စစ်မှုထမ်းသင်တန်းအပတ်စဥ် ၆ ကို သတ်မှတ်ကာလထက် ၂ ပတ်စော ဆင်းခဲ့ပြီး ရဲရဲတက်၊ ရဲရဲတိုက်ကြဖို့ ဒုစစ်ခေါင်းဆောင် မှာကြား

စစ်ကောင်စီတပ်လက်အောက် စစ်သင်တန်းကျောင်းတွေမှာ ဖွင့်လှစ်နေတဲ့ ပြည်သူ့စစ်မှုထမ်းသင်တန်းအပတ်စဥ် ၆ သင်တန်းဆင်းပွဲကို ဒီဇင်ဘာ ၂၇ ရက် ယမန်နေ့က ပြုလုပ်ခဲ့တယ်လို့ စစ်ကောင်စီက သတင်းထုတ်ပြန်ပါတယ်။

စစ်မှုထမ်းသင်တန်းအပတ်စဥ် ၆ ကို ပြီးခဲ့တဲ့အောက်တိုဘာ ၂၁ ရက်မှာ စတင်ဖွင့်လှစ်ခဲ့တာဖြစ်ပြီး သင်တန်းဆင်းပွဲကို သတ်မှတ်ရက်ထက် ၂ ပတ်စောကာ ဒီဇင်ဘာ ၂၇ ရက် မနေ့က ပြုလုပ်ခဲ့တာလို့ CDM တပ်မတော်သားအသိုင်းအဝိုင်းက ထောက်ပြပါတယ်။

စစ်ကောင်စီတပ်က အပတ်စဥ် ၁ ကနေ ၅ အထိဖွင့်လှစ်ခဲ့တဲ့ ပြည်သူ့စစ်မှုထမ်းသင်တန်းတွေကို သင်တန်းကာလ ၁၂ ပတ် (၃လခန့်) သတ်မှတ်တက်ရောက်ခိုင်းစေခဲ့ပြီး အပတ်စဥ် ၆ ကိုတော့  သတ်မှတ်ကာလထက်စောပြီးသင်တန်းဆင်းကာ စစ်မြေပြင်တွေကို စေလွှတ်ဖို့ပြင်ဆင်နေတာလို့ တပ် CDM အသိုင်းအဝိုင်းက သုံးသပ်ပါတယ်။

“ အဓိက အမ်း ကို ပြန်တိုက်ဖို့ စကစဘက်က ပြန်ပြင်ဆင်နေတာကို တွေ့ရတော့ အဲ့ဒီကို ပို့မယ်လို့တော့ မြင်တယ်ပေါ့။ ဘယ်တပ်တွေနဲ့ ပြန်ထိုးမယ်ဆိုတာ မသိရသေးပေမယ့် စစ်မှုထမ်းဆင်းလာတဲ့သူတွေ သက်ဆိုင်ရာတပ်တွေကို ရောက်တာနဲ့ စစ်မြေပြင်တွေကိုပို့ဖို့ အစောတလျင်လိုအပ်နေတာ။” လို့ CDM တပ်မတော်သား ဗိုလ်ကြီး ဇင်ယော်က ပြောပါတယ်။

အမ်း နပခ မကျရှုံးမီ နိုဝင်ဘာနဲ့ ဒီဇင်ဘာလအတွင်းမှာလည်း ရခိုင်ပြည်နယ် စစ်မြေပြင်စခန်းတွေကနေ ထွက်ပြေးလာပြီး မကွေးတိုင်းအတွင်း ကာကွယ်ရေးတပ်ဖွဲ့တွေဘက်က ဖမ်းဆီးရမိခဲ့တဲ့ စစ်ကောင်စီတပ်ဖွဲ့ဝင်တွေထဲမှာ စစ်မှုထမ်းသင်တန်းဆင်တွေ အများအပြားပါရှိနေတာကို တွေ့ရပါတယ်။

