စစ်အုပ်စုပစ်တဲ့ လက်နက်ကြီးထိလို့ ကလေး ၁ ဦးသေဆုံးပြီး ၈ ဦးဒဏ်ရာရ

ပဲခူးတိုင်းဒေသကြီး၊ ကျောက်ကြီးမြို့နယ်နဲ့ မုန်းမြို့နယ်အတွင်းမှာ စစ်ကောင်စီပစ်ခတ်တဲ့ လက်နက်ကြီးထိလို့ ကလေးငယ် ၁ ဦးသေဆုံးပြီး ၈ ဦးဒဏ်ရာရခဲ့တယ်လို့ KNU ဗဟိုက အောက်တိုဘာလ ၁၁ ရက်မှာ ထုတ်ပြန်ပါတယ်။

အောက်တိုဘာလ ၁၀ ရက် မနက်ပိုင်းမှာ ပိန်းဇလုပ်အခြေစိုက် ခလရ ၂၆၄ တပ်ရင်းကနေ ကျောက်ကြီးမြို့နယ်၊ ရွာကန့်လန့် ရွာဘက်ကို ၁၅၅ မမ ၃ လုံးပစ်ခတ်ခဲ့ရာ အဲ့ဒီကျေးရွာက စောပွားစေး ၃၅ နှစ်၊ ဇနီးဖြစ်သူ နော်လာဒူး ၃၀ နှစ်နဲ့ သမီးဖြစ်သူ နော်ကဲဘလူးမူး ၂ နှစ်တို့ ထိခိုက်ဒဏ်ရာရပြီး နေအိမ်တွေလည်း ပျက်စီးခဲ့သေးတယ်လို့ ဆိုပါတယ်။

"အဲဒီ ၁၀ ရက်နေ့က စကစ ဘက်က ကျေးရွာတော်တော်များများဘ​က်ကို လက်နက်ကြီးတွေပစ်တာ များတယ်။ ခါတိုင်းလည်း ပစ်နေတယ်ဆိုပေမယ့် အဲ့နေ့က ပိုများတယ်။ အရပ်သား ထိခိုက်မှုလည်း များတယ်"လို့ ကျောက်ကြီး ဒေသကာကွယ်ရေးအဖွဲ့ဝင်တဦးက ပြောပါတယ်။ 

အလားတူ အဲ့ဒီနေ့ နေ့လယ်မှာတင် ရွှေဝါအခြေစိုက် ခမရ ၃၀ရ တပ်ရင်းကနေ မုန်းမြို့နယ်၊ သနပ်ကွင်းကျေးရွာဘက်ကို လက်နက်ကြီး ၂ လုံး၊ ညနေ ၅ နာရီကျော်မှာ ခမရ ၄၃၉ တပ်ရင်းက ကျော်လှရွာဘက်ကို လက်နက်ကြီး ၃ လုံး၊ ည ၉ နာရီကျော်မှာ နန္ဒမိတ်ကျေးရွာဘ​က်ကို လက်နက်ကြီး ၂ လုံးပစ်ခတ်ခဲ့တယ်လို့ ဆိုပါတယ်။

စစ်ကောင်စီပစ်ခတ်တဲ့ လက်နက်ကြီး အစထိမှန်လို့ သနပ်ကွင်းကျေးရွာကျောင်းတိုက် ဆရာတော် ဦးကောဝိတ ၇၄ ဒဏ်ရာရ၊ ကျော်လှကျေးရွာနေ မယူရတီနိုင် ၁၄ နှစ် သေဆုံး၊ နန္ဒမိတ်ကျေးရွာနေ ဦးတင်ထွန်း ၆၀ နှစ်၊ ဒေါ်မြင့်ဌေး ၅၈ နှစ်၊ မမာလာ ၃၅ နှစ်၊ မောင်ပြည်စုံ ၂ နှစ်တို့မှာ ဦးခေါင်း၊ ​ခြေလက်နဲ့ ကျောကုန်းတွေမှာ ထိခိုက်ဒဏ်ရာရသွားပါတယ်။

ထိခိုက်ဒဏ်ရာရသူတွေကိုတော့ KNU နယ်မြေက ဆေးပေးခန်းတွေမှာ ဆေးကုသမှုခံယူနေတယ်လို့ ကျောက်ကြီး ဒေသကာကွယ်ရေးအဖွဲ့ဝင်တဦးက ပြောပါတယ်။

အောက်တိုဘာလ ၄ ရက်ကလည်း စစ်ကောင်စီပစ်ခတ်တဲ့ လက်နက်ကြီးထိလို့ မုန်းမြို့နယ်၊ ဗမာငတိုးခင်ကျေးရွာမှာ  အမျိုးသမီး  ၁ ဦးသေဆုံးပြီး ၂ ဦးဒဏ်ရာရသွားတယ်လို့ သိရပါတယ်။

စာတည်း - လင်း  

#​မြေလတ်အသံ
#ပဲခူး #ကျောက်ကြီး #မုန်း #စစ်ကောင်စီ #လက်နက်ကြီးပစ် #ထိခိုက် #သေဆုံး #သတင်း