စပါးဖျက်ပိုးကြောင့် စဉ့်ကူးနယ်က တောင်သူတချို့ အရှုံးပေါ်

မိုးလေဝသအခြေအနေ အရင်နှစ်တွေကထက်ကောင်းပေမယ့် စပါးနှံထွက်ရမယ့်အချိန်မှာ စပါးဖျက်ပိုးဝင် တာကြောင့် စပါးအထွက်နှုန်းလျော့ကျကာ စဉ့်ကူးမြို့နယ်အတွင်းက စပါးစိုက်တောင်သူတချို့ အရှုံးပေါ်နေ တယ်လို့ ဒေသခံတောင်သူတွေဆီက သိရပါတယ်။

စဉ့်ကူးမြို့နယ်အတွင်းက ကောက်ကြီးစပါးစိုက်ခင်းတွေမှာ စပါးဖျက်ပိုးကြောင့် စပါးအထွက်နှုန်းကျဆင်းပြီး တောင်သူတွေ အရှုံးပေါ်နေတာဖြစ်ပါတယ်။ 

ပိုးကျတဲ့စပါးခင်းတွေဟာ စပါးအရွက်တွေဝါလာပြီး အပွင့် မပွင့်တော့ဘဲ စပါးနှံတွေ မထွက်တာမျိုးဖြစ်တယ်လို့ တောင်သူတွေက ဆိုပါတယ်။ 

အဲဒီလိုဖြစ်တာဟာ စပါးခင်း ၁ ခင်းရဲ့ ၇၀ ရာခိုင်နှုန်းလောက် ပိုးကျနေတာဖြစ်ပြီး အရင်နှစ်တွေက အခုလိုမျိုးမဖြစ်ဖူးဘူးလို့ တောင်သူတွေက ဆိုပါတယ်။ 

ဒါကြောင့် ပိုးကျတဲ့စပါးခင်းတွေကို တောင်သူတွေက ပိုးသတ်ဆေးဖြန်းပေမယ့် ထိရောက်မှုမရှိဘဲ ဘာပိုးသတ်ဆေး ဖြန်းရမှန်းမသိဖြစ်နေကြတယ်လို့ ဆိုပါတယ်။ 

“ဘာပိုးမှန်းတော့ မသိဘူး၊ အများစုက အနှံမထွက်ဘဲ အရွက်တွေဝါလာကြတာ။ ၁ ဧကကို ၁၀ တင်းထွက်ဖို့ကို မသေချာဘူး။ တချို့ဆို ၁ ဧက ၅ တင်းလောက်ပဲ ထွက်ကြတာ။ အဲ့တော့ရောင်းစရာ မရှိဘူးလေ။ အိမ်စားဖို့တောင် အနိုင်နိုင်၊ ရောင်းဖို့ကျန်တဲ့လူတွေလည်း ရှိမှာပေါ့။” လို့ ဒေသခံတောင်သူတဦးက ပြောပါတယ်။

ဒါ့အပြင် ဒေသတွင်း စစ်ရေးတင်းမာပြီး လမ်းပန်းဆက်သွယ်ရေးခက်ခဲတာကြောင့် ဝယ်လက်တွေအလာနည်းတဲ့အတွက် တောင်သူတွေစပါးရောင်းချဖို့ အခက်တွေ့နေကြတယ်လို့ ဆိုပါတယ်။ 

ဒေသတွင်းစစ်ရေးတင်းမာပြီး လမ်းပန်းဆက်သွယ်ရေးခက်ခဲတာကြောင့် ခရီးစရိတ်ပိုမိုကုန်ကျတဲ့အတွက် တောင်သူတွေကတော့ ဒိုင်တွေဆီကိုယ်တိုင်သွားမရောင်းနိုင်ဘဲ စပါးဝယ်လက်ကိုစောင့်ကာ ရောင်းကြတာ မျိုးဖြစ်ပါတယ်။ 

ဒီနှစ်တော့ စပါးဖျက်ပိုးဝင်တာကြောင့် စပါးအရနည်းကြပြီး စပါးရောင်းစရာ မရှိတဲ့တောင်သူတွေရှိသလို ဝယ်လက်ကို စောင့်နေရတဲ့တောင်သူတွေလည်းရှိနေတယ်လို့ ဒေသခံတောင်သူတဦးက ဆိုပါတယ်။

စဉ့်ကူးမြို့နယ်ဟာ ပဲ၊ နှမ်းနဲ့ ကြံ စတာတွေလည်းစိုက်ပျိုးပေမယ့် စပါးကိုတော့ အဓိကထား စိုက်ပျိုးတဲ့ မြို့နယ်တခုလည်း ဖြစ်ပါတယ်။

သတင်း - ပြုံးပန်းဝေ၊ စာတည်း - JCG

#မြေလတ်အသံ

#မိုးလေဝသ #စပါး #စပါးဖျက်ပိုး #စဉ့်ကူး