စစ်မှုထမ်းကြေးလာကောက်တဲ့ အုပ်ချုပ်ရေးမှုးနဲ့လက်နက်ကိုင်အဖွဲ့က နေအိမ် ၁၁ အိမ်က PSI စလောင်းတွေကို ရိုက်ချိုးဖျက်ဆီးခဲ့

မကွေးတိုင်း၊ မြို့သစ်မြို့နယ်၊ မြို့လုလင်ကျေးရွာအုပ်စု၊ စစ်တောကျေးရွာကို ကျေးရွာအုပ်ချုပ်ရေးမှူးနဲ့ စစ်ကောင်စီအဖွဲ့ဝင်တွေက ကျေးရွာထဲ PSI စလောင်းတွေကိုဝင်ရောက်ဖျက်ဆီးကာ စစ်မှုထမ်းကြေးငွေတွေ တောင်းသွားခဲ့တယ်လို့ ဒေသခံတွေထံက သိရပါတယ်။

ဇန်နဝါရီ ၁၂ ရက် မနက် ၈ နာရီခန့်မှာ မြို့လုလင်ကျေးရွာအုပ်စု အုပ်ချုပ်ရေးမှူး အောင်ကျော်ဦး၊ ပျူစောထီးအဖွဲ့ဝင် လှိုင်မင်းဦးနဲ့ လက်နက်ကိုင်အရပ်ဝတ် လူ ၁ စု အင်အား ၈ ဦးခန့်က စစ်တောကျေးရွာထဲကို ရောက်လာပြီး ရွာအနောက်ဘက် ကုန်းတက်နားက နေအိမ် ၁၁ လုံးမှာရှိတဲ့ PSI စလောင်းဗန်းတွေကို ၁ အိမ်ဝင် ၁ အိမ်ထွက်နဲ့ ရိုက်ဖျက်ပြီး ကြိုးတွေကို ဆွဲဖြုတ်သွားခဲ့တယ်လို့ ဆိုပါတယ်။

"နေအိမ် ၁၁ အိမ်က ဗန်းတွေ ရိုက်ဖျက်ပြီး ရွာက ဒလန်ကလေး ၁ ယောက် မိဘအိမ်နား​ရောက်မှ ရပ်လိုက်တယ်။ ပြီးမှ သူတို့သောက်ကြစားကြတယ်။ အဲဒီတော့မှ ရွာမှာ ၂ ယောက်တောင်းတယ်။ ပေါ်တာ ပေါ့။  ၂ ယောက်မပေးနိုင်ရင် ၁ အိမ် ၂၀,၀၀၀ ပေးရမယ်ပေါ့။ အဲတော့မှ စစ်မှုထမ်းကြေးမပေးလို့လုပ်မှန်းသိရတာ။ "လို့ ဒေသခံတဦးက ပြောပါတယ်။

အဲဒီနောက်ကျေးရွာထဲက ရွာခံအချို့က စစ်မှုထမ်းကြေး ၁ အိမ် ၂၀,၀၀၀ ပေးဖို့ သဘောတူလိုက်တာကြောင့် အုပ်ချုပ်ရေးမှူးနဲ့အဖွဲ့ဟာ ညနေအပြီးတိုင်လာပို့ပေးရမယ်ဆိုပြီးပြောဆိုကာ ပြန်သွားကြတယ်လို့ ဆိုပါတယ်။

အဲဒီနောက်ဒေသခံတွေက ၁ အိမ် ၂၀,၀၀၀ ကျပ် ကောက်ခံပြီး ရရှိငွေ စုစုပေါင်း ၃၃၀,၀၀၀ ကျပ်ကို အုပ်ချုပ်ရေးမှူးနေထိုင်တဲ့ မြို့လုလင်ကျေးရွာကိုသွားရောက်ပို့ဆောင်ပေးခဲ့ကြရတယ်လို့ ဆိုပါတယ်။

"အုပ်ချုပ်ရေးမှူးပါတယ်။ အုပ်ကြီးရွာက အခုကာလအခေါ် ပျူလို့ခေါ်မလား ဒလန်ကောင်လေး ၁ ယောက်ပါတယ်။ အရပ်ဝတ်နဲ့ ၅ ယောက်က လက်နက် ၂ လက်ပါတယ်။ အရပ်ဝတ်နဲ့လူတွေက ခါတိုင်းပေါ်တာဆွဲရင် စစ်သားကတော်တော်များများပါတယ်။ ရဲကအနည်းလောက်ဘဲ။ အခုက အရပ်ဝတ်တွေနဲ့ဆိုတော့ စစ်သားမဟုတ်ရင် ပျူတွေဖြစ်လောက်တယ်"လို့ အထက်ပါဒေသခံက ဆက်ပြောပါတယ်။

စစ်တောကျေးရွာက အိမ်ခြေ ၂၀၀ ဝန်းကျင်ရှိပြီး မုဆိုးမနေအိမ်နဲ့ ငွေကြေးမဆင်မပြေသူ၊ စစ်မှုထမ်းရန် သားသမီးမရှိသူ နေအိမ်တွေဖယ်ပြီး ကျန်နေအိမ် ၁၅၀ ခန့်ကတော့ ခုလကစပြီး နောက်ပိုင်း လစဥ် ၁ အိမ် ၂၀,၀၀၀ ကျပ် ပုံမှန်ပေးဆောင်သွားရတော့မှာလို့ ဆိုပါတယ်။

စစ်ကောင်စီက ပြည်သူ့စစ်မှုထမ်းဥပဒေထုတ်ပြန်ပြီးနောက် ဇွန်လပိုင်းလောက်က ၁ ကြိမ် စစ်မှုထမ်းကြေး ၁ အိမ် ၃၀,၀၀၀ ကျပ် ပေးခဲ့ရဖူးတယ်လို့ ဆိုပါတယ်။

ပြည်သူ့စစ်မှုထမ်း ဆင့်ခေါ်ပြီး ၂၀၂၄ ဧပြီမှ ၂၀၂၅ ဇန်နဝါရီအတွင်း ကျေးရွာထဲက လူငယ် ၄ ဦးကိုလည်း စစ်မှုထမ်းဖို့ဆိုကာ ပေါ်တာဆွဲဖမ်းဆီးခံလိုက်ရသေးတယ်လို့ သိရပါတယ်။

စာတည်း - ဈာန်မြင့်

#မြေလတ်အသံ

#မကွေး #မြို့သစ် #အုပ်ချုပ်ရေးမှူး #စစ်မှုထမ်းကြေး #PSI #ဖျက်ဆီး