အလက်အသေးစိတ်ကိုတော့ စိစစ်နေဆဲဖြစ်တာကြောင့် သေချာမပြောနိုင်သေးဘူးလို့ ဆိုပါတယ်။  

အလားတူ အခုနှစ်စက်တင်ဘာ ၄ ရက်ကလည်း စစ်ကိုင်းတိုင်း၊ အရာတော်မြို့နယ်အတွင်းမှာ စစ်ကောင်စီ အသုံးပြုနေတဲ့ တရုတ်နိုင်ငံ AheadX ကုမ္ပဏီထုတ် ဒရုန်းတစင်းကို Salingyi Border Task Force - SBTF အဖွဲ့က သိမ်းဆည်းရမိခဲ့ပါသေးတယ်။ 

ကာလတန်ဖိုး ဒေါ်လာ ၂,၀၀၀ ကျော်တန်ဖိုးရှိတဲ့အဆိုပါဒရုန်းဟာ တော်လှန်ရေးအဖွဲ့တွေရဲ့တည်နေရာကို ထောက်လှမ်းရှာဖွေစဥ်မှာ ပျက်ကျခဲ့ချိန်တွေ့ရှိသိမ်းဆည်းခဲ့တာဖြစ်ပါတယ်။  

စစ်ကောင်စီဘက်က အခုလိုဒရုန်းတွေသုံးပြီး စုံစမ်းထောက်လှမ်းမှုတွေလုပ်တဲ့အပြင် တိုက်ခိုက်ရေးဒရုန်းတွေလည်းအသုံးပြုလာတဲ့အတွက် ဒေသခံထိခိုက်သေဆုံးမှုတွေလည်းရှိခဲ့ပါတယ်။

ဒီလိုတိုက်ခိုက်မှုတွေရှိလာတာကြောင့် ဒေသခံတွေအနေနဲ့ အန္တရာယ်ကင်းအောင် သတိနဲ့နေထိုင်ကြဖို့ ဖြူးမြို့နယ်ပကဖတာဝန်ရှိသူက သတိပေးထားပါတယ်။ 

“ပြည်သူတွေအနေနဲ့ အန္တရာယ်ကင်းဖို့ ကတုတ်ကျင်းတွေတူးထားကာ၊ ခိုင်ခိုင်မာမာလုပ်ပြီးနေကြဖို့ လိုသလို စစ်ရေးသတင်းတွေထောက်လှမ်းပြီး သတိနဲ့နေထိုင်ကြဖို့ လိုတယ်” လို့ ဖြူးမြို့နယ် ပြည်သူ့ကာကွယ်ရေးအဖွဲ့ တာဝန်ရှိသူကဆက်ပြောပါတယ်။ 

ပြီးခဲ့တဲ့ နိုဝင်ဘာ ၁၁  ရက်နဲ့ ၁၂ ရက်မှာ ဖြူးမြို့နယ်၊ မြက်နီကွင်းကျေးရွာနဲ့ စိုက်တန်းခင်ရွာကို ခလရ ၄၃၉ ကနေ ဒရုန်းနဲ့ဗုံးချတိုက်ခိုက်ခဲ့တာကြောင့် ပြည်သူ ၁ ဦးသေဆုံးကာ ၁ ဦးပြင်းထန် ဒဏ်ရာရပြီး နေအိမ် ၂ လုံးထက်မနည်းပျက်စီးခဲ့တယ်လို့  အမှတ် ၂ စစ်ဒေသခွဲ၊ တောင်ပိုင်းစစ်ဒေသရဲ့ နိုဝင်ဘာ ၁၆ ရက် သတင်းထုတ်ပြန်ချက်အရ သိရပါတယ်။

စာတည်း - လင်း 

#မြေလတ်အသံ

#ပဲခူး #ဖြူး #စစ်တပ် #ဒရုန်း #သိမ်းဆည်းရရှိ