စစ်အုပ်စု တပ်စွဲထားတဲ့နေရာအနီးမှာ လမ်းသွားလမ်းလာအမျိုးသမီး ၂ ဦး လုယက်ခံရ

စစ်အုပ်စု တပ်စွဲထားတဲ့နေရာအနီးမှာ လမ်းသွားလမ်းလာအမျိုးသမီး ၂ ဦး လုယက်ခံရ

Danger in သတင်း | သတင်းတို 09 Apr 2023 • 422 views

စစ်ကိုင်းတိုင်း၊ စစ်ကိုင်းမြို့နယ်၊ ထီးဆောင်း-အရာတော်လမ်းပိုင်း၊ ထီးဆောင်းရွာမြောက်ဘက်၊ နောင်ကြီးအိုင်လမ်းပေါ်မှာ ဧပြီလ ၉ ရက် ဒီကနေ့မနက် ၉ နာရီခွဲခန့်က လမ်းသွားလမ်းလာအမျိုးသမီး ၂ ဦး ပစ္စည်းလုယက်ခံခဲ့ရတယ်လို့ ဒေသခံတွေဆီက သိရပါတယ်။

တပ်မ ၃၃ လက်အောက်ခံ စစ်ကောင်စီတပ်သားတွေတပ်စွဲထားတဲ့ ထီးဆောင်းရွာအနီးမှာ လုယက်ခံခဲ့ရတာဖြစ်ပြီး လုယက်မှု ကျူးလွန်သူတွေဟာလည်း အဲ့ဒီတပ်မ ၃၃ စစ်ကောင်စီတပ်သားတွေလို့ ဒေသခံတဦးက မြေလတ်အသံကို ပြောပါတယ်။

“ထီးဆောင်းမှာ တပ်စွဲထားတဲ့ကောင်တွေလုပ်တာပါ၊ လုခံရတဲ့နေရာနဲ့သူတို့နဲ့ ၄ ဖာလုံ လောက်ဘဲဝေးတယ်။ ဧရိယာကလည်း သူတို့ကျင်လည်နေတဲ့ ဧရိယာပါ။ သူတို့တပ်တွေအင်အားလာဖြည့်လို့ လူတွေများတယ်ဆိုပေမယ့် အနေကြာတဲ့စစ်သားတွေကို ရွာခံတွေကသူတို့ကိုမျက်မှန်းတန်းမိနေပြီးသားပါ” လို့ ပြောပါတယ်။

အဲ့ဒီ အမျိုးသမီး ၂ ဦးကို အရပ်ဝတ် ဝတ်ဆင်ထားတဲ့အမျိုးသားတွေက ဓားထောက်လုယက်ခဲ့တာဖြစ်ပြီး လုယက်ခံရတဲ့နေရာအနီးမှာလည်း စစ်ကောင်စီတပ်ထုတ် MA - 3 သေနတ်တွေကို ကိုင်ဆောင်ထားသူတွေက အခြေအနေစောင့်ကြည့်ပေးနေတယ်လို့ ဆိုပါတယ်။

“လုတဲ့ကောင်တွေက ဓားထောက်လုတာ၊ ဘေးနားမှာ စစ်တပ်သုံး MA 3 သေနတ်တွေကိုင်ထားတဲ့ ကောင်တွေကလည်းစောင့်ပေးနေတာ၊ အကုန်လုံးအရပ်ဝတ်တွေနဲ့။ ပြီးရင် PDF လုပ်ပါတယ်ဆိုပြီး ဝါဒဖြန့်ဖို့ထင်တယ်” လို့ သူက ဆက်ပြောပါတယ်။

လုယက်မှုကျူးလွန်သူတွေဟာ စစ်ကောင်စီတပ်သားတွေလို့ ဒေသခံတွေကပြောဆိုပေမယ့် မြေလတ်အသံအနေနဲ့ သီးခြားအတည်ပြုနိုင်တာမျိုး မရှိသေးပါဘူး။

လုယက်ခံရတာကြောင့် လမ်းသွားလမ်းလာ အမျိုးသမီး ၂ ဦးဆီကနေ ဟန်းချိန်း နဲ့ လက်စွပ်တွေအပါ စုစုပေါင်း ရွှေ ၁ ကျပ်သားခန့်နဲ့ ငွေသား ၁ သိန်းကျပ် ပါသွားတယ်လို့ သိရပါတယ်။

အဲ့ဒီထီးဆောင်း-အရာတော်လမ်းပိုင်းမှာ စစ်ကောင်စီတပ်သားတွေဟာ လမ်းသွားလမ်းလာတွေကို စစ်ဆေးရေးအကြောင်းပြ ငွေတောင်းခံတာတွေ လုပ်ဆောင်ပေမယ့် အခုလိုလုယက်တာကတော့ ပထမဆုံးဖြစ်တယ်လို့ ဒေသခံတွေက ပြောပါတယ်။

စစ်ကောင်စီ စစ်ကိုင်းမြို့နယ်စီမံအုပ်ချုပ်ရေးမှူးဟာ ဦးကျော်စွာမောင်စိုးဆိုသူ ဖြစ်ပြီး စစ်တက္ကသိုလ် DSA အပတ်စဉ် ၄၆ ဆင်းသူဖြစ်ကာ ဗိုလ်မှူးအဆင့်ကနေ မြို့နယ်စီမံအုပ်ချုပ်ရေးမှူးဖြစ်လာသူဖြစ်တယ်လို့ သိရပါတယ်။

#မြေလတ်အသံ