ဆင်လူးရွာပျူစောထီးတွေက Jammer တပ်ဆင်ဖို့ဆိုကာ ၁ အိမ်ကျပ် ၃ သိန်းတောင်းခံနေပြီး မပေးဘဲထွက်ပြေးသူတွေရဲ့ နေအိမ်တွေကိုဖျက်ဆီး

မကွေးတိုင်း၊ ပွင့်ဖြူမြို့နယ်ရှိ ပျူစောထီးတပ်ဖွဲ့ထိန်းချုပ်ထားတဲ့ ဆင်လူးရွာမှာ Jammer(ရေဒီယိုလှိုင်းဖြတ်စက်) ဝယ်ယူတပ်ဆင်ဖို့ဆိုကာ ၁ အိမ်ထောင်ကို ငွေကျပ် ၃ သိန်း တောင်းခံနေတဲ့အတွက် ဒေသခံတွေထွက်ပြေးတိမ်းရှောင်နေကြတယ်လို့ သိရပါတယ်။ 

ကာကွယ်ရေးတပ်ဖွဲ့တွေရဲ့ ဒရုန်းနဲ့တိုက်ခိုက်မှုကနေကာကွယ်ဖို့ဆိုကာ ဒီဇင်ဘာ ၁၆ ရက်က စတင်ကာ Jammer စက်အတွက် ကျပ် ၃ သိန်း သို့မဟုတ် စပါးတင်း ၂၀ ကို အဓမ္မခြိမ်းခြောက်တောင်းခံနေတာလို့ ဆိုပါတယ်။

“ ခင်များတို့ ပေးဖို့ဆိုရင်ပေး၊ မပေးနိုင်ဘူးဆိုရင်လည်းပြေး၊ ပြေးလို့ရှိရင် အိမ်မှာရှိတဲ့ တိရစ္ဆာန်တွေကို ခင်များတို့မပေးတဲ့အတွက် ကျနော်တို့ရောင်းချမယ်။ ရောင်းချလို့ရတဲ့ ငွေကြေးကို Jammer ဝယ်ဖို့အသုံးပြုမယ်။ ပိုတဲ့ငွေကိုကျတော့ တပ်ဖွဲ့ရဲ့လုံခြုံရေး စားဝတ်နေရေးအတွက် အသုံးပြုမယ်လို့ဆိုပြီး တောင်းရမ်းပါတယ်” လို့ ရွာခံအမျိုးသားတဦးက မြေလတ်အသံကို ပြောပါတယ်။

အတင်းအကြပ်တောင်းခံမှုတွေကြောင့် ပိုက်ဆံမပေးနိုင်တဲ့ ထောင်နဲ့ချီတဲ့ရွာခံတွေ နေအိမ်တွေကနေ ထွက်ပြေးတိမ်းရှောင်နေကြပြီး ရွာကနေ ထွက်ပြေးသွားတဲ့ ပင်စင်စားသားဖွားဆရာမနေအိမ်အပါအဝင် နေအိမ် ၆ လုံးကို ပျူစောထီးတွေက ဒီကနေ့ ဒီဇင်ဘာ ၂၅ ရက်မှာ ဖျက်ဆီးတာတွေလုပ်ဆောင်နေတယ်လို့ ဆိုပါတယ်။

ဒါ့အပြင် ပျူစောထီးခေါင်းဆောင် အုပ်ချုပ်ရေးမှူး ဦးဖိုးအောင်ရဲ့တူဖြစ်သူ ပျူစောထီးဒုခေါင်းဆောင် ကျော်သက်ဦးက ထွက်ပြေးသွားတဲ့ ပြည်သူနေအိမ်တွေကိုမီးရှို့ဖို့ လိုက်လံစည်းရုံးလှုံ့ဆော်နေတာတွေကိုလည်း လုပ်ဆောင်နေတယ်လို့ သိရပါတယ်။

ကျေးရွာထဲမှာ ကျန်ခဲ့ပြီး ပိုက်ဆံမပေးနိုင်တဲ့ ရွာခံတွေကို ကျေးရွာအတွင်းပျူစောထီးစခန်းတွေမှာ အိမ်သာကျင်း၊ ကတုတ်ကျင်းနဲ့ ဘန်ကာကျင်းတွေ တူးဖော်ခိုင်းတဲ့ပြင် ညလုံးပေါက် ကင်းစောင့်စေခိုင်းတာတွေ လုပ်ဆောင်နေတယ်လို့ ဆိုပါတယ်။

ဆင်လူးရွာဟာ အိမ်ခြေ ၁,၅၀၀ ခန့်၊ လူဦးရေ ၃,၀၀၀ ကျော်ရှိရွာကြီးဖြစ်ပြီး ကျေးရွာအတွင်းမှာ အုပ်ချုပ်ရေးမှူး ပျူစောထီးခေါင်းဆောင် ဦးဖိုးအောင် ဦးဆောင်တဲ့ ပျူစောထီးအင်အား ၂၀၀ ကျော် အခြေပြုအထိုင်စခန်းချ တပ်စွဲထားပြီး ရွာသားတွေကို ပျူစောထီးတပ်ဖွဲ့အတွင်း အဓမ္မသွတ်သွင်းမှုတွေလုပ်ဆောင်နေတာပါ။

ဒီဇင်ဘာပထမပတ်အတွင်းမှာပဲ ဆင်လူးရွာကနေ ထွက်ပြေးတိမ်းရှောင်လာတဲ့ ဒေသခံ ၇၀ ကျော်ကို ဒေသကာကွယ်ရေးတပ်ဖွဲ့တွေဘက်က အကူအညီပေးစောင့်ရှောက်ထားရပြီး ရွာကနေထွက်ခွာနိုင်ရေး ဆက်သွယ်အကူအညီတောင်းခံလာတာတွေလည်း အများအပြားရှိနေတယ်လို့ မင်းဘူးခရိုင်အမှတ် ၄ တပ်ရင်း ပြန်ကြားရေးတာဝန်ခံက ပြောဆိုထားပါတယ်။

စာတည်း - ဟိန်းစံ။

#မြေလတ်အသံ

#မကွေး #ပွင့်ဖြူ #ဆင်လူး #ပျူစောထီးရွာ #ငွေတောင်း