ဒါ့အပြင် ယမန်နေ့ စစ်မှုထမ်းသင်တန်းအပတ်စဥ် ၆ သင်တန်းဆင်းပွဲတွေအနက် ဧရာဝတီတိုင်း၊ ပုသိမ်မြို့အခြေစိုက် အမှတ် ၆ စစ်အခြေခံလေ့ကျင့်ရေးတပ်(စခတ ၆) မှာ ပြုလုပ်တဲ့သင်တန်းဆင်းပွဲကို စစ်ကောင်စီဒုတိယ ခေါင်းဆောင် ဒုဗိုလ်ချုပ်မှူးကြီး စိုးဝင်း သွားရောက်ခဲ့ပြီး စစ်မှုထမ်းသင်တန်းသားတွေကို တွေ့ဆုံမိန့်ခွန်းပြောခဲ့ကြောင်း စစ်ကောင်စီကထုတ်ပြန်ပါတယ်။

လက်ရှိနိုင်ငံအနှံ့တိုက်ပွဲတွေက စစ်ကောင်စီတပ်ဖွဲ့ဝင်တွေဟာ လက်နက်ချအညံ့ခံမှုတွေများပြားနေချိန် ဒုစစ်ခေါင်းဆောင် ဒုဗိုလ်ချုပ်မှူးကြီး စိုးဝင်း က ၎င်းရဲ့မိန့်ခွန်းမှာ စစ်မှုထမ်းသင်တန်းသားတွေအနေနဲ့ ရဲရဲတက်၊ ရဲရဲတိုက် ၊ ရဲရဲချေမှုန်းကြဖို့ ဆိုကာ ထည့်သွင်းမှာကြားသွားပါတယ်။

“ တပ်မတော်သားတဦးဖြစ်တာနဲ့အညီ ပေးအပ်လာတဲ့တာဝန်များအပေါ် ကျေပွန်အောင်ထမ်းဆောင်သွားကြရန်လိုကြောင်း၊ လေ့ကျင့်သင်ကြားပေးလိုက်တဲ့ စစ်အတတ်ပညာများကိုလည်း အမြဲတမ်းလေ့ကျင့်ရမည်၊ အမြဲတမ်းစစ်ရေးသတိရှိရမည်၊ အမြဲတမ်းတိုက်ပွဲဝင်အသင့်ဖြစ်ရမည်ဆိုတဲ့ မြဲသုံးမြဲနဲ့အညီ အမြဲမပြတ် လေ့လာ၊ လေ့ကျင့်၊ လိုက်နာသွားကြရန်နဲ့ ရဲရဲတက်၊ ရဲရဲတိုက်၊ ရဲရဲချေမှုန်းဆိုတဲ့ ရဲသုံးရဲအတိုင်း ရန်သူကိုချေမှုန်း တိုက်ခိုက်ရမှာဖြစ်ကြောင်း” လို့ ၎င်းက ပြောပါတယ်။

လက်ရှိ စစ်ကောင်စီတပ်ဟာ နိုင်ငံအနှံ့စစ်ရေးပြင်ထန်မှုတွေနဲ့ရင်ဆိုင်နေရပြီး ပြီးခဲ့တဲ့အပတ်က လက်လွှတ်လိုက်ရတဲ့ အမ်း နပခ ကျရှုံးမှုမှာ အလံဖြူထောင်လက်နက်ချတဲ့ စစ်ကောင်စီတပ်ဖွဲ့ဝင် ရာနဲ့ချီရှိခဲ့ပြီး တိုင်းစစ်ဌာချုပ် သိမ်းပိုက်ခံရချိန်မှာ နပခ ဒုတိုင်းမှူးနဲ့ တိုင်းဦးစီးချုပ် ဗိုလ်မှူးချုပ် ၂ ဦးလည်း အရှင်ဖမ်းဆီးခံခဲ့ရတာလည်း ဖြစ်ပါတယ်။

ပုံစာ - ဒုစစ်ခေါင်းဆောင် စခတ ၆ သင်တန်းသားများနှင့်တွေ့ဆုံစဉ် နှင့် လပခလက်အောက် စခတ ၇ မှ စစ်မှုထမ်းသင်တန်းဆင်းပွဲ။

#မြေလတ်အသံ

#စစ်မှုထမ်းသင်တန်း #သင်တန်းဆင်း #လက်နက်ချ #စစ်တပ် #အင်အား