စဉ့်ကူးက NLD ပါတီဝင်တဦးအပါ အမျိုးသား ၃ ဦး စစ်ကြောရေးမှာ နှိပ်စက်ခံနေရ

မန္တလေးတိုင်း၊ စဉ့်ကူးမြို့နယ်က NLD ပါတီဝင်တဦးအပါအဝင် အမျိုးသား ၃ ဦးဟာ စစ်ကောင် စီတပ်တွေရဲ့ ဖမ်းဆီးမှုခံရပြီးနောက် စစ်ကြောရေးစခန်းမှာ နှိပ်စက်ခံနေရတယ်လို့ စဥ့်ကူး ပြည်သူ့ကာကွယ်ရေးအဖွဲ့ လက်အောက်ခံ မြေပြင်ကင်းထောက်အဖွဲ့က ပြောပါတယ်။

အဖမ်းခံရသူ ၃ ဦးမှာ ရေတော်ကျေးရွာသား NLD ပါတီရဲ့ မြို့နယ်အလုပ်မှုဆောင်ဖြစ်တဲ့ ဦးစိုးသိန်းနဲ့ ထုံးကြီးကျေးရွာသား ဇော်နိုင်ဝင်း၊ အောင်ဇော်ဝင်း တို့ဖြစ်ကြပြီး လက်ပန်လှရွာ စစ်ကြောရေးစခန်းမှာ နှိပ်စက်ခံနေရတာလို့ ဆိုပါတယ်။ 

"စစ်ကြောရေးကို ဖမ်းဆီးခေါ်ဆောင်သွားပြီးကတည်းက မိသားစုတွေနဲ့ တွေ့ခွင့်မပေးဘူး။ ရိုက်နှက်စစ်ဆေးတာတွေကြောင့် ခန္ဓာကိုယ်တွေ၊ မျက်နှာတွေ၊လက်တွေမှာ ဒဏ်ရာတွေရရှိနေ​ကြပေမယ့် ဆေးကုသမှုလုံးဝမပေး​ဘူး လို့ ဖရဲသီး (အတွင်းသတင်းပေး)ဆီကသိရတယ်"လို့ စဉ့်ကူးပကဖလက်အောက်ခံ မြေပြင်ကင်းထောက်အဖွဲ့မှ တာဝန်ရှိသူတဦးက ပြောပါတယ်။ 

ပြီးခဲ့တဲ့ ဇွန်လအတွင်းက ဦးစိုးသိန်းမှာ မြို့ပေါ်ကနေ ရေတော်ကျေးရွာကိုပြန်လာချိန် ငွေတောင်မောင်း တံတားဂိတ်မှာ အဖမ်းခံလိုက်ရတာဖြစ်ပြီး ဇော်နိုင်ဝင်းနဲ့ အောင်ဇော်ဝင်း တို့ကတော့ ထုံးကြီးကျေးရွာက နေအိမ်ကနေပဲ ဇူလိုင်လ ၄ ရက်မှာ ဖမ်းဆီးခံလိုက်ရတာ ဖြစ်ပါတယ်။ 

ထုံးကြီးကျေးရွာသား ၂ ဦးမှာ တော်လှန်ရေးအင်အားစုတွေကို သတင်းပေးလုပ်နေတယ်လို့ စွပ်စွဲပြီး ထုံးကြီးရဲစခန်းထဲမှာ တပ်စွဲနေတဲ့ စစ်ကောင်စီတပ်သားတွေက ဖမ်းဆီးခဲ့တာဖြစ်တာလို့  ဒေသခံတွေက ပြောဆိုပါတယ်။

ထုံးကြီးကျေးရွာရဲစခန်းမှာ ပျုစောထီးတွေအပါအဝင် စစ်ကောင်စီတပ်ဖွဲ့ဝင် အင်အား ၄၀ ကျော်က အခုနှစ် ဇွန်လကစလို့ ဇူလိုင်လ ၂၄ ရက်ဒီကနေ့အချိန်ထိ တပ်စွဲနေကြတာဖြစ်ပြီး ရွာထဲက မသင်္ကာသူတွေကို ဖမ်းဆီးတာတွေလုပ်ကာ ငွေတောင်းခံတာတွေလည်း ပြုလုပ်ကြတယ်လို့ သိရပါတယ်။ 

စာတည်း - လင်း

#မြေလတ်အသံ

#မန္တလေး #စဥ့်ကူး #စစ်ကောင်စီ #ဖမ်းဆီးနှိပ်စက် #NLDအလုပ်အမှုဆောင်